Mapinda 31 - Amazwi Yakwe Leza 2013

Amapinda yakwe Lemueli

¹ Yaa nayo ali mapinda ya mwene Lemueli waku Masa yano nyina wamusambilizye.

² Yemwe! We mwanane, wemuno naivyalile, we mwana wa vilayo vyane!

³ Utaca waonona amaka yako ku anaci, nanti ulupiya lwako kunoyali, vii, ali vino vyonona yamwene.

⁴ Uvwikisye, we mwanane Lemueli. Citalinga umwene ukumwa waini, nanti yakateeka ukukwata insuna ya wengwa. Citalinga yamwene ukukoleka foo.

⁵ Pano limwi ndi yamwa, yangakoleka icakuti yilile vino yangapingula, yasuule ni nsambu zyakwe yayo akucula.

⁶ Uwapeela uwengwa kuli yayo akufwa, kuli yayo yano yakunyongotoka.

⁷ Yate sile yamwe apakuti yilile uku ulanda wao, nupya yataiusya nu kucululuka kwao.

⁸ Uwavwangila yayo atangaivwangila na yonsi atazyelwa.

⁹ Uwalanda nu kupingula ivilungame. Uwapeela insambu ku apina na kuli yayo alinzile ukwazwiliziwa.

Mangu umufyeleke

¹⁰ Aweni wiyo angazana umuci umufyeleke? Ala wene wacindama ukuluta ukasi uwamutengo.

¹¹ Iya wakwe wamutaila nu kumutekela umwenzo, nupya atalatala aulizye kamwi foo.

¹² Wene akacitila iya ivisuma, ukwaula ukumuletela iviipe umu umi wakwe onsi.

¹³ Akalondelezya amavumbu ya mfwele, nu usavu uwakusumila insalu. Lyonsi waya umupilingane.

¹⁴ Waya wa wato wa aculuzi, yano yakafuma ukutali, apakuleta ivyakulya vyao.

¹⁵ Akakatuka katondotondo apa kuteyanyizizya ang'anda yakwe ivyakulya, nu kwankanya aomvi yakwe incito.

¹⁶ Akaceceta icalo, nga acikala. Alino impiya zino walonka ni minwe yakwe, azino akaomvya apa kukomela icalo cakwe.

¹⁷ Akaifyenta apa mala, nu kuomba pamaka na makasa yakwe.

¹⁸ Wamanya ningo ukuti umulimo wakwe uwamuzano. Nanti sile usiku kwene, asizimya ilampi lyakwe.

¹⁹ Akapunga pamba wakwe, nu kuipikwila insalu zyakwe.

²⁰ Akakonzolola ikasa lyakwe nu kupeela uku alanda, nga na kuli yao akulondekwa ukwazwiliziwa.

²¹ Umu nsita yakwe cuuma, amu ng'anda umwakwe yasisakamikwa foo, pano yonsi yakailikanya vyakuvimbala.

²² Akaipikwila sile wenga ivyakuzwala. Akazwala insalu zyakwe pamba uwamutengo, nu kuvimbala amalangeti atikame.

²³ Iya nawe akacindikwa wakwe cimwi, lwapa mpongolo ya musumba, pano yakaikala na ikolo ya mpanga.

²⁴ Akapikula insalu ni misipi, nu kuvikazya ku aculuzi. Nupya akasombola imipango ku aculuzi.

²⁵ Wene wakalawana nupya wacindama wakwe cimwi, akazanga lyonsi nupya asioopa iviliza inkolelo.

²⁶ Wene walamoka umu kulanda, nupya akalanda na mano umu kanwa kakwe.

²⁷ Akaangalila ningo ivikacitika umu ng'anda yakwe. Asilya ivyauseya foo.

²⁸ Ana yakwe aonsi yakakatuka nu kumuwanzya ndi vino uwalongo. Iya nawe apakumulumbanya akati,

²⁹ “Anaci aingi nayo kwene yakacita ivisuma, lelo wemo wayaluta yonsi pyu.”

³⁰ Upaale wene ukasomba sile. Ukuyemba nako kwene ukwasilesile. Lelo umwanaci wino akaoopa Yawe, aliwe alinzile ukulumbanyiziwa.

³¹ Icansambu ukumutaizya pali vino waomvile. Si lekini ivicitwa vyakwe vicindikwe kuli wensi.