Mapinda 30 - Amazwi Yakwe Leza 2013

Amazwi yakwe Aguli

¹ Ya ali mapinda yakwe Aguli, umwana umonsi wakwe Yake, amazwi ya usemo: Umuntu anena Itieli ati, “We Leza, nemo natonta. We Leza, nemo natonta, naongoka.

² Endi, nemo ntakweti amano ukuluta antu yonsi. Nemo insi na mano wa antu yanji.

³ Ntasambilila amano, acino nu Wamuzilo Wilya ntamumanya.

⁴ Uzye aweni uwatala wakwela ukwiyulu, alino nupya awelako? Uzye aweni uwatala wafumbatapo umuza? Uzye aweni uwatala wanyepa amanzi umu nsalu yakwe? Uzye aweni uwatesile impela ya nsi? Uzye wiyo, Izina lyakwe aweni, nupya amwana weni? Acino londolola ndu manyile!

⁵ Amazwi yonsi yakwe Leza acumi. Wene ali cisyangu, cakucingilila yao akuzina munoli.

⁶ Mu mazwi yakwe, kutaya uwakuti aungilizyemo kamwi, pa koopa ukuti angakukalipila, nupya ungasinilwa ukuti wewe wantumpu.

⁷ We Leza wane nkukulenga sile ivintu viili, utanjima vyoili kwene vii lino ntali mfwe:

⁸ Utaleka nje uwantumpu kunuli, lelo funtusya ucenjezi onsi kunondi. Nupya utaleka nje umupina nanti umukama. Fwandi uwampelako sile icakulya icilingine,

⁹ ukoopa ukuti ndi nikutisya, limwi ningakutalamila, nu kuvwanga inti, ‘Uzye Yawe aweni?’ Nupya ukoopa ukuti ndi ningaya umupina, ningatandika ukwiya icakuti nifye ni zina lyako, we Leza wane.

¹⁰ Utaamba umuzya ku musambazi wakwe, pano limwi ungaleka akutipwile, uculile namwenemo.

¹¹ “Kwaya insiki imwi ino ikatipwila isi nu kukana polelela nyina.

¹² Insiki ino ikati, ‘Swemo twazipa, lelo fwandi yataizifya aisikulu.

¹³ Insiki ya antu ya vilumba apa manso, ni nkopyo izinyunyumbuke.

¹⁴ Insiki ya antu yano utwinso twakalipa wa lupanga. Antu yayo pasi pa kuzunya alanda nu kuyakomola.

¹⁵ Umunsundu wakwata ana yakaci yaili.’ Ana yayo yakalaizya ala yakuti, ‘Mpeko we, mpeko we!’ Kwayako ivintu vitatu visyatala viikuta, vini navyo vitatala vyalanda iviti, ‘Twikuta.’

¹⁶ Ilindi, indilwa ya ng'umba, umusili uno amanzi yaposiwa ukwikusya, nga nu moto uno usitala iuti, ‘Vyavula!’

¹⁷ Umuntu ali wensi wino akaseka isi nu kuzyuluka nyina umukote, ilinso lyakwe yamwankole ya kuluzi yalalitonkola, naya lyang'anda yakalilye.

¹⁸ Kwayako ivintu vitatu vino vyampezya amano, vini avino naposiwa ukumanya ningo.

¹⁹ Inzila yakwe lyang'anda umwiyulu, inzila ya nzoka pali cilwala, inzila ya combo pali yemba, nga ni nzila yakwe cilumendo kuli cikazyana.

²⁰ Uo uli mwata wa mwanaci cizelele. Akula ndi wamala ukulya akumbula na pa tulomo, kwati atacisile nanti cimwi icamuselu.

²¹ Kwaya ivintu vitatu, vivyo ivyaya itensya nsi. Vini avino naposiwa ukumanya ningo ivili ndi vii:

²² umuzya wino akalasikwa apa wene, iciwelewele cino cituulilwa ivyakulya,

²³ umwanaci wino antu yapata lelo umusakwe, nga nu mukazyana akapoka namwene wakwe utwazi.

²⁴ Kwaya kweneko ivya umi vini ivicepesye pano nsi. Lelo vikwene vili vintu vimwi ivyakwatisya amano:

²⁵ Utunyelele utuntu tumwi tuno tutakoma. Lelo tukateyanya ivyakulya vyatuko umu cisanya.

²⁶ Tupiimbi nato tuposiwa ukuitaasya, lelo tukaikala umu mawe nupya apa sanzuke.

²⁷ Makanta nawe atakwata umwene, lelo akakatukila capamwi icikundi, ala watatantama usakausaka.

²⁸ Mususwe wino ungalema ukwikasa, lelo ali wino akazanwa umu masano yakwe yamwene.

²⁹ Kwaya kweneko ivintu vitatu ivikafyata usakausaka. Vini vyene ivyakuzunguka lino ukuvilola kuno vikupita:

³⁰ cisama uwakwatisya amaka ukuluta inyama zyonsi, wiyo asioopa icintu icili consi.

³¹ Mukolwe wino akataaza pali yanyina nkoko, sawe wino akatungulula ufyo wa mbuzi, nga nu mwene akapita inkolelo ya vita vyakwe.”

³² Ndi wacita uwelewele uwa kusoka, uvwa ni cipyu, nga nupya welenganya penepo, vimba nu lupi lwako apa kanwa.

³³ Pano ndi wengulula ulwambu lwi ziya, ungakwata amafuta. Ndi uma apa mpuno, uwazi suka uzwe. Nupya ndi watitila icikalale, ungakatusya ulwete.