Mapinda 3 - Amazwi Yakwe Leza 2013

Umpandamano wakupeela ance

¹ Mwanane utailila vino nkukusambilizya, lelo lyonsi sile uwaiusya vino nakunena ukucita.

² Pano vilalenga kuti umi wako utantalile muno nsi nga ulaya nu longo.

³ Utaleka ukuyela kwako nu kutaila kwako vikusye. Vivyo uvinyepelele umu nsingo yako, uvilembe nu mu mwenzo wako.

⁴ Ndi wacita vivyo, lyene Leza alakusansamusya, na antu kwene nayo yamakusansamusyanga pe.

⁵ Uwataila muli Yawe nu mwenzo wako onsi, utaezya ukutaila amano yako foo.

⁶ Waiusya Yawe muli vyonsi vino ukucita, nga nawe amakulanganga muno ungacitila pe.

⁷ Utaezya ukwelenganya ukuti wacenjela ukuluta pali vino waya, wemo uwakwatila Yawe icoopo, uwaleuka iviipe.

⁸ Ndi wacita vivyo, awe lyene ale ulakwata umulembo wa mpomvu, uwakupozezya icilonda cako, nu kutonsya ivikuwaya umu mwili wako.

⁹ Uwacindika Yawe umu kumutuula icuma cako, ni vizao vyako ivyankolelo.

¹⁰ Alino lyene inkoma zyako zilazulamo ivyakulya, ni nkolo zyakwe waini nazyo zilasambela icakuti nu mwakwika muluula.

¹¹ Mwanane, uwasumbako amano, Yawe ndi akukusunda utasoka foo.

¹² Pano Yawe akasunda yano watemwa, ndi vino umukwasi akasunda umwanakwe umonsi wino watemwa.

¹³ Uwalongo umuntu uwakwata amano nu wamanya ukwiluka ivintu,

¹⁴ pano amano yakaletela umuntu ivisuma ukuluta vino zaabu angamukwilila.

¹⁵ Usuma wa mano waluta pa tumawe twamutengo, na pa vintu vino umuntu angakumbwa, patangepaye nanti cimwi icingalingana na mano.

¹⁶ Amano yakalenga ukuti umuntu alengele pano nsi, yakalenga nu kuti aye umukama, nga nu kumucindamika.

¹⁷ Amano yakaletela umuntu uluzango umu wikazi wakwe, yakalenga nu kuti aikala mu mutende.

¹⁸ Amano yakoline wa muti uno ukapeela umi kuli yao akayazengela, yao akalemelela kweneko ali yano amano yakalenga ukuti yaikala ningo.

¹⁹ Ukufuma uku mano akuno Yawe wapanzile umufula wa nsi, nu kutungilila iyulu ukwaula ulucesi.

²⁰ Uku mano yakwe walenzile ukuti inguzi zyapita, nu kuti amakumbi yatonyezya imvula pano nsi.

²¹ Mwanane uwaika umwenzo uku mano nu ku kucenjela, utaleka vifume kunuli.

²² Ivintu vii vilalenga kuti uwaikala uwikalo usuma nupya uwaluzango.

²³ Lyene ulikala ukwaula icakukusakamika, nu kuluvyanya utalatala uluvyanye foo.

²⁴ Utalaoopa cimwi nga waya uku kulala, nupya ulailalila sile usiku onsi.

²⁵ Wemo utalaoopa amasyamo yano yakapumikizya antu, nanti yano yakaponela antu aipe.

²⁶ Pano Yawe aliwe alakuwaka, nu kusunga ingazo zyako uku viteyo.

²⁷ Utakana ukucita ivisuma kuli wino wakulenga, uwamupeela uwila ndi cakuti watukwata.

²⁸ Utanena umwinipamba uti, “Pitanga, ukize mutondo alino ndakupeela,” lino ukweti ivya kumupeela lilyo kwene.

²⁹ Utapanga ukucitila umwinipamba iviipe, wino akaikala pipi nawe nupya uwakutaila.

³⁰ Utalemanizya umuntu atakweti umulandu, wino atatala wakucitilapo iciipe icili consi.

³¹ Utacitila uzuwa umuntu wa luzazwe, nupya utakolanya imiyele yakwe,

³² pano Yawe wapata umuntu akaifya uku mufulo, lelo aololoke ali yakundwe yakwe.

³³ Intipu zyakwe Yawe zyaya apa ng'anda yakwe kaifya, lelo wene akapolelela icifulo ca muntu akacita vyaololoke.

³⁴ Wene akasuula antu ya munyambo, lelo yayo aicefya yene akayuvwila amizu.

³⁵ Antu yamano yalapeelwa ucindami, lelo iviwelewele insonyi zilavilema.