Mapinda 29 - Amazwi Yakwe Leza 2013

Ilamulo lya antu aololoke

¹ Umuntu uumalala umwenzo nanti yangezya uku mukalipila, ilovyo lilamupumikizya, nupya atalapusuka.

² Asuma ndi cakuti yateeka, antu yakasansamuka. Aipe ndi ayano yateeka, antu yakainong'onya.

³ Umuntu wino watemwa amano akazanzya isi. Lelo wiyo akapita na anaci yacizelele, wene akasansanta sile ivyuma vyakwe.

⁴ Ndi cakuti kateeka wakwata ulungami, impanga yakwe ikakoma. Lelo ndi watemwisya ukupoka amafukakanwa impanga yakwe ikaononeka.

⁵ Ndi cakuti wazembeleka umuzo, ala waiteya ulukose.

⁶ Umuntu umwipe walyata ingazo zyakwe apa nkose zyakwe. Lelo wiyo akacita vyaololoke wene akaya ni nsansa zitupu nu untungwa.

⁷ Umuntu akacita vyaololoke akasakamala insambu zya mupina. Lelo umwipe wene pasi nanti cimwi cino wamanya.

⁸ Antu amisowe yakakatusya ulwete umu musumba, lelo antu yamano yene yakatekezya icipyu.

⁹ Umuntu wamano ndi watwala iciwelewele uku cilye, cene cikasekaseka sile nu kuponta. Nga patangaya umutende.

¹⁰ Antu akazwisya uwazi yapata umuntu wakaele. Lelo aololoke yene, yakasakamala umi wakwe.

¹¹ Iciwelewele cikalangizya icipyu cakweco consi. Lelo umuntu wamano wene akacikanya.

¹² Ndi cakuti kateeka wakutika uku mazwi ya ntumpu, ala na aomvi yakwe yonsi nayo kwene yakasanguka yaya aipe.

¹³ Umuntu mupina na wiyo akamucuzya, yonsi yoili yakolana muli cii, cakuti yonsi yoili Yawe akayakozezya uluswepo.

¹⁴ Umwene wino akapingwila apina ukwaula lufyengo, wene alateeka amanda avule wakwe cimwi.

¹⁵ Umukota nu kukalipila vikapeela amano, lelo umwana ndi yamutazyela, ala yakumulolekesya sile, wene alaletela nyina insonyi.

¹⁶ Aipe nga yano yateeka, uyi ukakulilako. Lelo yayo akacita vyaololoke yalalola ilovyo lyao.

¹⁷ Sunda umwanako nga nawe alakuletela umutende umu mwenzo, nu kukusansamusya umu mwenzo.

¹⁸ Ukusi umbwilo wakwe Leza, antu yakapita cipitepite. Lelo alongo ayayo akawaka amasunde.

¹⁹ Umuzya asilungikwa uku mazwi sile, nanti angala angayiluka, wene atange ayasakamale foo.

²⁰ Umuntu umutumpe nupya iciwelewele angaya nu upaalilo, ukuluta umuntu akavwangavwanga ukwaula ukwelenganya.

²¹ Ndi wapololokezya umuzya ukutandikila uku wance wakwe, apa kusyalikizya alasya wakutuka.

²² Umuntu ndi wasoka, akakatusya ulwete, nu wa cipyu nawe akavuzya amaifyo.

²³ Icilumba ca muntu cikamuletelela mpaka acefiwa, lelo umuntu akaicefya wene yakamucindika.

²⁴ Wino akapita nu mwivi, wiyo kwene ali mwanisi wakwe, Wene alavunukwa ndi cakuti wapeela umboni wacumi mu cilye, nga Leza alamutipa ndi cakuti wakana ukucita cico.

²⁵ Ukoopa antu cili wa citeyo, Lelo ukutaila muli Yawe kukapususya.

²⁶ Antu avule yakalonda sile ukutemwikwa kuli yakateeka. Lelo insambu zyakwe cila muntu zikafuma kuli Yawe.

²⁷ Antu asicita vyaololoke yakapata antu aololoke, asuma nayo yakapata aipe.