Mapinda 27 - Amazwi Yakwe Leza 2013

¹ Utaezya ukuitakizya apavya wanda wa mutondo, pano utamanyile vino uwanda uwo ulaca.

² Leka muze awino akuwanzye, utaiwanzya we mweneco. Umuntu muze awino alinzile akuwanzye, asi milomo yako we mweneco foo.

³ Iwe lya nyoma, nu mucanga wene waluta ukunyoma, lelo intazi ya ciwelewele yene yaluta pali vyoili.

⁴ Ulufyengo ni cipyu vyonsi ivya ononyi. Lelo uzuwa wene waluta pali vyoili.

⁵ Cazipa yakusinkola apaswe, ukuluta ulukundo lwamu umfisolo.

⁶ Ivilonda vino cuzako angakucisa vitangaya ivyaku mufulo, lelo ukufyompwa uku mwanisi kwene ukwa kapelu.

⁷ Umuntu aikwite akaswa ni lela lyakwe nacisenga, lelo wiyo ali ni nzala, kunoli ni cilule consi kwene cikalyompa.

⁸ Umuntu akazeuluka nu kusya icifulo cakwe wakolana ni cunyi, icikazeuluka icisya icinsanzo cakweco.

⁹ Mafuta acinunu cisuma pamwi nu ubani vikazanzya umwenzo, lelo usuma wakwe cuza wasintilila pa kulungika auze.

¹⁰ Utatazyela cuza wako nanti cuza wakwe so, utaezya nu kuya uku ng'anda ya mwinako, ndi cakuti waponelwa ni ntazi.

¹¹ Mwanane, uye na mano, pakuti uzanzye umwenzo wane, pakuti ningakwata insambu zya kwasuka wensi wino anganzewanya.

¹² Uwamano ndi walola ingofyo, akafisama, lelo iciwelewele cene cikapitapo sile nga cipeziwa ningo.

¹³ Pokolola ivyakuzwala vya muntu wino walaya ukulipilila umulendo. Pano wene waifima ku mulendo wino atamanyikwe ningo apakuti yauze yalolele kweneko.

¹⁴ Akapolelela umuze apa macaca, ala watasanzula ni zwi, yakamutunganya wakwe katipwila.

¹⁵ Umwanaci wa vikanza wakolana na mumbo.

¹⁶ Nu muntu wino angamutonsya, ala angatonsya nu muza nanti ukulema amafuta lwa kwilunji.

¹⁷ Ndi vino icela cikanyola icela cuze, vivyo kwene umuntu nawe akakopa imisango ku muntu muze.

¹⁸ Wiyo akasakamala umusamvu, aliwe akalya amasamvu. Na wiyo akawaka umusambazi wakwe, nawe akapelwa umucinzi.

¹⁹ Vino impumi zya antu zikaloleka umu manzi, avino nu muntu akailola umu mwenzo wakwe.

²⁰ Vino imfwa ni lindi vitatala viikuta, ali vino na manso ya muntu yatalatala ikute.

²¹ Kwaya ilungu lyakwengulwila siluva nga ni lungu lyakusungulwila zaabu, lelo umuntu wene akapimilwa ku kutasiwa apa miyele yakwe.

²² Nanti sile wapondenkanya iciwelewele na cisaka umu cina, uwelewele wakweco utangafuma.

²³ Uwamanya ningo ivyaya imfwele zyako, ulinzile ukusakamala nu ufyo wa ng'ombe zyako.

²⁴ Pano ivyuma visiyelelela pe, nu wene usiikalilila mpaka umu nkulo zyonsi.

²⁵ Isote ilyume nga lyafuma penepo, pakamelelapo umulemvwe, ni sote lino yipa umu myamba likakonganikwa,

²⁶ nga lyene ukwata na ana yamfwele yano ungazwalila mwenemo, na yasawe akulipila uku vyalo vyako.

²⁷ Lyene ulola ni iziya lya mbuzi ilivule ilyakuilyokezya we mweneco, nga na akazyana akakuombela.