Mapinda 25 - Amazwi Yakwe Leza 2013

Amapinda nayauze yakwe Solomoni

¹ Amapinda nayauze yakwe Solomoni yano antu yakwe Hezekiya umwene waku Yuda, yalembulwile.

² Ukufisa umulandu ucindami wakwe Leza, ukulola umulandu luse luse, ali ucindami wakwe yamwene.

³ We muntu utange umanye ivikwelenganya umwene uwamu mpanga. Imyelenganyizizye yakwe, yaluta amano itu, wakwe vino iyulu lyasanzuka, nanti ndi vino yemba wazika.

⁴ Fumya mwenemo yamunyela muli siluva, ulole vino musyanyi amasula iciviya cimwi iciyengese.

⁵ Fumya mwenemo ivilolo vyakwisano iviipe, uteko wakwe umazyansya umu ulungami.

⁶ Utaezya ukuicindamika apa manso yakwe yamwene ya pano nsi, nanti ukuikolanya ungati nawe wewe mucindame.

⁷ Cazipapo ukuti umwene umweneco kwene aliwe akunene ukwikala apacindime, ukuluta ukukufumya pano we mweneco watuwikala, alino yapyanikizyepo umuntu muze akulusile ukucindama.

⁸ Cino watuilolela we mweneco na manso yako, utakalauka ukutwala uku cilye, pano cingize cikuletele insonyi ndu muzo wiza wakusinila.

⁹ Uvwanini nu muzo wino mwatimupusana nawe. Lelo utasokolola inkama zyakwe yauze.

¹⁰ Pano limwi ndi cakuti yakuvwa kuli yauze, yangakuwela, uonone nu mucinzi wako.

¹¹ Amazwi alondoloke yakolana ni viseekwa viyengese vyakwe zaabu, ivili pa mbale yakwe siluva.

¹² Umuntu wamano ndi wanenola umuntu, uiteyanye ukuvwa, pano amasizo yakwe yaluta amaelena yakwe zaabu, nanti iciyembelo cakwe zaabu musuma sana.

¹³ Ivyaya ukuzuka kwakwe cuma umu nsita yakusinza, ali vino inkombe yacisinka yaya kuli wiyo aitumile. Pano ikakolopezya umwenzo wa musambazi wakwe.

¹⁴ Wiyo akalaya ivilayo vyampomvu ukwaula kufikilizya, waya wa makumbi nu muza usileta imvula.

¹⁵ Ukutekela apa kukolopezya kaputula wa milandu nu ufuuke, cingalepoola ifupa nanti lingakoma uli.

¹⁶ Nanti ndi cakuti wazana uci, lya uwikute, lelo utacizya umu cipimo pano ungaluka.

¹⁷ Utaingila lili lili umu ng'anda ya muzo, pano limwi cingafuula, akutendwe, akupate.

¹⁸ Akaimilila umuze umboni waufi, wene akoline ni sumo nanti nu lupanga nanti nu luceto.

¹⁹ Ukupaalila mu muntu atatailwa, kwaya wi lino ilipe nanti ulwazo lulemale.

²⁰ Icili cimwi nu kuzula ikoti umu nsita ya mpepo, nako kwaya wa kwimbilila ulwimbo umuntu wa malanda, ukwimbila umuntu umusakamale ulwimbo, kukoline nu kuungila inkulwe apa cilonda.

²¹ Umwanisi wako ndi cakuti ali nu lusala, mupele icakumwa.

²² Fwandi cikoline wa kumukolonganikila amakala ya moto pa mutwe wakwe, icimupeela ni nsonyi.

²³ Ulwambo lwene lukalenga icipyu, icili conga kwene ndi vino umuza waku katutu ukaleta imvula.

²⁴ Cazipapo ukwikala api paala lya ng'anda, ukuluta ukwikala pamwi na mama wa vyongo.

²⁵ Ukuvwa ilyasi lisuma ukufuma uku mpanga ntali, cili wa kumwa manzi azuuke ku muntu ali nu lusala.

²⁶ Umuntu musuma, wino uvwila icipondo intete, akoline ni ntulo ya manzi avundoke nanti wa kafukoka ka manzi ya vikwi.

²⁷ Citazipa ukulya uci ukuluta apa cipimo nanti ukuzumila amazwi aku kulyombeleka.

²⁸ Umuntu wino atanga alesye umwenzo wakwe akoline nu musumba uwapomolwa ukwaula ilinga.