Mapinda 24 - Amazwi Yakwe Leza 2013

¹ Utazuwila antu yano yakwifya, nupya utaezya ukutandana nayo icuza.

² Pano yene yakaelenganya sile ivya ukukakasi umu myenzo yao. Yene ndi yavwanga icintu conga, ala caya icakucuzizyako umwi.

³ Ing'anda ikakuulwa na antu yamano, nu mufula wakweyo ukateekwa na antu yano yakailuka.

⁴ Ukwiluka ivintu ali kuno kukalenga ukuti mu miputule ya ng'anda, muzule mwenemo ivintu vyamutengo ivikalondekwa.

⁵ Umuntu wamano waluta uwamaka, nu mwiluke waluta umusambazi.

⁶ Pano umuntu apakulwisya inkondo, suka watala wapandwa amano, angamwazwa ukucimvya.

⁷ Iciwelewele ca muntu cikaposiwa ukuvwa umwalola amano. Ali mulandu kwene uno citange cikwate ni vyakulanda apa mpongolo zya musumba.

⁸ Umuntu akapangila ukucita iviipe, yakamwama wakwe kalulete.

⁹ Iciwelewele ca muntu cikaelenganya sile ivya maifyo, uwa mitumfyo, akapatikwa uku antu.

¹⁰ Nga watovoka ala amaka yako yalacepelwa pa wanda uno wizilwa ni ntazi.

¹¹ Uwakulula yano yakutwala ku mfwa. Uwapususya yayo yano yakukwekwesya nu kuyatwala uku kuyakoma.

¹² Uzye ungakana ukuti, “Awe nemo ntamanyile umulandu?” Nga fwandi wiyo uwamanya nu kupima imyenzo ya antu atamanya? Nanti wiyo akawaka umupasi wako uzye asiuvwa?

¹³ Mwanane, uwalya uci pano wene usuma, uci ukatona uku malela, kuli kanacisenga, walyompa mu kanwa kako.

¹⁴ Ali vino waya nu kumanya amano umu mwenzo wako. Nga cakuti wayazana, lyene ale insita iliza ino vino ukataila vilafikiliziwa.

¹⁵ Utateyamila umuntu umusuma apakuti umwiyile, nanti ukumononela ing'anda. Pano ukucita vivyo ukwifya.

¹⁶ Umuntu musuma nanti angapumikiziwa ni vintu iviipe amaila nyanya, wene alasyala aimi sika. Aipe yene isyamo lilayaponela uyi uyi.

¹⁷ Utasansamuka nga walola kuno isyamo lyaponela umwanisi wako.

¹⁸ Pano Umwene Leza alalola kuno wemo ukusansamuka nu kukusokela alakusokela. Lyene atange apezye nu mwanisi wako kwene.

¹⁹ Antu aipe utayakwatila uluzazwe foo, nanti ukuyazuwila.

²⁰ Pano umuntu mwipe wene wala wasyama, casila atakweti uyo.

²¹ Mwanane, ala mwine uwakwatila Umwene Leza icoopo, uwakwatila na yamwene ya pano nsi umucinzi. Pali yoili kwene, utatalamila nanti wenga, nupya utalemana na yayo akatalamila yamwene yonsi yoili.

²² Pano icilanduzi cao, cingakatuka, cikupumikizye nupya pasi nanti aumwi uwamanya uononyi uno yamwene yayo nu Mwene Leza yangatuma.

Imvwango nazyuze izya malango

²³ Ivyalondelela penepo, imvwango zino zyafuma uku antu ya malango. Ukuya nu muncizyanya apa kuputula imilandu kutazipa foo.

²⁴ Kaputula wa milandu wino welela umuntu wino wayaifya, antu imitundu yonsi yalamupatilapo, nu kumutipwila yalamutipwila.

²⁵ Lelo yayo yano yapingwila umwipe ukulingana ni sunde, yene yakapolelelwa nu kucindikwa, yalacindikwa.

²⁶ Ukwasukana ivya mpomvu ali ucuza wa mpomvu.

²⁷ Tala kuula ing'anda yako, alino ulime ni calo cako, nga nu kutwala alino utwale umwanaci.

²⁸ Utaya nu umboni wakusinila umuzo ndi cakuti utasininkizye umulandu, nupya utezya wavwanga ivintu ivya kumufyengelekezya umulandu.

²⁹ Utalanda ukuti, “Eya, kwene nkumucita wakwe vino wancisile! Eya ee, apakuti cisikane!”

³⁰ Nemo natazile impita umu vyalo vya vilimwa vya matingi, ivya muntu umwi atakweti amano.

³¹ Monsi sile nazanyile mwamela imyunga, na sensele ale wakula wakwe cimwi. Ni cimpinda ca mawe ala cawa mpiti.

³² Alino ndolekesya, inkutumala, yasuka amano yiza, alino nsambililako icintu cii:

³³ “Endi mwandi tala sipula utulo panono, ale mwandi lala vivyo kwene, utale uikumbate nu kupuuza panono.

³⁴ Lelo kwene apa nsita ino uli umu tulo, upina uliiza panuli wa mwivi, nu kuulilwa kulakuponela wa kwiza kwa cipondo.”