Mapinda 23 - Amazwi Yakwe Leza 2013

¹ Ndi cakuti ukulya icakulya nu muntu mucindame, uwatala uwelenganya ningo vino umuntu wiyo ali.

² Ndi cakuti wapunuka, tala susula icikolomilo cako.

³ Utapupumila ivyakulya ivyativizipisya, pano limwi visiikusya.

⁴ Utaivunola apakulonda ukama. Ndi cakuti wewe wa mano suulako sile.

⁵ Ivyuma vyako limwi ungaponga nakuno viile, ungati sile ivintu vino vimezile amapa nu kupapuka wakwe lyang'anda.

⁶ Utalya nu muntu walusoko, utakumbwa ni vilyo vyakwe nanti vingazipa uli.

⁷ Limwi angakwama ati, “Iza kuno ndulye, nu kumwa kweneko.” Fwandi umu mwenzo wakwe ala muli kamwi akakumukolola.

⁸ Akula sile lino walya, utandika nu kuluka konsi kano ulile, navino walukuwanzya ivivulungana nu kuvulungana.

⁹ Utalandila ivintu vyamano uku muntu umuwelewele, pano wene atange auvwe usuma muli vino ukulanda.

¹⁰ Utalelula yanande yampititi acitungu cako, nanti ukupokolola imisonso yakwe ya ana asyale.

¹¹ Pano Kavwangila wao wene uwamaka, nupya aliwe alakupingula.

¹² Uwauvwa ningo vino kasambilizya akukunena, nupya uwasumba amano kuli vino akukunena.

¹³ Utata nanti panono ukusunda umwana. Ndi cakuti wamunyambola nu mukota, wene atalafwa awe.

¹⁴ Uwamunyambola nu mukota, kuli kupususya umi wakwe ku mfwa.

¹⁵ Mwanane, ndi waca wakwata amano, lyene nemo ndatemwa wakwe cimwi.

¹⁶ Nupya umwenzo wane ulazanga wakwe cimwi, ndi naca nuvwa kuno wemo ukuvwanga ivyamano.

¹⁷ Utazuwila yakaifya umu mwenzo wako, wemo uwaopa sile Yawe amanda yonsi.

¹⁸ Cumi kwene insita iliiza, lino ivintu vino ukapaalila vilafikiliziwa.

¹⁹ Uvwa kuno mwanane, nga ukwate amano, nu mwenzo wako waelenganya ivya nzila nsuma.

²⁰ Wemo utapita pamwi na akolesi, nanti yayo akailyokezya ivya manona.

²¹ Pano kwene umukolesi wensi pamwi nu mupunuke, yakaisumba aeneco umu ulanda. Ukupunuka nu kulala ilolo vilalenga kuti usizye.

²² Uwauvwa kunondi ne so, nemuno nakuvyala. Nupya cisi cakwezya ukusuula nyoko lino wakota.

²³ Wemo ule ukale icumi, nupya utezya kucikazya. Ukale na mano, icuvwilo nu kwiluka.

²⁴ Isi wa mwana umulungame akasansamuka sana. Wino wavyala umwana wamano akazangila munoli.

²⁵ Uwasansamusya so na nyoko, Si ule uzanzye nyoko uwakuviile!

²⁶ Mwanane, ala sumba amano kuli vino nkukunena, uwalola vino nkaikala mu umi wane.

²⁷ Umwanaci cizelele wene akoline na polowe umuzike, na mama cipitepite akoline ni cifula cifyenkane.

²⁸ Akoline ni cipondo cino cikateyamila antu umu nzila, nupya wene akataanya ivyupo umukutalamika aonsi uku aci yao.

²⁹ Uzye aaweni akakungumala? Uzye aaweni akapita yakusakamala? Uzye aaweni akapita lyonsi nu lwete ala yakulilila sile ulanda? Uzye aaweni akapita ni nguma ukwaula ukumanya cino yatiyayacisila ivilonda? Uzye aaweni akapita na manso ayenze cee?

³⁰ Ayayo yano yakamwesya waini, yano yakalondelela waini wino yatikinkanya ni vintu vyuze.

³¹ Ala wemo utalondelela ukuyenza kwakwe waini mu lwako, lino wene akufotomoka itomvu nu kulyompa apa lulimi.

³² Apa kusyalikizya wene akaluma wa nzoka, nupya alakwingizizya nu usungu ungati uwakwe cipili.

³³ Amanso yako yalalola ivinjelengwe, nu mwenzo wako uzamboke kwati walwala inzaiko.

³⁴ Ulayuvwa ungati umuntu wino alambalile pali yemba, nanti wa muntu wino alambalile apapela ya mupondo.

³⁵ Lilyo ale akuzamboka akuti, “Yatiyanguma uluma, lelo cisikuwaya! Yatiyantimbola, lelo nsikuvwa ukuwaya nanti kumwi! Uzye alilaci lino namakatuka? Nkweti insuna yakumwa waini namuze.”