Mapinda 22 - Amazwi Yakwe Leza 2013

Umucinzi nu kwazwilizya alanda.

¹ Izina licindame lyazipa penepo ukuluta ukukwata ivyuma ivingi. Ucindami nao waluta siluva na zaabu.

² Umukama nu mupina yonsi icili conga, pano Yawe aliwe wayapanzile.

³ Umuntu wamano akacevya uzanzo ungamuzana nu kuutuka autuka, lelo iciwelewele cene cikaitwala sile umu mazanzo.

⁴ Ukuicefya nu koopa Yawe kukaleta ukama, ucindami nga nu umi.

⁵ Umu nzila ya muntu mwipe mwaya imyunga ni nkose. Lelo wiyo uwatemwa umi wakwe, wene akafuntuka kuno vili.

⁶ Sambilizya umwana inzila yakupitamo. Lino alakota atalafuma mwenemo.

⁷ Umukama akateeka alanda. Kakongola nawe akaya umuzya wakwe wiyo uwamukongwesya.

⁸ Katovya wa lufyengo, akasinza isyamo. Intuwa ya cipyu cakwe ilamupola aliwe kwene.

⁹ Kapela wa luse akapolelelwa, pano wapeela umulanda icakulya cakwe.

¹⁰ Zinga uwa mitumfyo, nu lwete ala lwasila. Ivikanza ni ntusi ala vya myalala.

¹¹ Umuntu wa mazwi akazanzya umwenzo, angatandana icuza na yamwene. Lelo umwene wene watemwa umuntu umutailwe.

¹² Amanso yakwe Yawe yakawaka antu amanya ivintu ningo. Lelo amazwi ya muntu waufi akayavulunganya.

¹³ Umukasu akavwanga ati, “Cisama ali panzi! Ndi naya umu museo amandema!”

¹⁴ Imivwangile yakwe cizelele yaya wakwe polowe. Yano Umwene Leza wakwatila icipyu yakaponelamo.

¹⁵ Ivicitwa vya uwelewele vyazula tupu umu mwana. Ali cino fwandi umukota ungazinga uwelewele wakwe ukutali.

¹⁶ Ukucuzya umulanda, kuli kumulundilapo ukama. Nu kupeela umukama uwila kuli kumucita umulanda.

Imvwango amakumi yatatu izya mano

¹⁷ Kutika kunondi, nga nani namakunena amazwi yano antu yamano yavwanga, apakuti uyamanye ningo.

¹⁸ Ndi cakuti umayawaka nu kuyavwanga lyonsi umu kamwa kako, ulalola ukuti yalakusansamusya.

¹⁹ Nemo nkulonda ukuti wemo uwataila muli Yawe. Uli mulandu kwene umaleka nu kuti nkusambilizye ni mvwango kwene zii ilelo.

²⁰ Nemo natinkulembela imvwango amakumi yatatu. Zyene zikweti ukumanya nga na umpandamano.

²¹ Nupya zilakwazwa ukulondololola imilandu iyampomvu, nga nu kwasuka antu ivyacumi ndi yakuuzya.

²² Utafyenga umupina pamulandu wakuti umupina. Nupya utafyengelekezya antu umu cilye.

²³ Pano Yawe ali kavwangila wao, aliwe alapokolola nu umi wakwe yano yayapata.

²⁴ Utandana icuza na antu acipyu, utapita na antu aakasoka zuwa.

²⁵ Pano limwi ungambula imisango yao, nu kukowezya umi wako.

²⁶ Utalaya ukulipilila uwa milandu inkongole zyakwe.

²⁷ Pano ndi waposiwa ukulipila, yangiza yakupingile nu musanzi wako kwene.

²⁸ Utaezya ukutelula yanande yampiti amu citungu cako, muno ivikolwe vyako vyaputwilile.

²⁹ Ndi cakuti wemo walola penepo umuntu umwi umu cincile umu milimo, wiyo kwene ali wino alinzile ukuombela yamwene, asi wakuombela antu asilesile foo.