Mapinda 21 - Amazwi Yakwe Leza 2013

Leza ali kateeka wa myenzo itu

¹ Yawe aliwe akatungulula imyenzo yakwe yakateeka, wakwe vino akatungulula uluzi nu kulutwala kuno atemilwe.

² Nanti angala umuntu akuitunga ukulungamika lyonsi, lelo Yawe aliwe akalengulula ivili umu mwenzo wakwe.

³ Ukucita ivisuma ni vya ulungi kukasansamusya Yawe, ukuluta ukupeela impolelwa kunoli.

⁴ Amanso ya cilumba nu mwenzo ukaituumika, ali luswepo lwa antu aipe. Nupya ali iifyo kwene.

⁵ Amapange ya muntu wino watekela yakamuletela umuzano, lelo yayo akazakantika mu kuomba kwao, yasikwata ivivule.

⁶ Ivyuma vyakulonkela mu ucenjezi vyene visilengela ukulowa. Nupya vikatala visya umuntu ku pipi ni mfwa.

⁷ Antu aipe yakaikolomwela sile imfwa pamulandu nu ukakasi wao, pano yasilonda ukucita ivisuma.

⁸ Antu ya milandu yakalondela sile inzila izikolowane. Akaele yene imipitile yaya ilungamane.

⁹ Cazipa uku ifyantika wenga apilali, ukuluta ukwikala ing'anda yonga na mama umukangu.

¹⁰ Antu aipe yene lyonsi yakalonda ukucita penepo cimwi iciipe. Nupya kutaya umuntu nanti wenga wino yakatezela.

¹¹ Ndi cakuti yacuzya umuntu wa mitumfyo, ni ciwila naco akuno cikalolela kweneko, nga icicenjela nu kucenjela. Umuntu wa mano ndi yamusunda, uwa mitumfyo ali kuno angasambilila.

¹² Leza, kacita wa vyaololoke lyonsi, akamanya vino antu aipe yakwelenganya. Aliwe akayapulumula nu kuyalovya.

¹³ Wiyo akafundika umu matwi lino alanda yakumulilila, nawe kwene kusi alamusakamala lino alapunda inkuta, ati, “Tutulwe!”

¹⁴ Umuntu umwi ndi cakuti watakusokela, mupele cimwi ca wila, umalola vino umwenzo wakwe uma myalala. Alino ni citonsya milandu cino watwala umu umfisolo kuli similandu muzo, naco cikafusya icipyu.

¹⁵ Lino paya ukulungika, antu asuma yakasansamuka, lelo aipe yene pasi pantete.

¹⁶ Wiyo asilonda kulondela inzila zya kuvwana, wene alapuuza mwi umba lya kuzimo.

¹⁷ Wiyo wino akalondelela amalila lyonsi, wene alasyala mu upina. Wiyo wino akalondelela ukukoleka nu kuipakizya atalaya mukama.

¹⁸ Antu aipe yakailetelela sile ucuzi aeneco, uwa kwene uno yakalonda ukuletelela antu asuma.

¹⁹ Cazipapo ukwikala wenga umu mapoli, ukuluta ukwikala nu mwanaci wa vyongo ni cipyu.

²⁰ Umuntu wamano akaikala mukuilyokezya icuma icivule, lelo iciwelewele cikaonona icuma consi cino cakwata.

²¹ Wiyo akalondelela ulungi nu luse, alazana umi nu ucindami.

²² Umuntu wamano akakwela ilinga umwaya ivita, aongolola ulupango luno vyataila mwenemo.

²³ Umuntu wino akasunga akanwa nu lulimi, asyaponela umu ntazi, awe.

²⁴ Umuntu akaitutumula, uwa mitumfyo, ni zina lyakwe a “Moopo.” Ivicitwa vyakwe ivya cilumba icikalamba.

²⁵ Ulunkumbwa lukakoma umukasu, pano iminwe yakwe ikakana ukuomba imilimo.

²⁶ Wiyo uwasula Leza, lyonsi akakumbwa. Umusuma wene akapeela, asiima foo.

²⁷ Yawe wapata impolelwa ya antu aipe, makamaka ndi yaipelela apamulandu umwi uwipe.

²⁸ Kambone waufi alalowelela. Lelo izwi lyakwe wiyo akaelela lilauvwika pee.

²⁹ Umuntu mwipe akaloleka wa muntu umukamuke. Lelo umuntu musuma wene akaika amano uku mipitile yakwe.

³⁰ Amano, ukwiluka kwa vintu, nanti ukupandwa amano, vii vyonsi ivya ciwelewele sile ndi cakuti visikulola kuli vino Yawe akalonda.

³¹ Umuntu angateyanya mfwalasi yakuya lwisizyako inkondo, lelo Yawe wenga mpo aliwe akapeela ucimvyo.