Mapinda 20 - Amazwi Yakwe Leza 2013

Leza alavunuka akailyokezya nga na alufyengo

¹ Waini akatumfya, nu wengwa ulume ukaleta ulwete. Na wiyo wensi akavilondelela, iciwelewele.

² Icipyu ca mwene caya wa cilulumo cakwe cisama, acino na wiyo uwala wacivulumula, ala wailetelela sile umweneco.

³ Ukuleuka ivikanza kukacindamika umuntu. Lelo umuntu wiyo wino atakwata amano, asyaisunga.

⁴ Umukasu asyalima apa nsita isuma. Acino apa insita ya uzombozi, ndi wene waya umu calo, pasi cino angazana.

⁵ Amapange amu mwenzo wa muntu yakoline wi tenga. Umuntu wa mano aliwe akatapa mwenemo.

⁶ Antu avule yakaitanka apa luse lwao. Uzye aweni angazana umuntu umufuma cumi?

⁷ Umulungami, wiyo akapita umu nzila ya ukaele, ana yakwe alamulondelela pacisila yalasyuka.

⁸ Umwene wino wikala pa cilimba ca upinguzi, akapasa uyi onsi ukufuma ku manso yakwe.

⁹ Aweni angavwanga ati, “Nemo nasunga umwenzo wane, nene muswepe, uwaula amaifyo?”

¹⁰ Ivipimo vyakupimila ukunyoma, ni vipimilo vyuze ivya ntumpu, vyonsi kwene Yawe wavipata.

¹¹ Nanti sile apa kucina kwene, umwance akatala alanga ndi cakuti ivicitwa vyakwe vilazipa nanti vilalondoloka.

¹² Amatwi akauvwa na manso akalola, vyonsi vyoili Yawe aliwe wavipanzile.

¹³ Utatemwa ukulala ilolo, pano limwi ungaponela umu upina, zyuka we muntu we, ngu kwate icakulya nu kwikuta.

¹⁴ Kakala akavwanga ati, “Icaciwelewele sile, citazifile.” Lyene ndi cakuti wafumapo, apita akuiwanzya.

¹⁵ Kwaya zaabu nu ukasi nyanya uwamutengo, lelo akanwa akakavwanga ivya mano, iciyembelo icitangapimwa nu mutengo uli onsi.

¹⁶ Umuntu uwalavile ukulipilila umwenyi impa, mupokini ivyakuzwala vyakwe. Lekini viye kamukole kuli cizelele.

¹⁷ Icakulya cino umuntu akalonkela uku lufyengo calyompa sana, lelo kwene apacisila akanwa kakwe kalazulamo insakalawe.

¹⁸ Uwatala upima amapange yako apa kuuzya yauze, utalwisya inkondo yako we mweneco, apa kutungululwa na mano yako.

¹⁹ Uwa lwambo akasapula inkama. Utapita nu wa ukwakwa.

²⁰ Wino uwatipwila isi nanti nyina, ulukozyo lwakwe lulazima pakafite nafititi.

²¹ Ivyuma ivikalonkwa zuwazuwa apa kutandika, visipolelelwa apakusyalikizya.

²² Utalanda ukuti ulalandula pa uyi uno yakucitila, uwataila sile muli Yawe, aliwe alakupususya.

²³ Yawe wapata antu yano yakaomvya inteko zya ucenjezi, ni nteko zya ucenjezi nazyo zisimuzanzya.

²⁴ Yawe aliwe umila umuntu inzila umwakupita. Uzye lyene umuntu umwi angamanya uli intunga ya umi wakwe?

²⁵ Uwatala uwelenganya ningo lino utacili ulaye ukupeela Leza uwila, pano limwi ungiza ulanguluke.

²⁶ Umwene wamano akaezya ukulondelezya wino wataluvyanya, alino amuvunuka ukwaula uluse

²⁷ Yawe watupile amano na kampingu, vivyo vino tutangafisa foo.

²⁸ Uluse ni cisinka ali yakalinda yamwene, ni cilimba cakwe calemeleziwa apa luse.

²⁹ Ululumbi lwa alumendo ali maka yao, ni mvwi cili ciyembelo ca antu akote.

³⁰ Impumo zya vilonda ali mulembo wa kupozya ui. Ivyumo vikapozya ukufika mukasi na nkasi ka muntu.