Mapinda 19 - Amazwi Yakwe Leza 2013

Umulanda wa cuvwilo, kambone waufi, umukasu na kaleta nzololo

¹ Umulanda uwa miyele isuma, wazipa ukuluta iciwelewele ca ndimi zili.

² Ukucincila ukwaula ukwelenganya kusi kusuma. Ukuzukuwa kukalenga ukupumbuka apa museo.

³ Ukutumpa kwa muntu kukamononela isyuko, icakuti umukasi ka mwenzo wakwe, asokela na Yawe.

⁴ Ukama ukavuzizya umuntu ivyuza, lelo umulanda wene akapokwa ni vyuza vyakwe.

⁵ Kambone waufi yatalamupanya, nu muntu uwantumpu nawe kwene atalapusuka foo.

⁶ Umuntu mukankala, antu aingi yakamulyombeka, nupya umuntu kapekape acuza wakwe yonsi.

⁷ Akazi ka muntu mulanda wene yonsi yakamupuuka, nga yacuza yakwe yene cilute, yakamuleuka. Nanti angayapapata uli yatange yamuvwe foo.

⁸ Wiyo akalonka amano wene waisakamala umweneco. Lelo wiyo akalondelezya amano, akazana ulongo.

⁹ Kambone waufi yatalamupanya umu cilye, nu muntu umutumpe nawe kwene atalapusuka foo.

¹⁰ Iviwelewele vitaya nu kwikala umu kuipakizya, nanti azya yatange yateeke asambazi!

¹¹ Amano ya muntu, ali yano yakamuteeka umwenzo, ukucindama kwakwe kwayelako umu kusuula imilandu.

¹² Icipyu ca mwene cakolana ni cilulumo cakwe cisama. Lelo uluse lwakwe lukoline nu lumi ukwi sote.

¹³ Umwana umonsi iciwelewele, izewanya lya mwana kuli isi. Umwanaci wa vikanza, nawe akoline ni mvula ya muneng'ene.

¹⁴ Upyanyi wa ng'anda ni vyuma ukalonkwa uku vikolwe, lelo Yawe sile aliwe angapeela umonsi umuci umufyeleke.

¹⁵ Ukasu ukalalikizya umuntu umutulo utukalamba, nga nu muntu umukasu alafwa uku nzala.

¹⁶ Wiyo akasunga amasunde yakwe Leza akasunga umi wakwe. Lelo wiyo akayasuula alafwa.

¹⁷ Wiyo akasakamala umulanda ala wakongwesya Yawe, nga nawe alamulipa ivisuma pali vino wacisile.

¹⁸ Kalipila umwanako lino acili umwance na mano yakwaluka. Ndi cakuti utacisile vivyo, ale lyene umaleka ayonone umweneco.

¹⁹ Umuntu walukang'ansi akailipilila apa uyi wakwe. Ndi cakuti wamwazwilizya, ala waicuzya sile, ulacita cico nalyuze.

²⁰ Uwauvwa kuli yano yakukupanda amano, pokelela amasunde yao, apakuti nawe kwene uku nkolelo ukakwate amano.

²¹ Amapange yavulisya umu mwenzo wa muntu, lelo amapange ya Mwene yene yakafikiliziwa.

²² Ica muzewanya uku umuntu ukuya umupunuke, cazipa ukuya umulanda ukuluta ukuya uwantumpu.

²³ Ukoopa Yawe kukatungululula uku uumi. Ali kuno ungikuta nu kupuza ningo ukwaula kuponelwa ni ciipe nanti cimwi.

²⁴ Umukasu akateela iminwe yakwe umu mbale, icimucuzya apakuifumya mwenemo nu kutwala apa kanwa!

²⁵ Uwa mitumfyo yalinzile yamume apakuti antu yano yatamanya umwalola amano, yasambililile kweneko. Kalipila umuntu wa mano apakuti ailuke, atezye.

²⁶ Suka sile wiyo uwaola amano, uwaula ni nsonyi, aliwe angapoka isi ivyuma nu kuzinga nyina apakwe.

²⁷ Mwanane, lino ulata sile ukuvwa uku masunde ya mano, lyene ale utalalengela ukusuula navino wamanya mpiti.

²⁸ Kambone uwasilesile, awiyo akasuula uku vyaulungi, umulomo wa antu aipe ukaipakizya uku vyalufyengo.

²⁹ Intuwa yapangilwa ukumila kweneko antu amitumfyo. Impumo nazyo zyateyanyiziwa amatundu ya viwelewele.