Mapinda 18 - Amazwi Yakwe Leza 2013

¹ Umuntu uwatemwa ukwikala wenga watemwa ukulondelela ivingamuzanzya umwisikulu. Ukumupanda amano, konsi ukumuletela icipyu.

² Iciwelewele cisilonda ukwelenganya, suka sile ukuzaila ivili umu mwenzo wakweco.

³ Uyi ndi cakuti wiza, ukaleta ukusuulwa, ni nsonyi nazyo zikaiza nu muzewanya.

⁴ Amazwi ya muntu itenga lya manzi, alino intulo ya malango uluzi uluzuule.

⁵ Cisi cisuma ukuvwangila umuntu mwipe, nanti ukufyenga uwakaele pakumuputwila umulandu.

⁶ Akanwa ka ciwelewele kakacisumba umu vikanza, na mazwi yakweco yakalenga ukuumwa.

⁷ Akanwa ka ciwelewele, ilovyo lyakwe. Imilimo yakwe, ulukoka lwa umi wakwe.

⁸ Amazwi ya ukwakwa yanunkila wakwe cimwi, yakamilika lwakasi, umunda ya muntu.

⁹ Umukasu apakuomba, amwina kamononye.

¹⁰ Izina lyakwe Yawe ulupungu ulukome. Umuntu akacita vyaololoke akautukilamo nu kucingililwa.

¹¹ Ivyuma vya mukama ilinga lyakwe ilikome ndi. Yakalilola ndi vino iciumba cimwi icitalimpisye.

¹² Ukuiwanzya umukasi ka mwenzo, ukukakolelela ukuponga. Ukuicefya ali kuno kukakolelela ucindami.

¹³ Umuntu wino akatolelela zuwa lino atatala uvwa, akalangizya sile uwelewele wakwe nu kuiletela insonyi.

¹⁴ Umulwale akulondesya umu mwenzo wakwe ukupola zuwa, nu mwenzo wakwe ukamupelesya amaka akulwisya ulwale wakwe. Lelo umulwale ndi cakuti watovoka awe lyene ala casila, catala nu kutala.

¹⁵ Umwenzo uno wiluka ukalundapo ukusambilila, ni kutwi lya mucenjele likalonda ukutailwa.

¹⁶ Uwila ukayulila kapeela inzila zyonsi, nu kumutwala pa mulola wa antu akama.

¹⁷ Uwakolela uku kuloolola yakati watalungika. Umuze nawe lino wiza nawe amukanya.

¹⁸ Ukupendola kukamala ivikanza. Kwene kukamala impanzela apakasi ka asambazi.

¹⁹ Uwazwilizye anyonko, nga nayo yalakucingilila wa musumba wi linga. Lelo ndi cakuti mwalemanila nayo, ale lyene yatalakuzengela umu mwao.

²⁰ Imivwangile ya muntu iikamulenga kuya wa mwikute. Vino akanwa kakwe kakamuwezezya, ivikamwikusya.

²¹ Imfwa nu umi vyaya umu maka ya lulimi. Umuntu wino akaluomvya ningo alalya vino lwene lulamukwilila.

²² Uwasyukila umuci wazana ulongo. Lelo Yawe aliwe wamukumbusuka.

²³ Umulanda akalanda ivyakupapata, nga umukama nawe akaasuka ivyakuzazuka.

²⁴ Yacuza yamwi yakatutwala ukwilovyo. Lelo yacuza yamwi yaluta nu kulemana kwa lupwa.