Mapinda 17 - Amazwi Yakwe Leza 2013

¹ Ukulalilila iciika icume ku matwi cele, kwazipapo ukuluta ing'anda umuli ivinone, lelo muli ivikanza.

² Umuzya uwa mano wazipapo ukuluta iciwelewele ca mwana, cino cikakana ivyuma vya upyanyi ivya ng'anda pamwi na auze.

³ Siluva akaengululwa umu cikopo, zaabu nawe umwi lungu. Lelo Yawe aliwe akaezya imyenzo.

⁴ Umwipe akakutika uku milomo ya mufulo. Uwaufi nawe akateya ikutwi uku lulimi ulukaonona.

⁵ Akaseka umulanda, akasinkola uwa muumvile. Akasansamukila apisyamo, alavunukwa.

⁶ Icilongwe ca yakote, ana ya ana yao. Ucindami wa ana, aisi.

⁷ Imivwangile ya uwelewele, itazipila iciwelewele foo. Fwandi pasi pa uyi uku ntunguluzi!

⁸ Akapeela amafukakanwa yakamuombela wi we lya mutengo, konsi kuno waya, umusyuke.

⁹ Akasuula uku viipe ala wakomya icitemwiko. Lelo wiyo akaiusya pamulandu, ala watanya yacuza.

¹⁰ Umuntu wamano akauvwa uku kukalipilwa ukuluta uku ciwelewele cino yuma inguma umwanda.

¹¹ Umuntu mwipe akaelenganya sile ivya utalami. Icaleka yakamutumila inkombe iyakuya mukalipila.

¹² Ukukomenkanya icilyanyi icaticipokwa utwana, kwazipapo ukuluta uku komenkanya iciwelewele umu uwelewele wakweco.

¹³ Akawezezya uyi apa visuma, atalatala atalusye isyamo apang'anda yakwe.

¹⁴ Ukutandika ukuloolola umulandu ali kuleta mulamba. Fwandi, lesya ukuloolola lino kutacili kwatampa.

¹⁵ Ukupeela uwa mulandu insambu nu kupeela uwakaele umulandu, ali vintu viili vino Yawe wapata umu musango uli umwi kwene.

¹⁶ Impiya umu minwe ya ciwelewele, izya cani? Uzye angakalilamo amano wiyo atakwata umwenzo wa mano.

¹⁷ Cuza, umukundwe insita ili yonsi. Uwina nao uwacani fwandi ndi cakuti asi wakuculila pamwi?

¹⁸ Iciwelewele ca muntu cikaisumba sile iceneco conga umukulipilila umuze umulandu.

¹⁹ Uwatemwa ukulemanila, watemwa nu kwifya. Uwa mazwi ya cilumba akalonda uononesi.

²⁰ Umwenzo utalame usilola isyuko, nu lulimi lwa ufi lukaponela umwi syamo.

²¹ Uwavyala umwana umutumpe waya nu ulanda. Isi wa ciwelewele asilola insansa.

²² Umwenzo wa nsansa umulembo usuma sana. Umwenzo utitikiziwe ukaumya amafupa.

²³ Umwipe akapoka amafukakanwa, afisa umwilaya lyakwe, ali pakunyonganika upinguzi.

²⁴ Umuntu mucenjele akasumba amano kuli cino alinzile ukucita. Lelo iciwelewele cene cikacita ivyacicitecite.

²⁵ Umwana iciwelewele, isakamika kuli isi, nga nu kunyongotosya nyina uku mwenzo.

²⁶ Ukulifya uwakaele, ulufyengo, nga nu kuuma umuntu umucindami, caipisya ukuluta.

²⁷ Akasunga ululimi lwakwe wacenjela wakwe cimwi. Umwiluke akateeka umwenzo.

²⁸ Iciwelewele ndi caya kututu, yangati icamano. Ndi cakuti casunga akanwa, yangacitunganya ukucenjela.