Mapinda 16 - Amazwi Yakwe Leza 2013

¹ Umwenzo wa muntu ukapanga amapange, lelo upinguzi waya kuli Yawe.

² Inzila zyonsi izya muntu, umweneco akazilola wa zisuma, lelo kapima wa myenzo a Yawe.

³ Peela umulimo wako kuli Yawe, alino lyene na mapange yako yalafikiliziwa.

⁴ Icintu consi kwaya cino Yawe waciumbile. Nu muntu mwipe kwene wamuumbile uku wanda wi syamo.

⁵ Yawe wapata umwenzo wacilumba, tutangatwisika palwa kupeziwa kwakwe.

⁶ Uluse ni cumi vikalipila apa maifyo. Ukoopa Yawe kukafuntusya uku uyi.

⁷ Mikalile ya muntu ndi yazanzya Yawe, ala na anisi yakwe kwene yalamutemwa.

⁸ Ukukwata ivinono nu ulungami, kwazipa ukuluta ukulonka ivingi nu lufyengo.

⁹ Umwenzo wa muntu ukateyanya inzila yakwe. Lelo Yawe aliwe akakomya intampulo zyakwe.

¹⁰ Akanwa ka mwene kakasema, lelo kasiponga pakupingula.

¹¹ Yawe akalonda ukuti ivipimilo vyakupimilako vyaya ivilungame, nu mu uculuzi kwene monsi, akalonda mutaya ulufyengo.

¹² Yamwene yapata ukakasi, pano ulungami auno ukakomya ivilimba vyao.

¹³ Yamwene yakazangila akanwa ka muntu musuma. Nupya yene yatemwa umufuma cumi.

¹⁴ Icipyu ca mwene cikasowela imfwa. Lelo uwamano angacimyalalika.

¹⁵ Ukuyengesa kwa usyu wa mwene kukapeela uumi, nu luse lwakwe lwaya wi kumbi lya mvula umu cilala.

¹⁶ Ukukwata malango kwazipa ukuluta zaabu, nu kucenjela kwacindama ukuluta siluva.

¹⁷ Inzila ya antu asuma, ikafuntuka uku uyi, nu muntu uwalola kuno akuya, ala wasunga umi wakwe.

¹⁸ Icilumba icikakolelela uononesi, ukuitutumula umu mwenzo, ukukakolelela ukuongoloka.

¹⁹ Ukuicefya apa antu alanda ukusuma ukuluta ukwankana ivyuma ivisampwe na antu ya vilumba.

²⁰ Wiyo akasakamala ukuvwa isunde, alazana isyuko. Na wiyo uwataila umu mwene wapolelelwa.

²¹ Uwakwata umwenzo wa mano, akaamwa umwiluke. Imivwangile ya ufuke, ikaazwa umu kusambilizya.

²² Amano yampomvu ali ntulo ya umi kuli yano yayasyukila. Uwelewele wa mbulwamano, ali kupeziwa kwao.

²³ Umwenzo wa muntu uwa mano ukamulenga ukucenjela umu mivwangile yakwe, nupya ukaazwa na kanwa kakwe ukusambilizya.

²⁴ Amazwi ya mutembo yakoline wi lela lya uci, nupya yalyompa umu kanwa, yazipila nu mwili.

²⁵ Kwaya inzila ino yamwi yakaelenganya ukuti isuma, lelo pakusyalikizya ikatwala ku mfwa.

²⁶ Ulusala lwa muomvi ulukamuombela, ni nzala ali ino ikamucincizya.

²⁷ Iciwelewele ca muntu ali cino cikatukula amasyamo, nga apakanwa kakwe pazuula tupu umoto ukaoca.

²⁸ Umuntu mwipe akatovya ulwete, nu walwambo akatanya yacuza.

²⁹ Uwaluzazwe akaponzya umuze, nu kumutungulula uku nzila iipe.

³⁰ Akazyatika ivipa akaelenganya ivisi vilungamane. Akasyetamika imilomo, awiyo uwatacita iciipe.

³¹ Ukumela imvwi icilongwe cimwi icaucindami, cino cikazanwa umu nzila zya ulungami.

³² Asisoka zuwa wazipapo ukuluta kavulumula wa mpanzela. Akaitonsya umweneco waluta akapokolola imisumba.

³³ Apakumanya vino Leza akulonda, antu yakapendola utumawe, tuno yasimapepo yakazwala apa cifuwa. Lelo wino akaputula imilandu, umweneco Umwene Leza.