Mapinda 15 - Amazwi Yakwe Leza 2013

¹ Ukwasuka luse luse kukamala icipyu, lelo akasa kakakatusya ukali.

² Amazwi ya antu ya mano yakapa amano, lelo pa kanwa ka ciwelewele pakafomfomola uwelewele.

³ Amanso yakwe Yawe yaya mpanga yonsi, yakalola aipe nga na asuma kwene.

⁴ Amazwi amutembo yali wa muti uno ukapeela umi, lelo amazwi aukali yakacisa umwenzo.

⁵ Iciwelewele cikasuula ukusunda kwakwe isi, lelo wiyo akafukila ukukalipilwa ali wino wacenjela.

⁶ Umuntu wino akacita vyaololoke akasunga ivyuma ivivule, lelo ivikalonka umuntu mwipe vikaleta amasakamiko.

⁷ Imilomo ya muntu wa mano ikasansanta ukumanya, lelo umwenzo waciwelewele wene usicita vivyo.

⁸ Yawe wapata uwila wa muntu mwipe, lelo ipepo lya antu asuma likamuzanzya.

⁹ Yawe wapata imiyele ya antu aipe, lelo wene watemwa yayo akacita vyaololoke.

¹⁰ Umuntu wino wapumbuka umu nzila isuma alavunukwa wakwe cimwi. Wiyo uwapata ukulungikwa alafwa.

¹¹ Kuzimo ni ciwina vyaya apa manso yakwe Yawe. Uzye lyene antu yangamufisa uli ivili mu myenzo yao?

¹² Uwa mitumfyo asisakamala ukulungikwa, nupya wene asiuzya ku antu ya mano.

¹³ Umwenzo wa luzango ukailanga sile uweneco umu kuloleka, lelo umwenzo wa ulanda ukatembola.

¹⁴ Umwenzo wa mano ukalondelezya ukumanya, lelo akanwa kaciwelewele kakailyokezya ivya uwelewele.

¹⁵ Amanda ya muntu umucuzi yonsi kwene yakaya aipe. Lelo umwenzo wa luzango ukailyokezya insita zyonsi.

¹⁶ Icisuma ukukwata ivyuma vinono pamwi nu koopa Yawe, ukuluta ukuya umukama nu kuzanwa umu ntazi.

¹⁷ Imbale ya musalu pamwi ni citemwiko, yazipapo ukuluta ing'ombe yamanona nu lupatopo.

¹⁸ Umuntu uwa cipyu akakatusya ulwete, na asisoka zuwa akamyalalika ivikanza.

¹⁹ Inzila ya mukasu yasapilizya imyunga, lelo inzila ya mulungami ikoline wa museo ukalamba.

²⁰ Umwana wa mano akasansamusya isi, lelo iciwelewele cikasuula nyina.

²¹ Uwelewele ukasansamusya iciwila, lelo umuntu wamano wene akalungama umu nzila yakwe.

²² Ukutaya ukupanziwa amano amapange yasifikiliziwa. Lelo ukwavula yampandamano kwene yakafikiliziwa.

²³ Ukwasuka ningo kukasansamusya umuntu, nu kulanda amazwi asuma kwazipa.

²⁴ Umuntu mucenjele akasololapo inzila ya umi ino ikatwala apa nkolelo, ali kukana ponela umu mfwa.

²⁵ Yawe akaongolola ing'anda ya muntu uwa vilumba, lelo wene akaimika umupaka wakwe mukamfwilwa.

²⁶ Yawe wapata amapange aipe. Lelo amazwi ya luse yataya namulandu foo.

²⁷ Umuntu wino akakumbwa ivyuma vya lufyengo akaletelela sile ing'anda yakwe, lelo wino wapata amafukakanwa alakwata uumi.

²⁸ Yawe akafuntuka uku antu aipe, lelo akauvwa ukulenga kwa asuma.

²⁹ Umwenzo wa muntu mulungami ukaelenganya ukucita ivisuma. Akanwa ka ntalanganyi kene kakalanda ivyaukakasi.

³⁰ Ilinso lya luse likasansamusya umwenzo. Ilandwe lisuma nalyo likakomya amafupa.

³¹ Ikutwi ilikauvwa uku mazwi akusunda yano yakapeela uumi, likasyukila icifulo umukasi kakwe yao amano.

³² Wiyo akasuula amasunde, ala waisuula umweneco. Lelo umuntu akauvwa kuli yano yakumukalipila, akaloonka amalango.

³³ Ukoopa Yawe ali kusambilila vyamano. Ukuicefya ali kukolelela ukulola umucinzi.