Mapinda 14 - Amazwi Yakwe Leza 2013

¹ Umwanaci wa mano akakuula ing'anda yakwe, lelo umutumpe wene akaipasa uku vicitwa vyakwe.

² Yayo akapita umu ulungami yakazangila Yawe, lelo atumpe yene yakamusosya nu kumuzewanya.

³ Imvwango zya uwelewele zikaipalamikila intuwa api tundu kuti yatimbulepo ningo, lelo amazwi ya muntu wa mano yene yakamucingilila uku vyumo.

⁴ Ukuulilwa ing'ombe icili cimwi nu kuulilwa ivintu vyonsi, lelo ndu kweti yacipambasi, ivintu vyonsi vikavulilako.

⁵ Kambone wacisinka akalanda icumi lyonsi kwene, lelo kambone waufi wene akatumpoka monsi muno akulondela.

⁶ Katumfya wa yauze angalondelezya amano ukwaula kuyazana, lelo umuntu mufuke wene akalooka ivintu visuma muli zuwazuwa.

⁷ Utaezya ukupalama uku ciwelewele, pano utanga zanako amano yampomvu.

⁸ Amano ya muntu musalapuke yasintilila apa kumanya inzila ya malango, lelo iviwelewele vyene vikatumpokwa pamulandu wa vicitwa vyakwevyo.

⁹ Iviwelewele vyene visielenganyako nu kuzenzuka ku maifyo yaviko, lelo ukulonda kusuma konsi kwaya sile na antu ya mano.

¹⁰ Umwenzo ukaimanyila onga ivikucuzya, nupya patangaya nanti wenga angamanya ndi watiuzanga.

¹¹ Ing'anda ya muntu mwipe ikapasika, lelo itaalu lya mulungami lyene lilayelelela pe.

¹² Kwaya inzila imwi ino ikaloleka ngi isuma ku muntu, lelo impela yakweyo imfwa.

¹³ Nanti umuntu angezya ukuseka uli, ala umwenzo wene uziile amalanda na miiku. Nga lyene impela ya nsansa zizyo amalanda ya pe.

¹⁴ Umuntu wino atafumaluka wene alapokelela icilambu cakwe ukulingana ni milimo yakwe kwene.

¹⁵ Umuntu iciwelewele wene akataila muli vyonsi kwene, lelo uwa mano wene akawaka imipitile yakwe.

¹⁶ Umuntu wa mano akaopa Yawe nu kufuntuka uku uyi, lelo iciwelewele cene cazenzemba nupya caitazyela.

¹⁷ Umuntu wa cipyu akacita ivya uwelewele, lelo wino akatala aelenganya akateeka umwenzo.

¹⁸ Imbutuma zikapelwa iviine nu welewele waziko, acenjele yene yakapelwa amaka akumanya.

¹⁹ Aipe yakakontamila asuma, lelo intalanganyi zyene zikakontamila pa milyango yakwe yayo akacita vyaololoke.

²⁰ Umulanda akapatikwa na kuli wino yapalamana kwene, lelo umukama wene wakwata yacuza avule.

²¹ Wiyo uwasuula umuze ala waifya, lelo umuntu wino akaelela alanda uluse wasyuka.

²² Uzye ukupanga ukucita iviipe asi ali kupumbuka? Lelo yao akapanga ukucita ivisuma, akalola uluse ni cumi.

²³ Ukuombesya kukawezezya umuzano pee, lelo ukupuma ivimalyasi vyasilesile kukaleeta upina.

²⁴ Antu ya mano yakalambulwa icuma, lelo iviwelewele vikamanyikwa ku uwelewele wakwevyo.

²⁵ Kambone wa cisinka akapususya uumi, lelo wiyo akatumpoka asi kambone wacumi.

²⁶ Ukoopa Yawe kukakomya utailo, nga na ana yakwe yakazina munoli.

²⁷ Ukoopa Yawe ili ntendekelo ya umi, ino ikalenga ukupambata iviteyo vya mfwa.

²⁸ Ucindami wa mwene wimilila pa wingi wa antu yakwe. Lelo ukucepelwa kwa antu ukukawisya kateeka.

²⁹ Wiyo akateeka umwenzo wakwata amano aingi. Lelo akapamviwa, wene iciwelewele wakwe cimwi.

³⁰ Umwenzo utambalale uli umi wa mwili. Uzuwa wene uli ulwale ukalya amafupa.

³¹ Ukucuzya umulanda kukalanga sile imisuula kuli wiyo uwa muumvile. Lelo ukucitila umulanda uluse kuli kucindika uwa muumvile.

³² Umuntu mwipe uyi wakwe uli uno ukamuwisya, lelo wiyo akacita vyaololoke wene akazina mu vicitwa vyakwe ivisuma.

³³ Amano yakaikala mu mwenzo ucenjele. Lelo iviwelewele vitamanya cimwi ica mano.

³⁴ Usuma ukakuzya umutundu, lelo uyi wene ukazewanya antu ali yonsi.

³⁵ Umwene akazangila mu muomvi wakwe, lelo wene akavunuka yayo akaleta insonyi.