Mapinda 13 - Amazwi Yakwe Leza 2013

¹ Umwana wa mano akasumbako amano lino isi akumulungika, lelo uwacilumba wene asiuvwila lino yakumusunda.

² Umuntu musuma akazangila mu miyele isuma, lelo iciwelewele cikaloota sile ulwete.

³ Yayo akazilizya utunwa twao yakaisungila uumi, lelo yacuma maingwe yene yakayonona aeneco.

⁴ Umuntu umukasu akakumbwa ivya yauze ukwaula ukuvilola, lelo umuntu akaombesya wene akalonka.

⁵ Uwatemwa Leza wapata ufi, lelo ivicitwa vyakwe kaifya ivyawinyi ni nsonyi.

⁶ Wololoke ukacingilila wiyo akaulondesya, lelo iifyo likaponya onsi akalilondelela.

⁷ Umuntu umwi akaitunga ukuya umukama lino atakweti nanti acimwi. Muze nawe akaitunga ukuya umupina, lelo ala akweti ni mitumba ya vyuma.

⁸ Icuma ca mukama icikamutuula uku uzanzo uno ukamuponela, lelo umupina wene atakwata ni cakumusakamika.

⁹ Antu aololoke yakoline wa luswepo ulukayengesa wakwe cimwi, lelo antu aipe yali wa nyali zino zikazimantukila.

¹⁰ Icilumba cakwe yayo asisakamala ivya yauze cikakatusya ulwete, lelo wiyo akauvwila malango ku antu yauze yakacefya icongo.

¹¹ Ulonsi wakuvukuta wa muwa ukazimantukila panono panono apakusila, lelo ulonsi uno umuntu akaculila pa kuuzana wene ukalunduluka umukuya manda.

¹² Icintu cakulolelela ndi cakana ukufikiliziwa cene cikawavya umwenzo, lelo icintu cakulondelezya ndi cafikiliziwa caya wa muti uno ukapeela umi.

¹³ Yayo akasuula ukusundwa yakailetelela, lelo akawaka malango yakapoka icilambu.

¹⁴ Usambilizyo wa antu ya mano waya ngi nsembo ya manzi ya umi, yakaazwa antu kuti yatawila umu citeyo ca mfwa.

¹⁵ Uwamano asuma akatemwikwa na antu avule, lelo wiyo atatailwa wene kunoli kusi cuze, suka sile uononesi.

¹⁶ Uwamano akacita vyonsi umu kucenjela, lelo iciwelewele cikalangizya uwelewele wakweco apaswe.

¹⁷ Intumi yaufi ikaocesya umuzi, lelo intumi yakutailwa ikaleta umutende.

¹⁸ Upina wene waya ukuzewana kuli yayo akatalamila malango, lelo umuntu wino akafuukila amasunde akacindamikwa.

¹⁹ Cino umuntu akalondesya ndi wacizana, cikazanzya umwenzo. Lelo ukuta iviipe kwaya kwati icintu ca winyi uku ciwelewele.

²⁰ Akapita nu wa mano nawe kwene alakwata amano, lelo ndi mwapita na akapweeka, ala nawe kwene ulapweeka.

²¹ Iciipe consi cikalondela uwatacicita, lelo yayo akacita ivyaololoke yalapeelwa ivisuma.

²² Umuntu uwa mano akasiila ana icaupyanyi, lelo icuma ca muntu mwipe cikasungilwa yayo akacita ivyaololoke.

²³ Mungaya uzombozi usuma sana umu calo ca mupina, lelo vyonsi vilaliwa na ntu aunkalwe.

²⁴ Wensi asifulula umwanakwe ala wamupata, lelo uwatemwa umwanakwe asilengela kumusunda.

²⁵ Umuntu musuma asiulilwa ivyakulya ivikumanile, lelo umunda ya muntu mwipe mukayenza cee uku nzala.