Mapinda 10 - Amazwi Yakwe Leza 2013

Amapinda yakwe Solomoni

¹ Amapinda yakwe Solomoni: Umwana wa mano akazanzya isi, lelo umwana iciwelewele wene waya izewanya kuli nyina.

² Icuma cakulonkela umu ucenjenzi cisituula, lelo uololoke wene ukatuula ukufuma ku mfwa.

³ Yawe atalazumilizya antu akamoopa kuti yazewana uku nzala, lelo ivilondwa vya muntu mwipe vyene asivifima kunoli.

⁴ Iminwe ya ukasu ikatwala umuntu ku upina, lelo amakasa yakanzuke yakalonsya umuntu.

⁵ Umwana uwatemwa ukuzombola pa nsita ya mwela ali mwana wa mano, lelo wiyo uwatemwa kulala mu nsita ya uzombozi wene akaleta ukupupana.

⁶ Upolelelo ukaya pa muntu uwatemwa ukuzanzya Leza, lelo pa mulomo wa muntu mwipe pakafisa ulwete.

⁷ Umuntu musuma auze yalamwiusya wa upolelelo, lelo umuntu mwipe alililika zuwa.

⁸ Umuntu wamano akawaka amasunde, lelo mpundililwa wene alalowa.

⁹ Umuntu uwakwata icumi asipita mu uzanzo. Lelo wiyo akapita umu nzila ziipe wene alamanyikwa.

¹⁰ Umuntu uwatemwa uku kapaya manso yakwe akaleta intazi, lelo wiyo akanenola auze apaswe akaleta umutende.

¹¹ Amazwi ya muntu akacita vyaololoke akafukoka ka umi, lelo amazwi ya muntu mwipe yakafisa ulwete.

¹² Ulupato lukakatusya ivikanza, lelo ulukundo lukaleta ukwelelwa kwa maifyo yonsi.

¹³ Antu alamoke yakavwanga vya mano, lelo antu atumpe yalinzile ukutimbulwa pa matundu.

¹⁴ Antu yamano yakalonka mano, lelo ukuvwangikisya kwa ciwelewele kukaleta uononesi.

¹⁵ Icuma ca mukama uli ucingo wakwe, lelo upina wa yalanda uli ononesi wao.

¹⁶ Umi ali malipilo ya antu akacita vyaololoke, lelo uzombozi wa antu aipe ukayavuzizya maifyo.

¹⁷ Umuntu akauvwila wiyo akumusunda akapita umu nzila ya umi, lelo wiyo akakana ukulungikwa wene akaponzya auze.

¹⁸ Umuntu akafisa ulupato lwakwe uwantumpu, lelo uwa lwambo wene iciwelewele.

¹⁹ Ukuvuzya kwa mazwi, musiulwa ukuluvyanya, lelo umuntu wensi akasunda kalomo wene uwamano.

²⁰ Amazwi ya muntu wino akacita ivisuma, yaya wakwe siluva umusuma cuze, lelo amelengwe aipe yene yaya asilesile.

²¹ Amazwi ya muntu musuma yakasambilizya antu avule, lelo iviwelewele vyene vikafwa pamulandu wakuulilwa amano.

²² Upolelelo wakwe Yawe uli uno ukalenga umuntu aye umukama, ni milimo yakwe ikome isiungilizyapo nanti conga.

²³ Iciwelewele cene cikazangila mu kuluvyanya, lelo uku muntu akauvwikisya ningo ivintu akazangila mu mano.

²⁴ Antu akacita vyaololoke yakakwata vino yakulonda, lelo antu aipe yalakwata ivikayaletela intete wakwe cimwi.

²⁵ Icipuupu cikakatuka, nga na antu aipe yakaululwa, lelo yayo akacita vyaololoke yene yakaikalilila umuyayaya.

²⁶ Ndi vino waini musasalume akauvwika umukanwa, avino ivyunsi vikauvwika umu manso, nupya ali vino umuntu mukasu waya kuli yano yakumutuma.

²⁷ Ukoopa Yawe kukalundulula uumi, lelo amanda ya antu aipe yakaipimpala.

²⁸ Upaalilo wa antu atailwe ukavuzya uluzango, lelo upaalilo wa antu aipe ukasilila pa mbiliwili.

²⁹ Yawe ali linga lya kuzinamo yayo akacita vyaololoke, lelo wene akaonona yayo akacita iviipe.

³⁰ Umuntu wino akacita vyaololoke atangafumiziwa pa cifulo cakwe, lelo umuntu mwipe wene atalikalisya pano nsi.

³¹ Pa mulomo wa muntu akacita vyaoloke pakafuma ivya mano, lelo ululimi lwa kalandi lulaputulwa.

³² Antu akacita vyaololoke yakamanya vino yalinzile ukwasuka, lelo antu aipe yene yakavwanga ivintu ivitalinzile kuvwanga.