Malango 9 - Amazwi Yakwe Leza 2013

Antu yakana ukuyela

¹ “Uvwini kuno, mwe ina Izlaeli! Ilelo muli pipi nu kulamba Luzi lwa Yodani nu kupoka impanga umwikala antu amu nko nupya izya maka ukuluta mwemwe. Imisumba yao iikulu, nupya yakwata amalinga atali kufika nu mupela umwiyulu.

² Antu aya mwenemo yakwata amaka nupya ivipombolo. Yayo ali ina Anaki. Mumanyile ivya pali aliyo nupya muvwa kuno vyalandwa ukuti kusi nanti wenga angalwisya aina Anaki.

³ Lelo ilelo mumasininkizya ukuti Yawe Leza winu aliwe akamukolelela wa cimbilimbili ca moto icikaonona. Wene ali nu kuyacimvya cakuti mulayazinga nu kuyonona pyu zuwazuwa, wakwe vino wene walavile.

⁴ “Pacisila lino Yawe Leza winu watayazinga mu mpanga pa manso inu, mutaca mwezye kulanda mu myenzo inu ukuti Yawe wamuleta kuno kuti mupoke impanga ii iye iyakwinu pamulandu wakuti mukacita ivyawololoke. Awe, asi vivyo. Lelo a pamulandu wa ukakasi wa antu amu nko zino Yawe akuzinga pa manso inu.

⁵ Asi pamulandu wakuti mwemo mukacita ivyawololoke nanti kuya ni miyele isuma icingalenga kuti mwemo muyapoke impanga. Lelo pamulandu wa ukakasi wa antu amu nko zii, Yawe Leza winu alayazinga mu mpanga ilya pa manso inu, kuti afikilizye cino walavile ku vikolwe vinu, Abulaamu, na Isaki na Yakobo.

⁶ Lyene, manyini ukuti asi pamulandu wakuti mwemo mukacita ivyawololoke acino Yawe Leza winu akumupeela impanga ii ivunde kuti iye iyakwinu. Awe, mwemwe antu akome myenzo.

⁷ “Mwaiusya cii nupya mutaca mwilile vino mwalenzile Yawe Leza winu ukusoka mu lwanga. Ukufuma sile pa wanda uno mwafumile mu Eguputo kufika na pa wanda uno mwafisile kuno mwemo mwasangukila Yawe.

⁸ Nu ku Mwamba wa Holebu kwene mwemo mwakatwisye ukali wakwe Yawe cakuti asoka mpaka cilingana nu konona mwemwe.

⁹ Lino nakwezile ku mwamba ku kupokelela vipampa vya mawe ivya upangano uno Yawe wacita namwe, ali lino natenzi pa mwamba amanda amakumi yani, usiku nu musanya. Ntalile icakulya nanti kumwa amanzi.

¹⁰ Yawe wampeezile vipampa viili vya mawe pano umwisikulu walemvile nu munwe wakwe. Pa vipampa vivyo pali masunde yonsi yano Yawe wamunenyile pa mwamba ala akuvwanga ukufuma mu moto, pa wanda uno mwakongine kuku ku mwamba.

¹¹ Endi, pacisila ca manda yalya amakumi yani, usiku nu musanya, ali lino Yawe wampeezile vipampa vivya viili ivya mawe, vipampa vya upangano.

¹² “Lyene alino Yawe wanenyile ati, ‘Tentemuka ukufuma pano likwene, pamulandu wakuti antu yano wafumizye mu Eguputo yatiyiifya. Yene yatiyafutatila zuwazuwa ilamulo lino nayapeezile nga yatiyaipangila akaluwi.’

¹³ “Nga Yawe avwanga kunondi ati, ‘Natimanya vino antu yaa yakoma myenzo.

¹⁴ Utezya kundesya, pakuti lyene ningayonona kuti kutaya umwi uwakuiusya pano pansi nupya. Nga lyene wemo ndakucita ukuya uluko lukulu ulwa maka nu kuleka kuti musande ukuyaluta.’

¹⁵ “Acino nasenwike nu kutentemuka umwamba lino ucili pa moto, nga ni vipampa vya mawe ala vili mu makasa yane.

¹⁶ Lyene lino nalolekisye, naweni ukuti mwatimwifya kuli Yawe Leza winu. Mwemo mwaipangile akaluwi mu musango wakwe cipambasi. Mwafutatile zuwazuwa ilamulo lino Yawe wamupeezile.

¹⁷ Acino natoozile vipampa vya mawe vivya viili nu kuvisumba, imvitamola ale mukulola.

¹⁸ “Lyene nupya kwene impona pansi ala mfupime pa manso yakwe Yawe pa manda amakumi yani, musanya nu usiku. Ntalile cakulya nanti kumwa amanzi, pamulandu wi ifyo lino mwemo mwacisile, apakucita inkota pa manso yakwe Yawe nu kumulenga kusoka.

¹⁹ Nemo nakweti intete zya pa ukali ukulu wakwe Yawe, pamulandu wakuti wene wasosile kulingana nu konona mwemwe. Lelo nupya kwene Yawe uvwile kupapata kwane.

²⁰ Nupya Yawe wasokile Aaloni kulingana nu kumukoma, lelo Aaloni nawe kwene namupepelile pa nsita ilya.

²¹ Natoozile ni cintu cicya iciipe, unkolanya wa mwana wa ng'ombe wino mwapanzile ni cela, nga imoca mu moto. Alino lyene imuvungola nu kumusyuta mpaka aya ulukungu nga nsumba lukungu lulo mu kaluzi akapongolokanga kwisika lya mwamba.

²² “Nupya mwalenzile kuti Yawe asoke lino mwali ku Tabela, nu ku Masaa, nga nu ku Kibuloti Hataava.

²³ Nga lino Yawe wamutumile ukufuma pa Kadesyi Banea, wene wamupeezile ilamulo kuti mukatuke mutumbele ku kupoka impanga ino wamupeela iye iyakwinu. Lelo mwemo mwasangukila ilamulo lyakwe Yawe Leza winu. Mwemo mutamutaile nanti kumuyela.

²⁴ Mwemo mwasangukila Yawe ukufuma sile lino namanyile mwemwe.

²⁵ “Nemo naponyile pansi ala mfupime pa manso yakwe Yawe pa manda yalya amakumi yani, musanya nu usiku, pamulandu wakuti namanyile ukuti wene wavwanzile vino ali nu konona mwemwe.

²⁶ Nga nani napefile inti, ‘Iye, we Yawe Simwandalali, utezya wonone antu yako, antu yako kololo yano wakulwile nu kuyafumya mu Eguputo ku ulamba na maka yako akulu.

²⁷ Iusya aomvi yako, Abulaamu, na Isaki, na Yakobo, nga nupya utasumba amano ku kutalama, nu ku ukakasi nga ni iifyo lya antu yaa.

²⁸ Pano limwi, antu amu mpanga ino mwatufumizyeko yangavwanga ukuti pamulandu wakuti wemo waposiwe kutwala antu yaa mu mpanga ino wayalavile, na pamulandu wakuti wemo wayapata, acino wayafumizye uyaleta mu lwanga kuti uyakome.

²⁹ Lelo yene antu yako, akwako kololo yano wafumizye mu Eguputo ku maka yako akulu nu ulamba.’