Malango 7 - Amazwi Yakwe Leza 2013

Antu yakwe Yawe apatuulwe

¹ “Yawe Leza winu alamutwala mu mpanga ino mulapoka nu kwikala mwenemo, nga wene alazinga mwenemo inko zivule. Lino mukuya pa nkolelo, wene alazinga mwenemo inko cinimbali izikulu nupya izya maka ukuluta mwemwe. Inko zii izya ina Hiti, na ina Giligasi, na ina Amoli, na ina Kenani, na ina Pelizi na ina Hivi, nga na ina Yebusi.

² Lino Yawe Leza winu wapeela antu yaa mu makasa inu nga namwe mwayacimvya, lyene mulinzile kukoma yonsi kwene. Mutaezya ukucita cipangano nayo nanti ukuya na mizu kunoyali.

³ Mutakezye ukutwalana nayo. Mutaca muleke ana inu yakatwalile nanti ukutwalilwa kunoyali,

⁴ pamulandu wakuti yene yangalenga ana inu yafutatile Yawe nu kupepa tuleza tuze. Ndi cakuti cico cacitika, ale lyene Yawe alamusokela nu konona mwemwe lilyo kwene.

⁵ Acino muce momolole utuvuwa twao, mutamole viumbili vya mawe, nu kuputola incesi zyakwe Asyela, kaleza kanaci, nga nu koca utuluwi twao tonsi.

⁶ Mulinzile ukucita vii, pamulandu wakuti mwemwe yakwe Yawe Leza winu. Wene wamusolwile ukufuma mu antu yonsi pano nsi kuti muye antu yakwe aiyele.

⁷ “Yawe atamutemilwe nu kumusolola pamulandu wakuti mwavulisye ukuluta antu yauze asyala. Mwemo mwali uluko lucepesye ku wingi pa antu yonsi pano nsi.

⁸ Lelo Yawe wamutemilwe nupya walondesyanga ukufikilizya ulayo wakwe uno wene wacisile ku vikolwe vinu. Uli mulandu uno wene wamutuuzile ku maka yakwe akulu nu kulenga kuti muye antungwa ku uzya kuli Falao umwene waku Eguputo.

⁹ Mwaiusya ukuti Yawe Leza winu aliwe ali Leza wenga sile nga nu kuti wene uwakutailwa. Wene alawaka upangano wakwe nu kulanga ukutemwa kwakwe ukwa pe ku antu amu mikulo izimbi yano yamutemwa nupya yakayela amalamulo yakwe.

¹⁰ Lelo atalasitoka ku kuvunuka yao amupata.

¹¹ Ali cino fwandi mwalondela vyonsi vino mwasundwa. Mulinzile kuyela amasunde yonsi yano natimupeela

Cuvwilo cikalenga ukupolelelwa

¹² “Ndi mwasumba amano ku masunde yaa nu kutekela ukuyalondela, ale lyene Yawe Leza winu alatwalilila ukuwaka upangano wakwe uno wacisile namwe nupya alamutemwa nu kutemwa kwakwe ukwa pe, wakwe vino walavile ivikolwe vinu.

¹³ Wene alamutemwa nu kumupolelela, cakuti mulasandana mukakwate na ana avulisye. Wene alapolelela ana inu, ni vilimwa vyamu vyalo vinu pakuti mukakwate imbezu, waini, na mafuta ya miolivi. Nga alamupolelela pa kumupeela ing'ombe ni mfwele izivule. Wene alamupeela upolelelo uu onsi mu mpanga ino walavile ivikolwe vinu ukuti ali nu kumupeela.

¹⁴ Impanga yonsi pano yapela, kutalaya alakwata upolelelo ukankala ngu winu. Kutalaya umonsi nanti umwanaci wenga panomuli wino atalakwata umwana nanti iviteekwa vinu vino vitalakwata ana.

¹⁵ Yawe alamucingilila ku ndwala zyonsi. Wene atalamuletela indwala izyakoofya izili zyonsi wakwe zino mwailolile mu Eguputo, lelo wene alazileta pa anisi inu yonsi.

¹⁶ Muce monone antu ya nko zyonsi yano Yawe alapeela mu makasa inu. Mutakezye ukuyuvwila uluse, nanti ukupepa tuleza twao, pano lyene mungailetelela sile.

¹⁷ “Mutakezye ukuvwanga ukuti antu yaa avule ku mpendwa ukutuluta nu kuti mutangayazinga mu mpanga ilya.

¹⁸ Mutakezye ukuyoopa. Mwiusye vino Yawe wacisile kuli Falao nu ku antu yakwe yonsi.

¹⁹ Mwiusye ivilumbelo iviipisye vino mwailolile na manso inu, pamwi ni vinjelengwe ni vizungusyo, nga na maka akulu nu ulamba uno Yawe waomvizye apakuleka kuti muye antungwa. Mu musango uli onga uno wene wononyile aina Eguputo, avino ali nu konona antu yaa yonsi yano mwemo mukoopa pali ndakai.

²⁰ Nupya Yawe Leza winu alayaponyezya ingofyo nga nu konona yao alutuka ku kufisama.

²¹ Acino mutaca mwaoopa antu yaa. Yawe Leza winu ali namwe. Wene a Leza wa maka wino antu yalinzile ukoopa.

²² Yawe Leza winu alazinga antu amu nko zizi panono panono lino mwemo mukuya pa nkolelo. Mutalaya na maka aku yonona lilyo kwene, pasi pano ndi caya vivyo, ale lyene ivilyanyi vyamu mpanga vilasanda viye uzanzo kunomuli.

²³ Lelo Yawe alika anisi inu mu makasa inu nu kuyoofya mpaka yasuke yononwe.

²⁴ Wene alika yamwene yao mu makasa inu. Namwe mulayakoma, nga antu yalayilila. Kusi umwi alamulesyanya ukucita cico. Mwemo mulonona yonsi pyu.

²⁵ Mulinzile ukoca utuluwi twao. Mutaca mwezye kukumbwa nanti ukusenda siluva nanti zaabu wino yakoweka utuluwi tuto. Ndi mwaca mwacita vivyo, ale lyene mungailetelela sile, pamulandu wakuti Yawe wapata ukupepa utuluwi.

²⁶ Mutaca mwezye ukuleta akaluwi nanti konga mu mang'anda inu, pano limwi intipu izili pano yali zingaya panomuli. Mulinzile kupata nu kusausya utuluwi tuu, pamulandu wakuti Yawe watutipwila.