Malango 5 - Amazwi Yakwe Leza 2013

Amasunde Ikumi

¹ Mose aama aina Izlaeli yonsi nga ayanena ati, “Mwe ina Izlaeli, si angala muvwe amasunde yonsi yano nemo namamupeela ilelo. Muyasambilile nu kuyayela.

² Yawe Leza witu wapangine upangano naswe pa Mwamba wa Holebu.

³ Wene atapangine upangano uwo ni vikolwe vitu sile, lelo naswe kwene kumwi swemuno tucili apuma ilelo.

⁴ Kuku kwene pa mwamba ali pano Yawe wavwanzile kunomuli pa manso inu ntontonto ukufuma mu moto.

⁵ Pa nsita ilya, ali lino nemo nimilile apakasi kinu na Yawe kuti imunene vino wene wavwanzile, pamulandu wakuti mwemo mutakwezile pa mwamba pano mutukanga umoto. “Yawe wavwanzile ati,

⁶ ‘Nene indi Yawe Leza winu, wino walenzile kuti mufume mu mpanga ya Eguputo, kuko kuno mwali azya.

⁷ “ ‘Mutapepa tuleza tuze suka nene nenga.

⁸ “ ‘Mutaipangila tuluwi mu unkolanya wa cintu icili consi ca mwiyulu nanti camu nsi nanti camu manzi pansi ya musili.

⁹ Mutafukamila unkolanya wakwe tuleza nanti kutupepa. Pano ne Yawe Leza winu, nsizumilizya kuti mwapepa tuleza tuze, nupya nkavunuka ana pa maifyo yakwe yaisi, kufika ku nkulo yalenga citatu na yakwe cini, zyakwe yao ampata.

¹⁰ Lelo nkalanga kutemwa ku nkulo mazimbi zino zyantemwa nu kuyela amasunde yane.

¹¹ “‘Utalumbula izina lyakwe Yawe Leza wako mu mwata wipe. Pano Nene, Ne Yawe Leza wako, ndavunuka ali wensi akalumbula izina lyane mu mwata wipe.

¹² “‘Wawaka uwanda wi Sabata nu kuusunga nu muzilo, wakwe vino ne Yawe Leza wako wakupeela ilamulo.

¹³ Mu manda mutanda waomba imilimo yako yonsi.

¹⁴ Lelo uwanda uwalenga cinimbali wene i Sabata kuli ne Yawe Leza wako. Utaomba umulimo mu wanda uu, wewe nanti ana yako aonsi nanti anaci, nanti aomvi yako aonsi nanti anaci, nanti a masaye wako, nanti a punda wako, nanti iciteekwa cako icili consi, nanti umwenyi wino akaikala mu mikalo yako, pakuti umuomvi wako umonsi nu mwanaci kwene apuze, ndi vino wemo ukapuza.

¹⁵ Uwiusye ukuti watazile uya umuzya mu mpanga ya Eguputo, nu kuti Yawe Leza wako wakufumizye mwenemo ku maka yakwe ataikulila ni kasa lyakwe livunguluke. Caleka Yawe Leza wako watakupeela ilamulo kuti wacindika uwanda wi Sabata.

¹⁶ “‘Cindika so na nyoko wakwe vino Yawe Leza wako wakupeela ilamulo kuti amanda ya umi wako yavule nu kuti vyonsi vikuzipile mu mpanga ino Yawe Leza wako akukupeela.

¹⁷ “‘Utakoma.

¹⁸ “‘Utalongozya.

¹⁹ “‘Utaiya.

²⁰ “‘Utatumpwila umuzo.

²¹ “‘Utakumbwa umuci wa muzo. Utakumbwa ng'anda nanti mpanga ya muzo, nanti umuomvi wakwe umonsi, nanti umuomvi wakwe umwanaci, masaye wakwe nanti punda wakwe, nanti icili consi cino wakwata.’

²² “Yao ali masunde yano Yawe wamupeezile lino mwakongine mwensi pa mwamba. Lino wene wavwanzile ni zwi likalamba ukufuma mu moto nu mwi kumbi litifi, wene wapeezile amasunde yaa nga kusi nayauze. Alino lyene wayalemvile pa vipampa viili vya mawe nga ampeela.

Antu yazakaza ku ntete

²³ “Lino muvwile izwi ukufuma mu mfinzi, ala na pa mwamba ponsi pakulunkuma umoto, ali lino intunguluzi zya mitundu inu pamwi na makombe yapalime kunondi

²⁴ nga yavwanga yati, ‘Yawe Leza witu watalanga ukulu nu lulumbi lwakwe kunotuli, umwi izwi lino twatituvwa ukufuma mu cimbilimbili ca moto. Ilelo twatitulola ukuti umuntu angaya nu umi nanti angala Leza wavwanga nawe.

²⁵ Ale lyene pacani cino tungafwila? Umoto uu uwakoofya umatulovya, nga ndi tuvwa nupya izwi lyakwe Yawe Leza witu, ale tumafwa.

²⁶ Uzye kwatala kwaya umuntu umwi uwatala uvwa izwi lyakwe Leza wa umi akuvwanga ukufuma mu moto, nga pacisila atwalilila ukuya umupuma?

²⁷ Wewe kwene Mose, swilila ukauvwa vyonsi vino Yawe Leza witu akulanda. Alino lyene wize utunene vyonsi vino amakunena. Naswe twiza kuvwa nu kuyela.’

²⁸ “Yawe nawe uvwile amazwi yonsi yano mwavwanzile kunondi. Ali pa kunena ati, ‘Natinuvwa amazwi yonsi yano antu yaa yakunenyile. Vyonsi vino yatiyalanda vili sile ningo.

²⁹ Endi, si cizipe imyenzo yao avino iye iyakoopa nene nu kusunga amasunde yane yonsi insita zyonsi, pakuti vyonsi viyazipile kumwi na ana yao amanda pe!

³⁰ Yanga, kayanene yaswilile ku mataalu yao.

³¹ Lelo wemo, Mose, wize usyale nani pakuti nkupeele amalamulo, ni vyeo nga na masunde yonsi yano ulinzile kusambilizya antu, pakuti yace yayayela mu mpanga ino nkuyapeela kuti iye iyakwao.’

³² “Acino fwandi mwe ina Izlaeli cenjelini nu kucita vino Yawe Leza winu wamupeela ilamulo kuti mucite. Mutakezye ukukana yela isunde lyakwe ilili lyonsi.

³³ Mwayela amasunde yonsi yakwe Yawe Leza winu ndi vino wamupeezile ilamulo, pakuti muye nu umi nupya mukwate ulongo nga mwikale amanda avule mu mpanga ino mulapoka nu kwikala mwenemo.