Malango 4 - Amazwi Yakwe Leza 2013

Mose wakonkomezya aina Izlaeli ukuyela Yawe

¹ Lyene Mose anena antu ati, “Mwayela amasunde yonsi yano nkumusunda ilelo, nga lyene mulapoka impanga nu kwikala mwenemo iyo ino Yawe, Leza wa vikolwe vinu, akupeela kunomuli.

² Mutakezye ukulunda penepo nanti ukufumya penepo cimwi pa malamulo yano natimupeela. Mwayela amalamulo yakwe Yawe Leza winu yano natimupeela.

³ Mweisikulu mwailolile na manso inu vino Yawe wacisile pa Mwamba wa Peoli. Wene wononyile umuntu wensi uwapepanga Baali kuku,

⁴ lelo mwemuno mwali acumi kuli Yawe Leza winu mucili nu umi apilelo.

⁵ “Anene namusambilizya amasunde yonsi, wakwe vino Yawe Leza wane wanenyile ukucita. Muce mwayayela mu mpanga ino mwasya musawange apakuipoka nu kwikala mwenemo.

⁶ Muce mwayela amasunde ningo, lyene cico cilalanga antu amu nko zyuze ukuti mwemwe yamano nupya mwamanyikisya ivintu. Lino yacayuvwa amasunde yaa yonsi, yalazakaza nu kulanda yati, ‘Cumi kwene uluko luu ulukulu lwakwata amano ni cuvwilo!’

⁷ “Kusi umutundu uze nanti onga, nanti ungakula uli, uno wakwata Leza wao mu pipi wakwe vino Yawe Leza witu waya kunotuli. Wene akatwasuka lyonsi lino twamulaizya.

⁸ Kusi umutundu uze nanti onga, nanti ungakula uli, uno wakwata amasunde aulungami wakwe yao yano natimusambilizya apilelo.

⁹ Ali cino fwandi cenjelini! Nupya lino mucili nu umi, mutakezye ukwilila vintu vino mweisikulu mwailolela na manso inu. Muce mwanena ku yana yinu na izikulu inu

¹⁰ ukuyanena ivya pa wanda uno mwemo mwimilile pa manso yakwe Yawe Leza winu apisika ya Mwamba wa Holebu, lino wene wavwanzile kunondi ati, ‘Konganika antu. Nkulonda kuti yuvwe vino namayanena, pakuti yasambilile ku nkwatila icoopo nu kuncindika mu manda yonsi yano yalikala mu mpanga na pakuti yasambilizye ana yao ukucita icili conga kwene.’

¹¹ “Muce mwanena ana inu vino mwaile imwimilila umwisika lya mwamba uno wavimbilikiziwe na makumbi ya cunsi icafisizye na fititi. Alino ni cimbilimbili ca moto icalunkumanga ukufika nu mwiyulu.

¹² Muce mwayanena na vino Yawe wavwanganga kunomuli ukufuma mu moto, na vino mwamuvwile akuvwanga lelo mutamuweni mu musango uli onsi.

¹³ Wene wamunenyile vino mulinzile ukucita apakusunga upangano uno wene wacisile namwe, ukuyela Amasunde Ikumi, yano walemvile pa vipampa vya mawe viili.

¹⁴ Pa nsita ilya Yawe umwisikulu ali wino wankonkomizye kuti imusambilizye amasunde yonsi yano mulinzile kuyela mu mpanga ino mwasya musawange pa kuipoka nu kwikala mwenemo.

Ukusokwa pa kuntapepa utuluwi

¹⁵ “Lino Yawe walandanga kunomuli ukufuma mu moto pa Mwamba wa Holebu, mwemo mutaweni icata ca musango uli onsi.

¹⁶ Pakuti cimuzipile mwemwe, musininkizye ukuti mutakezye ukwifya pa kuipangila akaluwi mu musango uli onsi, akakukolanya ku monsi nanti ku mwanaci,

¹⁷ nanti ku nyama nanti ku cunyi,

¹⁸ nanti ku visela nanti ku nswi.

¹⁹ Mutakezye ukutunkwa ukupepa nu kutumikila vino mukalola umwiyulu, ivili wi lanzi, umwezi, ni ntanda. Yawe Leza winu wapeela vii ku antu yauze yonsi kuti yavipepa.

²⁰ Lelo mwemo, Yawe wamutozile amufumya mu mpanga ya Eguputo, muno mwali kwati umwi lungu lya moto. Aliwe wamufumizye pakuti mungaya antu yakwe kololo, wakwe vino muli apilelo.

²¹ Yawe wansokela nene pamulandu wakwe mwemwe, nga alapapo nu mulapo ukuti nemo ntalalamba Luzi lwa Yodani nu kwingila mu mpanga ivunde ino wene akupeela kunomuli.

²² Nemo ndafwila kuno kwene. Ntalalamba Luzi lwa Yodani. Lelo mwemo mwasya mulambe nu kupoka impanga iya ivunde nga mwikale mwenemo.

²³ Ali cino fwandi cenjelini! Mutailila upangano wakwe Yawe Leza winu uno wacisile namwe. Mwayela ilamulo lyakwe ilyakuti mutakezye ukuipangila akaluwi mu musango wa cintu icili consi cino wene wamulesya,

²⁴ pamulandu wakuti Yawe Leza winu akoline wa cimbilimbili ca moto. Wene asizumilizya kupepa tuleza tuze.

²⁵ “Nalyo kwene ndi mwaca mwikala mu mpanga ilya mwalengela mwenemo, mwavyala ana nu kukwata aizikulu, mutakezye ukupanga akaluwi mu musango uli onsi. Cintu cico iciipe pa manso yakwe Yawe, nupya cilamulenga ukusoka.

²⁶ Nemo naama amu mayulu na apano pansi ukuya yakambone akumusinila ilelo ukuti, ndi mwakana ukuyela nene, ale lyene mulalowa zuwazuwa pa mpanga ilya. Mutalalengela ukwikala mu mpanga ilya iya ku mbalama ya Luzi lwa Yodani, ino mwasya mupoke nu kwikala mwenemo. Mulononwa pyu.

²⁷ Yawe alamusalanganyizizya mu nko zyuze, kuko kuno yanono sile amunomuli yalapusuka.

²⁸ Kuku kwene akuno mulatumikila tuleza utwapangwa na antu, tuleza utwapangwa ku miti na mawe, tuno tutangalola nanti ukuvwa, tuno tutangalya nanti ukununsya.

²⁹ Kuku kwene ali kuno mulatandika nu kulonda Yawe Leza winu, nga ndi cakuti mwaca mwamulonda ni myenzo inu yonsi nu umi winu onsi, lyene mulamuzana.

³⁰ Lino mulaya mu ucuzi nga na lino ivintu vii vyonsi vilamucitikila, lyene ali lino mulaseleukila kuli Yawe Leza winu nu kumuyela.

³¹ Pasi pano Yawe Leza winu a Leza uwa mizu. Wene atalamutazyela nanti ukumonona, nupya atalilila upangano uno umwisikulu wacisile ni vikolwe vinu.

³² “Muzye nu kulondelezya ivyampiti, pa nsita ino walanga mutacili muvyalwe, ku katalili lino Yawe waumvile antu pano nsi. Muzye nu kulondelezya mu nsi yonsi. Uzye kwatala kwacitika icintu cimwi wakwe cii? Uzye umwi watala uvwa icili consi ica musango uu?

³³ Uzye kwatala kwaya antu yamwi acili apuma yano yatala yuvwa kuno Yawe wavwangila mu moto, wakwe vino mwemo muvwile?

³⁴ Uzye kwatala kwaya kaleza kamwi kano katala kezya ukufumya antu mu luko luze nu kuyacita antu yakako kololo, wakwe vino Yawe Leza winu wacitile mwemwe ku mpanga ya Eguputo? Mwailolile na manso inu ntontonto vino wene waomvizye amaka yakwe akulu nu ulamba. Wene waponyizye impungo ni nkondo, wacisile ivinjelengwe ni vizungusyo, nu kuleka kuti ivintu ivyakoofya vicitike.

³⁵ Yawe wamulanzile ivintu vii vyonsi pakuti mumanye ukuti wene ali Leza wenga mpo nu kuti kutaya namuze foo.

³⁶ Wene walesile kuti muvwe izwi lyakwe ukufuma ukwiyulu pakuti angamusunda. Alino pano nsi napo walesile kuti mulole umoto wakwe uwamuzilo, imuvwa nakuno akumuvwanzya mwenemo.

³⁷ Pamulandu wakuti watemilwe ivikolwe vinu, wene wamusolwile, nga mu maka yakwe akulu amufumya mu mpanga ya Eguputo.

³⁸ Na lino mwayanga pa nkolelo, wene wazinzile imitundu ikulu nupya iya maka ukuluta mwemwe, pakuti amwingizye mu mpanga kwene ilya, impanga ino icili iyakwinu.

³⁹ Acino fwandi apilelo iusyini nupya mutakezye ukwilila ukuti Yawe ali Leza umwiyulu na pano nsi. Kutaya Leza namuze foo.

⁴⁰ Mwayela amasunde yakwe yano namupeela apilelo, nga ivintu vyonsi vilamuzipila mwemwe na amu mupanda winu. Mulatwalilila ukwikala mu mpanga ino Yawe Leza winu akumupeela kuti iye iyakwinu pee.”

Misumba iyakuzina mwenemo iyaya ku ufumondaka wa Luzi lwa Yodani

⁴¹ Lyene Mose apaatula imisumba itatu iyaya ku ufumondaka wa Luzi lwa Yodani,

⁴² kuko kuno umuntu ali wensi uwasya wakoma umuntu muze ukusi ku mufulo angapuukila aye ulumi. Wene angapuukila ku musumba onga pa misumba ii nga lyene atanga akomwe.

⁴³ Amu mutundu wakwe Lubeni yayapile umusumba wa Bezeli, lwaku lwanga lutambalale lwa pa myamba. Amu mutundu wakwe Gadi yayapile umusumba wa Lamoti, uno waya mu mpanga ya Gileadi. Nga amu mupanda wakwe Manase yayapile umusumba wa Golani, mu mpanga ya ina Basyani.

Amazwi aulondolozi pakupeela amasunde yakwe Leza

⁴⁴ Mose wapeezile aina Izlaeli amasunde na masambilizyo yakwe Leza.

⁴⁵ Yakwene ali malamulo, ni vyeo nga na masunde yano Mose wapeezile aina Izlaeli lino yafumile mu mpanga ya Eguputo,

⁴⁶ lino yali mu cifoloma lwaku uwondaka wa Luzi lwa Yodani, pipi nu musumba wa Beti Peoli. Mwali mu mpanga yakwe Siooni umwene wa ina Amoli, wino uwateekanga mu musumba wa Hesyiboni. Mose pamwi na Ina Izlaeli yamucimvizye lino yafumile mu mpanga ya Eguputo.

⁴⁷ Yene yapokolwile nu kwikala mu mpanga yakwe na yakwe Ogi umwene waku Basyani, wino wali umwene muze uwa ina Amoli uwikalanga lwaku ufumondaka wa Luzi lwa Yodani.

⁴⁸ Impanga kwene ii yatandikile pa musumba wa Aloeli, uno waya pa cituntu ca Luzi lwa Alinoni, ukufika nu ku Mwamba wa Siyoni (kuli kuti Mwamba wa Helimoni),

⁴⁹ ukuminkanya ni mpanga yonsi iyaya lwaku ufumondaka wa Luzi lwa Yodani, ukufika na lwaku kaeya kuli Yemba wa Musilya nga nu ku uwondaka mu mutentemuko wa Mwamba wa Pisiga.