Malango 34 - Amazwi Yakwe Leza 2013

Mose wafwa

¹ Mose afuma ku manyika aku Moabu aya akwela Mwamba wa Nebo, alemela ukufika papela ya Mwamba wa Pisiga lwaku ufumondaka wa musumba wa Yeliko. Kuku kwene akuno Yawe amulangilila impanga yonsi kutandikila impanga ya Gileadi ukufika sile na lwaku katutu ku musumba wa Dani.

² Alino ni mpanga sile yonsi iya Nafutali, iya ina Efulemu ni ya ina Manase, iya ina Yuda ukufika sile na lwaku uwondaka kuli Yemba wa Adiliya.

³ Ukwikapo ni mpanga ino yaya ku kaeya ka mpanga ya Yuda, nga ni nyika iyatandikila ku Zoali ukufika nu ku Yeliko, umusumba wa vikambalala.

⁴ Alino Yawe anena Mose ati, “Ikwene ili mpanga ino nalavile Abulaamu, Isaki, na Yakobo ukuti ndaipela ku amu mupanda wao. Natindeka kuti uilolekesye, lelo ntalakuzumilizya ukwingila mwenemo.”

⁵ Acino Mose umuomvi wakwe Yawe ali pa kufwila mumu kwene mu mpanga yaku Moabu, wakwe muno Yawe wavwanzile.

⁶ Yawe nawe amuzika mu mukonko mu mpanga ya Moabu, ukulungatana nu musumba wa Beti Peoli. Lelo ukufika na pilelo kutaya nanti wenga uwamanya ningo apaya ilindi lyakwe.

⁷ Mose wali ni myaka umwanda onga na makumi yaili lino wafwile, ala lilyo acili na maka, nu kulola ala acili akulola ningo.

⁸ Aina Izlaeli yamulosizye amanda amakumi yatatu mu manyika aku Moabu.

⁹ Lino amanda ya kulosya Mose yasizile, Yoswa umwana umonsi wakwe Nuni azuziwa nu mupasi wa mano pamulandu wakuti walanga Mose wamwikile amakasa yakwe panoli. Acino aina Izlaeli iyamuvwila nu kuyela amalamulo yano Yawe wayapeezile ukupitila muli Mose.

¹⁰ Ukutandikila sile lili kwene, kutatala kwaya kasema mu mpanga ya Izlaeli angalingana na Mose, wiyo wino walandanga kunoli pa manso ntontonto.

¹¹ Kutatala kwaya kasema mu Izlaeli uwatala wacita ivinjelengwe ni vizungusyo wakwe vivyo vino Yawe watumile Mose kuti acite kuli Falao na kuli yamusika yakwe avita, nga nu ku mpanga yonsi iya ina Eguputo.

¹² Fwandi kutatala kwaya kasema nanti wenga uwatala aloleka nu kucita ivintu ivyakoofya wakwe vino Mose wacisile pa manso ya ina Izlaeli yonsi.