Malango 33 - Amazwi Yakwe Leza 2013

Mose wapolelela imitundu ya ina Izlaeli

¹ Kuu, kuli kupolelela kuno Mose, umuntu wakwe Leza wapolelile aina Izlaeli lino atacili afwe.

² Yawe watentemwike ukufuma pa Mwamba wa Sinai, wakatwike wa kutunka kwi lanzi pa mpanga ya Seili nu kuyengesela pa antu yakwe ukufuma pa Mwamba wa Palani. Wene wali pamwi na angeli amazimbi ikumi, ali wa nsase zya moto ukwi kasa lyakwe lilunji.

³ Yawe watemwa antu yakwe nupya akacingilila akwakwe Acino twafukama pa ngazo zyakwe nu kuyela amasunde yakwe.

⁴ Swemo tukayela amasunde yano Mose watupeezile, yano yaya icuma icikankala ica luko lwitu.

⁵ Yawe wizile aya umwene wa antu yakwe aina Izlaeli lino imitundu yao kumwi ni ntunguluzi zyao zyakongine pamwi.

⁶ Nga pa mutundu wakwe Lubeni Mose wavwanzile ati, “Si leka Lubeni atafwa, nanti angala antu yao yatavuzile.”

⁷ Nga pa mutundu wakwe Yuda wavwanzile ati, “We Yawe, si uvwa ukukuta kwao ukwakulenga uwazwilizyo, Leka yalemane pamwi ni mitundu yuze. Uwayalwisizya ulwi, we Yawe, Nu kuyazwilizya ukucimvya anisi yao. Umutundu wakwe Yuda ulailwisizya uwisikulu, na Yawe alawazwilizya ukucimvya anisi yakweo.”

⁸ Apa mutundu wakwe Levi napo wavwanzile ati, “We Yawe, sokolola ukulonda kwako ukupitila umukuomvya Ulimu na Tumimu Ukupitila mu ina Levi, aomvi yako acumi. Wemo wayezizye ku Masaa. Nu ku Meliba wayapimile kuti ulole ndi yene acumi.

⁹ Yene yalanzile ucumi wao kunuli Ukuluta vino yalanzile ku akwasi, nu ku ina yao, nanti nu ku ana yao. Yene yayezile amalamulo yako Nupya yali acumi ku upangano wako.

¹⁰ Yene yakasambilizya antu yako ukuyela amalamulo yako. Yene yalapeela amawila yakoca yonsi pa kavuwa kako.

¹¹ We Yawe, si leka umutundu wao ukomeleke. Si leka imilimo yao ino yakuomba yakuzanzya. Vungola anisi yao. Utaleka yace yakatuke nupya.”

¹² Apa mutundu wakwe Benjamini wavwanzile ati, “Uu, uli mutundu uno Yawe watemwa nu kuucingilila. Uwanda onsi akaulinda, Nupya wene akaikala pakasi kao.”

¹³ Apa mutundu wakwe Yosefu wene wavwanzile ati, “Si Yawe apolelele impanga yao aipeele imvula Nga na manzi ukufuma pansi ya musili.

¹⁴ Si leka impanga yao ipolelelwe ku viseekwa ivikakula nu kucela ku kasanya, Ikwatisye iviseekwa visuma wakwe cimwi mu nsita yaviko.

¹⁵ Si leka iviseekwa visuma wakwe cimwi vitambalizye pa myamba yao iyampiti.

¹⁶ Si leka impanga yao izulemo ivintu vyonsi visuma, Ipolelelwe nu usuma wakwe Yawe, Wino uwavwanzile ukufuma mu cimpuza ica moto. Si leka upolelelo uu onsi upongolwelwe pa mutundu wakwe Yosefu, Pamulandu wakuti wene wali intunguluzi pa ina yakwe.

¹⁷ Yosefu waya ni vimaka vyakwe cipambasi wa ng'ombe, wa mpembe zya mbo. Impembe zyakwe zikoline wa ana yakwe Manase amazimbi na mazimbi. Nupya wa antu yakwe Efulemu amazimbi na mazimbi. Ali mpembe zino akatunkwila antu ya mitundu Nu kuya vwintila ku mpelelekezyo ya nsi.”

¹⁸ Apa mutundu wakwe Zebuluni na wakwe Isakali wavwanzile ati, “Si leka aina Zebuluni yaye nu longo mu uculuzi wao uwa pali yemba, Ni cuma cakwe Isakali calukusanda umwakwe.

¹⁹ Yene yalaama ainamasi ukwiza ku mwamba wao Nu kupeela impolelwa zya mpomvu kuku. Yene yakafumya icuma cao muli yemba Nu mu lusenga lwamu nkumba yakwe yemba.”

²⁰ Apa mutundu wakwe Gadi wavwanzile ati, “Lumbanyini Leza, wino uwavungulwile impanga yao. Aina Gadi yakateyamila wakwe cisama Apakunyunsula ikasa nanti umutwe.

²¹ Yene yasolwile impanga isuma wakwe cimwi. Yatengilwe impanga yakupeela ku ntunguluzi. Yene yayezile amalamulo na masunde yakwe Yawe Lino intunguluzi zya ina Izlaeli zyakongine pamwi.”

²² Apa mutundu wakwe Dani wavwanzile ati, “Dani akoline wa mwana wakwe cisama. Wene akavwantuka ukufuma mu mpanga ya ina Basyani.”

²³ Apa mutundu wakwe Nafutali wavwanzile ati, “Nafutali wapolelelwa cuze nu kukumbusuka kwakwe Yawe. Impanga yao yatandikila kuli Yemba wa Galile ukuyafika na lwaku kaeya.”

²⁴ Apa mutundu wakwe Asyeli wavwanzile ati, “Asyeli wapolelelwa ukuluta imitundu yuze. Si leka aina yakwe yamutemwisya ukuluta pa yauze, Nga ni mpanga yakwe iye ikama ya miti ya miolivi.

²⁵ Si leka imisumba yakwe ice ikwate ucingililo wa mpongolo zya vyela, Nupya ace aikala ulumi insita zyonsi.”

²⁶ Ala Mwe ina Izlaeli, mwe, kutaya Leza nanti wenga uwakolana na Leza winu, wino akapita mu lulumbi acilinganya iyulu, ala akupuzinkanya mu makumbi ku kwiza azwilizya mwemwe.

²⁷ Leza aliwe waya akacingilila winu mu nsita zyonsi. Akamufukatila ningo mu makasa yakwe. Wene wazinganga anisi inu lino mwemo mukuya pa nkolelo, nga amunena ukuti muyonone yonsi pyu.

²⁸ Acino amu mupanda wakwe Yakobo yakaikala mu mutende, yikala zii mu mpanga muno ingano na waini vyavulisya cuze, mumo muno tuswelelele ukufuma umwiyulu tukatonya pa musili.

²⁹ Icumi mwe ina Izlaeli, mwemwe alongo! Kutatala kwaya yamwi akoline namwe, uluko luno Yawe watuula. Yawe umwisikulu ali cisyangu nu lupanga lwinu, ulwakumucingilila nu kumupeela ucimvyo. Anisi inu yaliza kunomuli nu kupapata kuti muyalolele uluse, lelo mwemo mulayalyatola pansi.