Malango 30 - Amazwi Yakwe Leza 2013

Ulongo lwaya na yayo aweluluka kuli Yawe

¹ Nupya Mose atwalilila nu kunena aina Izlaeli ati, “Nemo natimuleka kuti muisolwele mweisikulu upolelelo nanti intipu. Ivintu vyonsi vivyo lino vilamuponela pa nsita ino mulaikala pakasi ka mitundu yuze muno Yawe alamusalanganyizizya, ali lino lyene mulaiusya vino nkulanda.

² Ndi cakuti mwemwe pamwi na amu mupanda winu mulaweluluka kuli Yawe nu kuyela ni myenzo inu yonsi nu umi winu onsi amalamulo yano nkumupeela ilelo,

³ ale lyene Yawe alaya na mizu panomuli. Alamuwezya nupya ukufuma ku nko kuno wamusalanganyizizye nu kumupeela ulongo.

⁴ Nanti cingaya ukuti mwasalanganila ukutali cuze, nako kwene aliza amukonkole nu kumukolonganika pamwi nupya.

⁵ Wene alamuwezya ku mpanga iyali ya vikolwe vinu nu kumupeela kuti iye iyakwinu. Nupya alamupeela ulongo ulwakuti mukasande ukuluta ni vikolwe vinu.

⁶ Nga alino Yawe Leza winu alapeela kunomuli nu ku amu mupanda winu imyenzo iyacuvwilo, pakuti mwamutemwa ni myenzo inu yonsi nu umi winu onsi. Lyene mulikalilila mu mpanga iya manda pe.

⁷ Yawe Leza winu alaponyezya intipu zii zyonsi pa anisi inu yano yamupata nupya yano yakamuzunya.

⁸ Lyene ali lino mulayela Yawe nu kulondela amalamulo yakwe yonsi yano nkumupeela ilelo.

⁹ Yawe alamupeela ulongo mu milimo inu yonsi. Mulakwata ana avule ni viteekwa vivule, nga mu vyalo vinu mulaya uzombozi ukulu cuze. Yawe umwisikulu alaitemelwa kumupeela upolelelo wakwe vino wapeezile ivikolwe vinu.

¹⁰ Lelo icikalamba sile icikulondekwa cakuti mulinzile mwayela malamulo yakwe yonsi nu kulondela vipope vyakwe vino vyalembwa mu Lupapulo luu lwa masunde. Mulinzile ukuweluluka kunoli ni myenzo inu yonsi nu umi winu onsi.

¹¹ “Ilamulo lino nkumupeela ilelo litatazile sana cakuti mungaposiwa ukulilondela nupya lisi kutali namwe.

¹² Lyene lisi umupela umwiyulu cakuti mungalanda muti, ‘Uzye aweni amakwela kuti akatuletele pano pansi kuti tulyuvwe nu kuliyela?’

¹³ Nupya lisi ku mbalama yuze yakwe yemba cakuti mungalanda muti, ‘Uzye aweni amalamba yemba kuti akatuletele, kuti tulyuvwe nu kuliyela?’

¹⁴ “Awe! Ala lyene lili pakwene pipi namwe. Mwalimanya nupya mungalyeleuzya, caleka mulinzile kuliyela.

¹⁵ “Lolini! Ilelo namwikila umi nu longo, imfwa nu uwononesi.

¹⁶ Ndi mwayela amalamulo yakwe Yawe Leza winu yano nkumupeela ilelo, nupya ndi mwamutemwa, nu kumuyela, nu kulondela malamulo yakwe yonsi, ale lyene mulapelwa ulongo nupya mulaya uluko lwa antu avule. Yawe Leza winu alamupolelela mu mpanga ino muli pipi nu kupoka kuti iye iyakwinu.

¹⁷ Lelo kwene ndi cakuti imyenzo inu yumalala mwakana nu kuyela, nupya ndi cakuti mwakoopelwa ku kupepa tuleza tuze,

¹⁸ nkumunena ukuti mulalowa pyu. Mutalikala amanda avule mu mpanga ino mwasya mwingile mwenemo iyaku mbalama yuze ya luzi Yodani ku kuya ipoka kuti iye iyakwinu.

¹⁹ Ndakai inamupeela cakuti musolole mweisikulu, pakasi ka umi ni imfwa, pakasi ka upolelelo wakwe Leza ni ntipu yakwe Leza, nupya naama amu mayulu na pano pansi ukuya yakambone yane. Acino sololini umi.

²⁰ Muce mwatemwa Yawe Leza winu, mwamuyela nu kuya akutailwa kunoli, nga nawe alaleka mwemwe na amu mupanda winu mwikale amanda avule mu mpanga ino walavile ukupeela ivikolwe vinu, Abulaamu, Isaki, na Yakobo.”