Malango 3 - Amazwi Yakwe Leza 2013

Aina Izlaeli yacimvya umwene Ogi

¹ “Icalondelile penepo cakuti twalungime lyene ku katutu ulunga nu ku Basyani, nga Ogi umwene waku Basyani pamwi ni vita vyakwe vyonsi yiiza iyatulwisya pipi nu musumba wa Edilei.

² Lelo Yawe anena ati utamoopa pano namamupeela mu makasa yako kumwi ni vita vyakwe vyonsi nga ni mpanga yakwe yonsi pyu. Umamucita sile vivi kwene vino wacisile Siooni umwene wa ina Amoli mu Hesyiboni.

³ “Acino Yawe ali pa kwika umwene Ogi umwene waku Basyani kumwi ni vita vyakwe mu makasa itu, nga naswe ituyakomola yonsi pyu.

⁴ Pa nsita ili yonga kwene itupoka ni misumba yao yonsi ukwaula ukusyapo nanti onga. Imisumba yonsi pamwi yali amakumi mutanda. Ali mpanga yonsi pano yapezile iya ku Aligobu, ino Ogi umwene waku Basyani wateekanga.

⁵ Imisumba iyo yonsi yakweti amalinga atali cuze, ni mpongolo ni mifikilo iyakupikilizya, nga kwali nu tumisumba utwingi ututakweti amalinga.

⁶ Naswe itonona imisumba yonsi nu kukoma aonsi yonsi, na anaci, na ana kwene, wakwe vino twacisile Siooni umwene waku Hesyiboni.

⁷ Itusampa ni ng'ombe zyao pamwi ni vyuma vyamu misumba ilya yonsi.

⁸ “Acino pa nsita ilya twaposile impanga yakwe yamwene yaya yaili ya ina Amoli, ku lusansa lwaku ufumondaka wa Luzi lwa Yodani, ukutandikila sile ku Luzi lwa Alinoni mpaka ukufika nu ku Mwamba wa Helimoni.

⁹ (Aina Sidoni yakaama Mwamba wa Helimoni yati Silioni. Aina Amoli nayo yakaawama yati Senili.)

¹⁰ Itupoka ni mpanga yonsi yakwe Ogi umwene waku Basyani. Kuli kuti imisumba yonsi iya mulundu utambalale, ukwikapo ni mpanga yaku Gileadi ni yaku Basyani, ukufika nu ku ufumondaka ku misumba ya Saleka na Edilei.”

¹¹ (Ogi umwene waku Basyani uwasyalikizye kweneko pa ina Lefaimu. Imbokosi umwali icala cakwe yali iya mawe. Umu wipi yali amamita ukulingana yaili, nu mu utali namo yali amamita yani. Imbokosi iyo icilipo na pilelo mu musumba wa ina Amoni ku Laba.)

Imitundu iyatenzi lwaku ufumondaka wa Luzi lwa Yodani

¹² “Lino twaposile impanga pa nsita ilya, natoozile impanga nu kuipeela ku amu mutundu wakwe Lubeni nu ku amu mutundu wakwe Gadi, ukutandikila lwaku katutu ka musumba wa Aloeli pipi nu Luzi lwa Alinoni. Injaputwila ni cipande cimwi ica mpanga ya myamba yaku Gileadi, kumwi ni misumba iyaya kweneko.

¹³ Amu mutundu pakasi wakwe Manase nayo njapeela impanga iyasile ku mpanga yaku Gileadi nga ni mpanga yakwe Ogi umwene waku Basyani, kuli kuti impanga yonsi yaku Aligobu.” (Impanga yaku Basyani yamanyika ukuti ali mpanga ya ina Lefaimu.

¹⁴ Yaili, uwali uwamu mupanda wakwe Manase, nawe ali pakutoola impanga yonsi yaku Aligobu, kuli kuti, Basyani, aya apelela ku mupaka wa ina Gesyuli na ina Maaka. Ali pakutemela imisumba ya kweneko izina lyakwe, wakwe ndi muno ikaamilwa na pilelo ukuti imisumba yakwe Havoti Yaili.)

¹⁵ “Aluko lwakwe Makili amu mutundu wakwe Manase nayapile impanga yaku Gileadi.

¹⁶ Amu mutundu wakwe Lubeni na wakwe Gadi nayo nayapile impanga iyakutandikila mu Gileadi ukufika nu ku Luzi lwa Alinoni. Pakasi ka luzi apaya umupaka wao uwaku kaeya, nga nu mupaka wao uwaku katutu waya ku Luzi lwa Yaboki, ni cipande cimwi ica luzi kwene luu uli mupaka wa ina Amoni.

¹⁷ Lwaku uwondaka impanga yao yanyetelile ukufika ku Luzi lwa Yodani, nu kufuma kuli Yemba wa Galile ku katutu mpaka ukutentemukila kuli Yemba wa Musilya lwaku kaeya mpaka nu mu mutentemuko wa Mwamba wa Pisiga lwaku ufumondaka.

¹⁸ “Pa nsita ilya ali lino nayapile amalamulo ya, inti, ‘Yawe Leza witu watamupeela impanga ii yaku ufumondaka wa Luzi lwa Yodani kuti mupoke amuno mwaikala. Fwandi lyene leka asilika yonsi yaipangasye nga uyatume ku mbalama ya Luzi lwa Yodani yakolelele imitundu yuze ya ina Izlaeli, kuti yakayazwilizye ukupoka impanga nu kwikala mwenemo.

¹⁹ Suka sile aci inu, na ana inu, ni viteekwa vinu (namanya ukuti mwakwata iviteekwa vivule wakwe cimwi) yene yangasyala mu misumba ino namupeela.

²⁰ Kazwilizini anyonko aina Izlaeli suka nayo yace yapoke impanga ino Yawe Leza winu akuyapeela lwaku mbalama ya Luzi lwa Yodani. Akasuke Yawe akaleke ukuti yaikala ningo ndi vino cati ciya kuli mwemwe. Ali lino lyene namwe mulaweluluka ku mpanga zinu zino namupeela.’

²¹ “Lyene napeezile Yoswa ilamulo, inti, ‘We mwisikulu wailolile vyonsi vino Yawe Leza wako wacisile kuli yamwene yaya yaili, Siooni na Ogi. Ali vino ali nu kucita ku mwene ali wensi uwikala mu mpanga ino mulasawanga nu kwikala mwenemo.

²² Mutakezye ukuyoopa. Yawe Leza winu umwisikulu alamulwisizya.’

Mose yamulesya ukwingila mu Kenani

²³ “Pa nsita ilya napefile nu mwenzo onsi inti,

²⁴ ‘Yawe Simwandalali, namanya ukuti watandika ukulangilila ne muomvi wako ivintu vimwi ivikulu nupya ivyakuzunguka vino wemo uli nu kucita. Kutaya Leza nanti aumwi umwiyulu nanti pano nsi angacita ivyakuzunguka wakwe vino ukacita.

²⁵ Su ngaleka sile indambe Luzi lwa Yodani, uleke inje nkalole impanga ivunde iyaya ku mbalama yuze, impanga iyembe ya myamba nga ni Myamba ya Lebanoni.’

²⁶ “Lelo pamulandu wakwe mwemwe Yawe wansokile akana nu kunguvwa. Mucifulo cakwe cico, anena ati, ‘Uwi! Walanda vyavula! Utezya nupya ukuvwanga pamulandu uu!

²⁷ Yanga papela ya Mwamba wa Pisiga ucecete lwaku katutu nu ku kaeya, nu ku ufumondaka nu ku uwondaka. Ukacecete ningo vintu vino umaya ukalole, pamulandu wakuti utalasya nupya ulambe imbalama ya Luzi lwa Yodani.

²⁸ Wemo peela sile Yoswa amalamulo. Fwandi umukomelezye nu kumupeela inzyansyo, pamulandu wakuti aliwe alatungulula antu ku kulamba nu kuyapoka nu kwikala mu mpanga ino wemo umalola sile.’

²⁹ “Acino swemo twasile tutenzi mu cifoloma ulunga nu musumba wa Beti Peoli.”