Malango 29 - Amazwi Yakwe Leza 2013

Upangano wakwe Yawe mu mpanga ya Moabu

¹ Yakwene ali mazwi ya upangano uno Yawe wapeezile ilamulo kuli Mose kuti yapangane na ina Izlaeli mu mpanga ya Moabu. Amazwi yaa fwandi yali akulanda pa mazwi ya upangano uno Yawe kwene wapangine nayo ku Mwamba wa Holebu.

² Fwandi ali vino Mose wakonganike aina Izlaeli nga ayanena ati, “Mwemo mwailolile mweisikulu vino Yawe Leza winu wacisile mu Eguputo kuli Falao, na kuli yacilolo yakwe nu ku antu yakwe.

³ Mwailolile mweisikulu ivilumbelo ivipisye alino ni vinjelengwe pamwi ni vizungusyo ivikulu vino Yawe Leza wacisile.

⁴ Lelo mwemo ukufika na pi lelo mutacili mupelwe amano akwiluka pa vintu vino mwailolile.

⁵ Apa myaka amakumi yani ino yatipita, ukufuma pano Yawe wamupisya mu lwanga, ivyakuzwala vinu pamwi ni ndyatu vitalepuka nanti ukusila.

⁶ Mutakwatanga umukate uwa kulya nanti waini uwakumwa, nanti uwengwa uwakumwa. Lelo Yawe umwisikulu uwamupeelanga vyonsi vino mukulonda pakuti amusambilizye ukuti ali Leza winu.

⁷ Lino twafisile pa ncende kwene ii, Siooni umwene waku Hesyiboni na Ogi umwene waku Basyani yatukomenkinye ukwiza tulwisya. Lelo twayacimvizye,

⁸ ituyapoka ni mpanga nu kuyankanya ku mitundu yakwe Lubeni na Gadi nu ku luko pakasi lwakwe Manase.

⁹ Ali cino fwandi mwawaka nu kulondela ningo ningo amasunde amu upangano uu pakuti muye nu longo mu vintu vyonsi vino mumacitanga.

¹⁰ “Api lelo mwimilile pa manso yakwe Yawe Leza winu, mwemwe mwensi. Muli pali pamwi ni ntunguluzi na yacilolo inu na onsi yonsi,

¹¹ na aci inu na ana inu, nga na inamasi akaikala pamwi namwe nu kumutiila inkwi nu kumusembela amanzi.

¹² Mwimilile pano pakuti mupangane upangano uno Yawe Leza winu amapangana namwe, alino na pakuti muzumile amasunde ya upangano uwo.

¹³ Ali pakuti Yawe amucite ukuya antu yakwe umwisikulu. Nga nawe aye ali Leza winu wakwe vino wamulavile na wakwe muno walavile ivikolwe vinu, Abulaamu, Isaki, na Yakobo.

¹⁴ Asi mwemwe mwenga mwemuno Yawe akupangana namwe upangano na masunde yakwe, awe.

¹⁵ Lelo wene akupangana naswe kwene swensi swemuno twatitwimilila pano pa manso yakwe ilelo, kumwi na amu mupanda witu yano yatali kuti yavyalwe.

¹⁶ “Mwaiusya vino twatenzi mu mpanga ya Eguputo, na vino cali pakupita mu mpanga ya mitundu yuze.

¹⁷ Mweisikulu mwailolile utuluwi twao utwipisye utuwaze ku vimiti, utwa mawe, twakwe siluva, na twakwe zaabu.

¹⁸ Mwensi mwemuno muli pano ilelo musininkizye ukuti pataya umonsi, nanti umwanaci, nanti amu ng'anda imwi, nanti umutundu uwakufutatila Yawe Leza witu nu kupepa tuleza twa nko zizi zyuze. Cico cikoline wa musisi waulembe uno ungalemuka nu kukola antu ndi yaulya.

¹⁹ Musininkizye ukuti pali mwemwe mwensi, mwemuno mwatimwimilila pano ilelo pataya nanti wenga uwakuisomba ukuti alaikala sile ningo ukwaula intazi nanti angala wene wacita ivyaucintuvwa wakwe. Owe mwe! Ale lyene wiyo alaleta ulupekeso ku muntu umusuma nu ku mwipe kwene.

²⁰ Yawe atalelela umuntu uwa musango uwo. Yawe wene alalunkuma panoli ku ukali wakwe, ni vilumbelo ivyalembwa mu lupapulo luu vilamuponela mpaka sile akamulovye nu kumufumya mu mpanga ii.

²¹ Yawe alacita umuntu wiyo ukuya icilangililo cakuti inko zyonsi izya ina Izlaeli yakalolele kweneko. Wene alamuletela ivilumbelo ukulingana ni ntipu izyaya mu upangano uwalondololwa nu kulembwa mu lupapulo lwa masunde yakwe Yawe.

²² “Umu nkulo iziliza ku nkolelo amu mupanda winu na inamasi afuma ku mpanga zya kutali yalalola ivilumbelo na macuzi yano Yawe alaleta mu mpanga inu.

²³ Umu vyalo vinu mutalamela akantu nanti kamwi. Mulaya sile amawe kwati a yamunyela amu malungu. Nupya mulaya umusili uwa cicelecele muno mutangakomelwa nanti cimwi, nanti sile ivikona vitangamela mwenemo. Fwandi impanga inu ilaya wa misumba ya Sodoma na Gomola, Adima na Zeboimu, ino Yawe wononyile lino wasosile icisoke conga.

²⁴ Lyene antu amu nsi yalauzyanya yati, ‘Uzye Pacani cino Yawe wacitila icamusango ndi uu mu mpanga yao?’”

²⁵ “ino ukwasuka kulati, ‘Pamulandu wakuti antu yakwe Yawe yononyile upangano uno yacisile na aliwe, Leza wa vikolwe vyao, uwo uno yapangine na aliwe lino wayafumizye mu mpanga ya Eguputo.

²⁶ Yene yatandike ukutumikila nu kupepa tuleza tuze utuluwi tuno yatatazile yapepe. Tukwene ali tuno Yawe wayalesizye ukupepa.

²⁷ Caleka Yawe ali vino wasokile antu yakwe, cakuti aleta ni vilumbelo mu mpanga yao, ivyalembwa mu lupapulo luu.

²⁸ Yawe wasosile cuze, alino nu ku ukali wakwe ukulu ayafumya nu mu mpanga yao, nga ayazingila mu mpanga ya inamasi mumo muno yakwikala ukufika na pilelo.’

²⁹ “Kwaya kweneko ivintu vimwi vino Yawe Leza witu atatusokolwela. Lelo wene watusokolwela amasunde yakwe, nga sweswe pamwi na amu mupanda witu tulinzile twayayela amanda pe.”