Malango 28 - Amazwi Yakwe Leza 2013

Kupolelelwa kwakwe yao akauvwila umwene Leza

¹ “Ndi cakuti mwaca mwayela Yawe Leza winu muli vyonsi nu kutekela apakulondela amalamulo yakwe yonsi yano nkumupeela ilelo, ale lyene Yawe Leza winu alamucita ukuya uluko lumwi ulukulu ukuluta inko zyonsi pano nsi.

² Ndi mwaca mwayela Yawe Leza winu, ale lyene kupolelelwa kuu konsi kulaya ukwinu:

³ “Yawe alapolelela imisumba inu ni vyalo vinu kwene.

⁴ “Yawe alamupolelela amupeele ana avule, ni vyakulya vivule cuze, nga ni ng'ombe ni mbuzi zivule.

⁵ “Yawe alapolelela imbezu zinu nga ni vyakulya vino mulateyanya ku mbezu zizyo.

⁶ “Yawe alapolelela vyonsi vino mulacita.

⁷ “Yawe alamucimvizya anisi inu lino yalamuzanza. Yene yalamuzanza ukufuma mu ntunga zyonsi, lelo yalutuka ku ntunga zyonsi.

⁸ “Yawe Leza winu alapolelela imilimo inu, alazuzya ivyakulya mu nkoma zinu. Wene alamupolelela mu mpanga ino akumupeela.

⁹ “Ndi cakuti mwayela Yawe Leza winu nu kucita vyonsi vino akumupeela ilamulo kuti mucite, ale lyene alamucita ukuya antu yakwe kololo, wakwe vino walaya.

¹⁰ Lyene antu yonsi pano nsi yalalola ukuti Yawe wasolola mwemwe kuti muye antu yakwe kololo, nga lyene yalaoopa mwemwe.

¹¹ Yawe alamupeela ana avule, ni ng'ombe zivule, ni vyakulya vivule mu mpanga ino walavile ivikolwe vinu ukuti alaipeela kuli mwemwe.

¹² Yawe alamutumila imvula pa mpanga inu pa nsita yakweyo, ukufuma ku maziya akama akwiyulu nu kupolelela imilimo inu yonsi, cakuti muce mwaazimisya na vimwi ku nko zivule. Lelo mwemo mutalatala mwazime nanti ku luko longa.

¹³ Yawe Leza winu alamucindamika muye intunguluzi pakasi ka antu amu nko zyuze, nga lelo mwemo mutalayalondela icisila. Insita zyonsi mulaya alongo nga nupya mutalatala muposiwe, cikulu sile mwayela amalamulo yonsi yano nkumupeela ilelo.

¹⁴ Lelo mutakezye ukukana yela amalamulo yaa mu musango uli onsi nanti ukupepa nu kuombela tuleza tuze.

Ivikafuma mu kuntayela

¹⁵ “Lelo ndi mwakana ukuyela Yawe Leza winu nga mutacenjile mukane kulondela amalamulo yakwe yonsi na masunde yano nkumupeela ilelo, ale lyene vintu vii vyonsi iviipe vilamuponela.

¹⁶ “Yawe alatipwila imisumba ni vyalo vinu.

¹⁷ “Yawe alatipwila imbezu zinu ni vyakulya vino mulateyanya ku mbezu zizyo.

¹⁸ “Yawe alamutipwila amupeele ana anono sile, ni vyakulya visi vya mpomvu, nga ni ng'ombe ni mbuzi zinono sile.

¹⁹ “Yawe alatipwila ivintu vyonsi vino mulacita.

²⁰ “Ndi cakuti mwacita iciipe mwasangukila Yawe, ale lyene alamuponyezya uzanzo, ni cimvulunganya, nga ni ntazi muli vyonsi vino mulacita, mpaka lyene muce mulowe pyu.

²¹ Wene alatwalilila ukumuponyezya impungo zipusanepusane mpaka sile akamulovye mu mpanga ino mwasya mupoke nu kwikala mwenemo.

²² Yawe alamuponyezya indwala izikaambukila, ni mvimba ni nzakaza, ni cilala ni miza ikaye kuti yonone ivyakulya vinu. Ivilumbelo vii vilasyala pano muli mpaka mukafwe.

²³ Imvula italatonya mpaka umusili ukasuke ukakome uye ndi wa cela.

²⁴ Mucifulo cakutuma imvula, Yawe alamutumila icimuza ca lukungu ni ca mucanga mpaka mukononwe.

²⁵ “Yawe alapeela amaka ku anisi inu akuti yamucimvye. Mulaezya kuyazanza ukutunkila pa ntunga yonga, lelo muluutuka ukufuma kunoyali mulungame ku ntunga zyonsi, cakuti antu yonsi pano nsi yalazakaza ku ntete lino yalalola icacitika kunomuli.

²⁶ Lino mulafwa, ivyunyi ni nyama zya mpanga iviliza vilye imili inu, nupya kutalaya nanti aumwi uwa kuvizila.

²⁷ Yawe alamuponyezya ivipute wakwe vino waponyizye pa ina Eguputo. Alalenga ni mili inu kupuuka ivilonda. Mulakwata impele izilamusanga wakwe cimwi, lelo kutalaya icakumupozya.

²⁸ Yawe alaleka mupene, mupafule nga nu kuvulungana.

²⁹ Nanti ilanzi liwale uli mwemo mulapulupunta wa ntonko ikupita usiku. Mutalatala muye nu longo mu vintu vyonsi vino mulapanga ukucita. Yalamufyengelekezya nu kumwiya insita zyonsi, nga kutalaya umuntu nanti wenga uwa kumwazwa.

³⁰ “Mulalanzya anaci nu kuyataisya, lelo aonsi yauze yalayasemya. Mulakuula amang'anda, lelo mutalalala mwenemo. Mulalema imiti ya matingi, lelo mutalatala mulye iviseekwa vyakweneko.

³¹ Yalakomola yamasaye inu pa manso inu ale mukulola, lelo mwemo mutalalya inyama zyao awe. Yalasenda na yapunda inu lino mwemo mukulolekesyako sile, ukwaula kuti yayawezye. Imfwele zinu zilapelwa ku anisi inu, nga mutalalola nanti aumwi uwakuti amutuule.

³² Ainamasi yalasenda mu uzya ana inu aonsi na anaci kwene ale mukulolekesyako sile. Cila wanda mulatumbula sile amanso, pakulola ndi yamawela.

³³ Antu amu luko luze luno mutamanya yalamupoka ivyakulya vyonsi pyu vino mwaombile pa maka pa kuvikuzya. Mwemo mulapelwapo sile ukwaula amalipilo, suka sile ukumucuzya nu kumufyengelekezya penepo

³⁴ Ucuzi winu ulamulenga ukuvulungana.

³⁵ Yawe alalenga kuti ivilonda vipuuke konsi ku makulu inu, vinakasambo ivitalatala vipole, alino ni vipute ukutandikila sile ku tuntunta mpaka nu ku mitwe inu.

³⁶ “Yawe alatwala mwemwe pamwi nu mwene wino mwasonta ku mpanga ya inamasi, kuko kuno mwemwe nanti ivikolwe vinu vitatazile vikale kweneko. Kuko kwene, ali kuno mulatumikila tuleza tuze utwakuwaza nu twapangwa ku mawe.

³⁷ Umu nko muno Yawe alamusalanganyizizya, antu yalazunguka pa vintu vino vyati vimuponela. Yalamuwela nu kumutumfya.

³⁸ “Mulakomela imbezu zivule, lelo utwa uzombozi tulaya utwa ciwelewele, pamulandu wakuti makanta nawe alalya ivyakulya vinu.

³⁹ Mulalema imiti ya matingi nu kuitukwilila, lelo mutalatala mukulule amatingi kweneko nanti ukumwa waini uwapangwa ukufuma kweneko, pamulandu wakuti utuzizi tulayalya pyu.

⁴⁰ Imiti ya miolivi ilakula mu mpanga inu yonsi, lelo mutalaenga kweneko amafuta, pamulandu wakuti iviseekwa vya miolivi vilalukuta wa tumbozya.

⁴¹ Mulavyala ana aonsi na anaci, lelo mulayaponzya, pamulandu wakuti yalayasenda mu uzya.

⁴² Makanta alonona imiti ni vyakulya vyamu mpanga inu vyonsi.

⁴³ “Ainamasi alaikala mu mpanga inu yalacindamilako sile cila wanda, namwe ale mukusaalukilako sile cila wanda.

⁴⁴ Yene yalakwata impiya izya kumukongwesya, lelo mwemo mutalakwata nanti akamwi aka kuyakongwesya.

⁴⁵ “Ivilumbelo vyonsi vii vilamuponela, nga vilamutitikizya mpaka mukasuke mononwe, pamulandu wakuti mwakanyile kuyela Yawe Leza winu nu kulondela amalamulo ni vyeo vyonsi vino wene wamupezile.

⁴⁶ Ali vino vilaya ivya kumanyila kweneko upinguzi wakwe leza pali mwemwe na pa ana inu yonsi.

⁴⁷ Yawe wamupolelile muli vyonsi sile, lelo mwemo mwakana ukumutumikila ni myenzo iya nsansa nu luzango.

⁴⁸ Ali cino fwandi lyene mwailetelela, mumaombelanga anisi yano Yawe amatumanga ku kwiza muzanza. Mulauvwa inzala, nu lusala, nga mulapita tupu, nu kuulilwa muli vyonsi. Anisi inu yalamuzunya icikakate mpaka mukononwe.

⁴⁹ Yawe alamuletela antu amu luko luze ulwa ku mpela ya nsi ukwiza muzanza, uluko luno icilimi cao mutacimanya. Yene yaliza yamuvwelule ungati a cipungu.

⁵⁰ Antu yaya akakate nupya nanti uluse yatakwata ku muntu ali wensi, cisi cimwi aye umwance nanti uwikolo.

⁵¹ Yaliza yamulile iviteekwa ni vyakulya vinu kwene, mpaka mukafwe ku nzala. Yene yatalamusila imbezu, nanti waini, nanti amafuta ya miolivi, nanti ing'ombe, nanti imfwele, mpaka mwemo mukafwe.

⁵² Yene yalazanza imisumba yonsi iyaya mu mpanga ino Yawe Leza winu akumupeela, nupya na malinga kwene atali yano mwataila yalaongoloka.

⁵³ “Lino anisi inu yalalizizya imisumba inu mutalalola ivyakuti mungalya, mulalya ana inu yano Yawe Leza winu wamupeela.

⁵⁴ Nanti sile umonsi kwene uwa vyalwa ku lupwa lucindame, umufyeleke nupya uwacipale ni cilumba, nawe kwene alapelelwa pa nsita ino anisi inu yalalizizya imisumba cakuti alalya ana yakwe yamwi pamulandu wa kuntakwata cimwi cakuti alye.

⁵⁵ Nupya atalankanyako umwina umwi nanti umuci wakwe wino watemwa nanti sile a wenga pa ana asyala penepo.

⁵⁶ Nanti sile umwanaci kwene uwavyalwa ku lupwa lucindame, umukama cuze cakuti konsi kuno akuya ala yakumunyemula sile, nawe kwene alacita icili conga.

⁵⁷ Wene alalya akanya kakwe kumwi ni mbuza ya uvyazi ukwaula ukwankanyako iya nanti umwana wenga pa ana yakwe. Pano wene ala akupanga ukulya vivyo mu umfisolo mu nsita ino anisi yalalizizya umusumba wakwe nga nu mu kwaaziwa mu mwenzo kuno anisi inu yalaleta pali mwemwe mu misumba inu.

⁵⁸ “Ndi mulakana ukuyela ningo amasambilizyo yakwe Leza yano yalembwa mu lupapulo luu, nupya ndi mwakana ukucindika izina ilyalulumbi nupya ilyakoofya lyakwe Yawe Leza winu,

⁵⁹ ale lyene wene alamuponyezya indwala izitangapoziwa nga ni vilumbelo ivyakoofya, mwemwe kumwi na amu mupanda winu.

⁶⁰ Nupya kwene wene alamuletela indwala zyonsi izyakoofya zino mwailolile mu mpanga ya Eguputo, nga namwe mutalatala mupole.

⁶¹ Alamuletela ni ndwala zya misango ni misango alino ni mpungo zino zitalumbulwa mu lupapulo luu ulwa masunde yakwe Leza. Ala namwe kwene mulononwa.

⁶² Nanti angala mulavula wa ntanda umwiyulu, anono sile alapusuka, pamulandu wakuti mwakana ukuyela Yawe Leza winu.

⁶³ Wakwe vivi kwene vino Yawe watemilwe ukuti muye nu longo nu kusanda mu mpendwa, ali vino wene alatemwa nu kumonona nu kumupekesa. Alamulovya ukwaula kusyalapo nanti wenga mu mpanga iyo ino mwasya mupoke nu kwikala mwenemo.

⁶⁴ “Yawe alamusalanganyizizya mu mitundu yuze, ukufuma ku mpela yonga ya nsi ukufika nu ku yuze. Ali kuno mulaya mukaatumikila tuleza utwakuwaza nu twapangwa ku mawe, tuto tuno mwemwe nanti ivikolwe vinu mutatala mwapepa.

⁶⁵ Mutalatala muzane umutende ukuli konsi, nanti kukwata uwikalo uwakwinu. Kuku kwene akuno Yawe alamulenga ukukwata intete, mulaponzya upaalilo, nupya mulatovoka.

⁶⁶ Ponsi pano mwikala palaya pa kutwisika. Musanya nu usiku mulaikala ntete ntete, insunsu mputi pamulandu wakuya ni ntete zya kufwa.

⁶⁷ Imyenzo inu ilakulukunta sile ku ntete kuli consi cino mwalola. Cila katondo ndi kwaca sile, mulalonda ukuti ciye amanguzi lino ilanzi lyatemba. Na cila manguzi lino ilanzi lyatemba, mulalonda ciye akatondo.

⁶⁸ Yawe alamuswilizya ku Eguputo pa lwendo mu vyombo, nanti angala nemo namunenyile ukuti mutalatala muswilile kweneko. Kuku kwene ali kuno mwemo mulalondesya ukuikazya mweisikulu ku anisi inu wa azya aonsi na anaci, lelo kutalaya umwi alalonda kumukala, awe.”