Malango 27 - Amazwi Yakwe Leza 2013

Amasunde yakwe Leza alembwe pa mawe

¹ Alino Mose pamwi ni ntunguluzi zya ina Izlaeli anena antu ati, “Mwayela amasunde yonsi pyu yano namupeela ilelo.

² Uwanda uno mulalamba Luzi lwa Yodani nu kwingila mu mpanga ino Yawe Leza winu ali nu kumupeela, muce mwimike amawe akulu, ali lino lyene mukayapomele ningo.

³ Lyene mukalembe penepo amasunde yaa yonsi na masambilizyo. Lino mwingila mu mpanga iya uzombozi ukulu cuze nupya iivunde ino Yawe Leza wa vikolwe vinu wamulavile,

⁴ nga na lino mwalamba ku mbalama yuze yakwe Yodani, muce mukuule amawe yaa pa Mwamba wa Ebali ndi muno nkumulangilila ilelo. Muce muyapomele ningo.

⁵ Ali lino muce mukuule kavuwa ka mawe yano yatakumya mwenemo impato ya cela nu kuyawaza.

⁶ Kuliini kavuwa kakwe Yawe Leza winu na mawe nga mupeele penepo amawila yakoca.

⁷ Nupya ali pano muce mwapeelela na mawila inu autandano, nga mukayalile papa kwene nu kutaizya Yawe pa manso yakwe.

⁸ Apa mawe kwene yayo apomelwe ningo, ali pano muce mulembe ningo amazwi yonsi ya masunde yakwe Leza.”

⁹ Lyene Mose, pali pamwi na yasimapepo aina Levi, yanena aina Izlaeli yonsi yati, “Mwe ina Izlaeli mwe uvwini kuno, mutezye vino namamunena. Ilelo mwaya antu yakwe Yawe Leza winu.

¹⁰ Acino mwayela Yawe Leza winu nu kulondela amalamulo yakwe yano nkumupeela ilelo.”

Intipu pakukana ukuyela amasunde

¹¹ Alino Mose anena aina Izlaeli ati,

¹² “Lino mwaca mwalamba Luzi lwa Yodani, imitundu ino ilimilila pa Mwamba wa Gelizimu lino yalapolelela antu aeyi: umutundu wakwe Simeoni, na wakwe Levi, na wakwe Yuda, na wakwe Isakali, na wakwe Yosefu, nga na wakwe Benjamini.

¹³ Nga ni mitundu ino ilimilila pa Mwamba wa Ebali lino yalatipwila antu nayo aeyi: umutundu wakwe Lubeni, na wakwe Gadi, na wakwe Asyeli, na wakwe Zebuluni, na wakwe Dani, nga na wakwe Nafutali.

¹⁴ Aina Levi yalalanda amazwi yaa ku antu yonsi umwi zwi likulu, yati,

¹⁵ “ ‘Katipwe kuli Leza umuntu wino akaipangila akaluwi ka mawe, nanti aka miti nanti akacela, pakuti wene akano apepa mu umfisolo. Yawe wapata ukupepa utuluwi.’ “Lyene antu yonsi yalande yati, ‘Ee mukwai! Kaciye vivyo kwene!’

¹⁶ “ ‘Katipwe kuli Leza wiyo wensi uwasuula isi nanti nyina.’ “Lyene antu yonsi yalande yati, ‘Ee mukwai! Kaciye vivyo kwene!’

¹⁷ “ ‘Katipwe kuli Leza wiyo wensi uwingilila umuze nande wa calo.’ “Lyene antu yonsi yalande yati, ‘Ee mukwai! Kaciye vivyo kwene!’

¹⁸ “ ‘Katipwe kuli Leza wiyo wensi alaleka impafu ipumbe mu nzila.’ “Lyene antu yonsi yalande yati, ‘Ee mukwai! Kaciye vivyo kwene!’

¹⁹ “ ‘Katipwe kuli Leza wiyo wensi akafyenga umwinamasi, ana asyale, na yamukamfwilwa.’ “Lyene antu yonsi yalalanda yati, ‘Ee mukwai! Kaciye vivyo kwene!’

²⁰ “ ‘Katipwe kuli Leza wiyo wensi alalala na nyina wino isi watwala, pano kuko ukuzewanya so.’ “Lyene antu yonsi yalalanda yati, ‘Ee mukwai! Kaciye vivyo kwene!’

²¹ “ ‘Katipwe kuli Leza wiyo wensi ala ulungana ni nyama ya musango uli onsi.’ “Lyene antu yonsi yalalanda yati, ‘Ee mukwai! Kaciye vivyo kwene!’

²² “ ‘Katipwe kuli Leza wiyo wensi alalala na kaci wakwe wino yavyalwa nawe inda yonga, nanti uwamu ng'anda yuze.’ “Lyene antu yonsi yalalanda yati, ‘Ee mukwai! Kaciye vivyo kwene!’

²³ “ ‘Katipwe kuli Leza wiyo wensi alalala na nyinavyala.’ “Lyene antu yonsi yalalanda yati, ‘Ee mukwai! Kaciye vivyo kwene!’

²⁴ “ ‘Katipwe kuli Leza wiyo wensi alakoma umuntu muze mu umfisolo.’ “Lyene antu yonsi yalalanda yati, ‘Kaciye vivyo kwene!’

²⁵ “ ‘Katipwe kuli Leza wiyo wensi aalatola mafukakanwa kuti akakome umuntu asi uwa mulandu.’ “Lyene antu yonsi yalalanda yati, ‘Ee mukwai! Kaciye vivyo kwene!’

²⁶ “ ‘Katipwe kuli Leza wiyo wensi alakana ukuyela amasunde yonsi na masambilizyo yakwe Leza.’ “Lyene antu yonsi yalalanda yati, ‘Ee mukwai! Kaciye vivyo kwene!’