Malango 26 - Amazwi Yakwe Leza 2013

Amawila yapa uzombozi

¹ “Lino mulingila mu mpanga ino Yawe Leza winu akumupeela nu kwikala mwikala mwenemo,

² cila muntu panomuli alinzile watola umuse nga aikemo iviseekwa vyankolelo ivya pa vilimwa vyonsi vino alazombola. Lyene muvisende nu kuvitwala ku ncende ino Yawe Leza winu alasolola ukwa kumupepela.

³ Muce mwaya kuli simapepo wiyo alazanwa pa luti pa nsita kwene iyo nu kumunena muti, ‘Nene kwene ilelo nkuizumilila kuli Yawe Leza wane ukuti ningila mu mpanga ino walavile ivikolwe vitu ukuti alapeela sweswe.’

⁴ “Alino simapepo alatola umuse uwo uno ulesile nu kuwika pa kavuwa kakwe Yawe Leza winu.

⁵ Lyene nawe ulalanda amazwi inkolelo yakwe Yawe Leza winu uti, ‘Cikolwe cane cali icina Alamu, cico icalulumbanga, nupya caile ku Eguputo pamwi nu lupwa lwaciko. Lino yaile kweneko yali akaliumba akanono sile, lelo mukuya amanda iyasuka yansanduluka iyaya umutundu wa maka.

⁶ Lelo aina Eguputo yatucuzizye wakwe cimwi nga yatupatikizya ukuomba wa azya.

⁷ Alino naswe itulilila Yawe, Leza wa vikolwe vitu kuti atwazwilizye. Nga nawe auvwa kunotuli alola nu kucula kwitu, intazi zitu, nu ulanda witu.

⁸ Acino Yawe ali pakutufumya mu mpanga ya Eguputo ku maka yakwe nu ku nzyansyo zyakwe. Wene wacisile ivinjelengwe ni vizungusyo, nga nu kucita ivintu ivyakoofya.

⁹ Ali vino watuleta kuno nu kutupeela impanga iya uzombozi ukulu cuze nupya iivunde.

¹⁰ Caleka ndakai naletela Yawe iviseekwa vyankolelo ivya uzombozi uno wene watampeela.’ “Lyene uteke umuse uwo pansi inkolelo yakwe Yawe, nga ufukame utandike ukupepa.

¹¹ Muce mwasansamuka nu kutaizya Yawe Leza winu pa vintu visuma vino wene wapeela kunomuli nu ku amu ng'anda inu. Lekini aina Levi pamwi na inamasi yano yakaikala namwe yize yailundanye ku kusansamuka kuko.

¹² “Ndi papita imyaka itatu lyonsi uce uwapeela icikumi pa vilimwa vyako ku ina Levi, nu ku inamasi, nu ku ana asyale, nga na kuli yamukamfwilwa, pakuti konsi kuno yalaikala yataca yulilwe cimwi icakulya. Lino wamala ukucita cico,

¹³ ulande kuli Yawe Leza winu uti, ‘Kusi icikumi nanti conga icati cisyala mu ng'anda yane. Natimpeela consi ku ina Levi, nu ku inamasi, nu ku ana asyale, na kuli yamukamfwilwa, wakwe vino wampeezile ilamulo kuti incite. Intakanyile kuyela nanti ukwilila ilamulo nanti lyonga pa malamulo yano wampeezile pa cikumi.

¹⁴ Nemo ntalile icikumi nanti acimwi lino nkulosya. Nemo ntafumya penepo icipande ica cikumi nanti acimwi nu kutwala apanzi lino ncili umukowele, nanti ukupeela ku afwe. Ala, we Yawe nemo nkakuyela nu kulondela amalamulo yonsi yano wapeela pa cikumi.

¹⁵ Ala kuko ukwiyulu kuno ukaikala, ku ncende yamuzilo, si ule usumbe amanso yako pa antu yako aina Izlaeli nu kuyapolelela. Si ule upolelele ni mpanga yao kwene iya uzombozi ukulu cuze nupya iivunde, wakwe vino walavile ivikolwe vitu.’

Antu kololo yakwe Yawe

¹⁶ “Ilelo Yawe Leza winu wamupeela ilamulo kuti mwayela amasunde yakwe yonsi. Acino mulinzile mwasumbako amano nu kuyayela ni myenzo inu yonsi nu umi winu onsi.

¹⁷ Ilelo mwatimuizumilila mweisikulu ukuti Yawe ali Leza winu. Mwatimulaya ukuti mumamuyelanga, nu kusunga amasunde yakwe yonsi nu kucita vyonsi vino wamupeela ilamulo kuti mucite.

¹⁸ Ilelo Yawe nawe watazumila ukuti mwemwe antu yakwe kololo, wakwe vino wamulavile. Watapeela ilamulo kunomuli kuti mwayela amasunde yakwe yonsi.

¹⁹ Mwemo alaleka muye uluko lukulu ukuluta antu amu nko zyuze yano waumba, nga namwe mulamulumbanya nu kumucindika.