Malango 25 - Amazwi Yakwe Leza 2013

¹ “Ndi cali aina Izlaeli yamwi yaili yapusana nga yatwala umulandu ku cilye ca milandu pakuti yayapingwile, nga lyene wenga wazanwa ukuti asi nu mulandu lelo umuze ali wa mulandu.

² Ndi cakuti umuntu wino yasinda umulandu yamupingwila ukuumwa ivikoti, kapingula wa milandu alinzile wamulambalika pansi, ale afupime, alino amume ivikoti. Impendwa ya vikoti ilinzile yalingana nu mulandu uno wacisile.

³ Yangamuma ivikoti ukufika na pa makumi yani sile. Atakezye ukucizya penepo pano ndi cakuti vyacila penepo, mungaleka umunyonko azewane sile pa antu.

⁴ “Utanyepa masaye umulomo lino ukumuomvya kuti alyatole ingano pakupuula.

Ivyakucita pa kupyana umunyonko ndi wafwa

⁵ “Ndi cakuti kwaya aina yaili akaikala pali pamwi, lyene wenga wafwa ukwaula kuti yamuvyalile umwana umonsi, mukamfwilwa wiyo asi nu kutwalwa ku monsi asi uwamu lupwa lwa muyazi kwene wiyo.

⁶ Mwana umonsi wino alavyala yalinzile yamutemela izina lya muyazi kwene wiyo. Ali pakuti izina lya muyazi litakalowe mu ina Izlaeli.

⁷ Lelo ndi cakuti umwina wa muyazi atakasi kutoola mukamfwilwa wiyo, mukamfwilwa wiyo alinzile aye ku ntunguluzi zyamu musumba nga azinene ati, ‘Mulamu wane watakana ukututulula izina lya mwina mu mpanga ya ina Izlaeli. Wene watakana nu kuvyalila umwina umwana mu Izlaeli.’

⁸ Alino intunguluzi zyamu musumba uwo zingamwama nu kulanda kunoli. Ndi cakuti acili akukana ukutoola mulamu wakwe,

⁹ mukamfwilwa lyene alinzile wapalama kunoli pa manso ya ntunguluzi zyamu musumba, amuzule ulundyatu longa, amuswile amati pa manso, nga avwange ati, ‘Ee, ali vino yakacita umonsi uwakana ukuvyalila umwina umwana.’

¹⁰ Umu Izlaeli ulupwa lwakwe yalalwama yati, ‘ulupwa lwa muntu wino yazuzile ulundyatu.’

Amasunde nayauze

¹¹ “Aonsi yaili ndi yakulwa, lyene umuci wakwe wenga pali yayo walema ku vyanzwalo vya monsi wino yakulwa na iya,

¹² umwanaci wiyo cisi cakwezya ukumuvwila uluse. Mukamuputule sile icizanza cakwe, asyale amakunkutu.

¹³ “Mutaca mwezye ukucita usomvi pakwalula alula ivipimilo viili, conga icinyome ni cuze icipeluke.

¹⁴ Mutaca mwezye ukucita usomvi pakuomvya ivipimilo viili ivipusane, conga icikulu ni cuze icinono.

¹⁵ Mulinzile ukukwata vipimilo vya mpomvu, pakuti mukikale amanda avule mu mpanga ino Yawe Leza winu akumupeela.

¹⁶ Pano Yawe wapata umuntu ali wensi wino akacita ivintu vii, ali wensi wino akacita usomvi.

Ilamulo lya kukoma aina Amaleke

¹⁷ “Iusyini vino aina Amaleke yamucisile lino mwafumanga ku Eguputo.

¹⁸ Yene yatakweti icoopo kuli Yawe. Yene yamuzanzile icundansizi cinu, lilyo ale mwatimutonta wakwe cimwi nu kutemboka. Ali lino yakomile yonsi ali ku cisila.

¹⁹ Acino lino Yawe Leza winu alamupeela impanga iye iyakwinu nu kumucingilila ku anisi inu yano yamuzinguluka, muce musininkizye ukuti mwakomola aina Amaleke yonsi pyu, pakuti kutakaye nanti umwi uwakwiusya antu yayo nupya. Mutakezye ukwilila cii!