Malango 24 - Amazwi Yakwe Leza 2013

Ukutaana nu kuwezyanya mu nsakwa

¹ “Limwi umuntu umwi angatwala umwanaci alino nupya pacisila avwange ukuti asikumulonda, pamulandu wakuti wamuzana na kamwi akatamuzanzizye. Alino lyene amulembela na kalata uwa kumuta.

² Lyene ndi cali umwanaci wiyo wamusya, aya atwalwa ku monsi muze,

³ nga lyene iya wiyo wakwe ciili nawe kwene amupate nu kumulembela kalata wakutaana, nga amupeele kalata wiyo nu kumuzinga mu ng'anda yakwe, nanti ndi cali iya wakwe ciili wafwa,

⁴ ndi cakuti caya vivyo, iya wankolelo atalinzile kumuwezya pa ng'anda nupya. Lelo alinzile ukumulola wa muntu mukowele. Ndi cakuti camukola wamuwezya, ale wene wifya pa manso yakwe Yawe. Mutalinzile ukucita iifyo lya musango uwo mu mpanga ino Yawe Leza winu akumupeela iye iyakwinu.

Amasunde nayauze

⁵ “Umonsi nga alino wacitwala, mutakaleke akaye ku nkondo nanti ukumupeela umulimo umwi uwa kuombela uteko. Mungatala mumute pa mwaka onga upuma pakuti aikale ukwakwe nu kusansamusya umuci.

⁶ “Ndi cakuti wazima umuzo icintu cimwi, utalinzile walemela penepo umwanansyo wakwe kuti ace akuwezezye icintu cico zuwa. Awe, ndi caya vivyo ale wamukoma sile.

⁷ “Wensi uwafunsya umwina Izlaeli muze nu kumucita umuzya nanti ndi wamukazya, wiyo wene uwa kukoma sile.

⁸ “Umwi ndi walwala tembwe muce mwasakamala ukucita vino yasimapepo aina Levi yalamunena. Muce mwalondela vyonsi vino nayatungulula ukuti avino yacita.

⁹ Muce mwaiusya vino Yawe Leza winu wacisile kuli Milyamu lino mwafumile mu mpanga ya Eguputo.

¹⁰ “Nga waca wakongwesya umuzo icintu cimwi, utakaye mu ng'anda nu kuitolela cakuzwala cakwe wa cintu cakwe kamukole.

¹¹ Wemo ungimilila panzi pakuti umwisikulu awino aize akufumbatike cico mu minwe yako.

¹² Ndi cakuti umuntu wiyo umupina, utalinzile wasenda icakulemela umulandu cilale ukwako.

¹³ Ulinzile kumuwezezya lino ilanzi litali liwe, pakuti alole icakuvimbala usiku pa kulala. Lyene nawe alataizya pakalamba, nga Yawe Leza wako alazangila muli wewe.

¹⁴ “Utaezya ukutumpoka umuomvi wino walemba incito, umupina nupya wino uulilwa, cisi cimwi angaya umwina Izlaeli nanti sile umwenyi kwene wino wiza wikala mu musumba onga pa misumba inu.

¹⁵ Cila wanda lino ilanzi litali liwe ulinzile kumulipa, pamulandu wakuti wene umupina nupya akupaalila kulipilwa. Pano limwi angailizyanya kuli Yawe nga nawe ungapelwa umulandu wa kwifya.

¹⁶ “Akwasi yatalinzile ukukomwa pamulandu wa nkota zya ana yao, na ana nayo yatalinzile ukukomwa pamulandu wa nkota zya akwasi yao. Cila muntu alinzile ukukomwa pa nkota zyakwe.

¹⁷ “Mutaezya kufyengelekezya ainamasi na ana asyale pa nsambu zyao. Nupya mutaezya kutoola cakuzwala cakwe mukamfwilwa kuti ciye kamukole pa nkongole zino amukwatile.

¹⁸ Mwaiusya ukuti mwemo mwali azya mu Eguputo nga nu kuti Yawe Leza winu wamucisile ukuya antungwa. Uli mulandu uno natimupeela ilamulo lii.

¹⁹ “Lino mwakolonganika ivyakulya nu kuposiwa kukoozya ingano zimwi zino mwatimusinza, mutakezye kuswilila ukuya zitola. Zilinzile zisyalile ainamasi, ana asyale, na yamukamfwilwa, pakuti Yawe Leza winu akamupolelele muli vyonsi vino mulacita.

²⁰ Lino mukukulula iviseekwa ku miolivi, mutakezye kuswilila ku kukulula vivyo ivyativisyala. Vyene ivya inamasi, na ana asyale, nga na yamukamfwilwa.

²¹ Lino mwakolonganika amatingi inu iila lyonga, mutakezye kuswilila mwenemo iila lyakwe ciili ku kukolonganika nupya. Amatingi asyala mulinzile kusila ainamasi, ana asyale, na yamukamfwilwa.

²² Mwaiusya ukuti mwemo mwali azya mu Eguputo. Uli mulandu uno natimupeela ilamulo lii.