Malango 23 - Amazwi Yakwe Leza 2013

Ukusukulwa mu antu yakwe Leza

¹ “Umuntu wensi wino yatungula, nanti wino yaputula uonsi, asi wakuminkanya mu antu yakwe Yawe.

² “Mwana uwamu mbali nawe asi wakuminkanya mu antu yakwe Yawe. Ukulundapo na amu mupanda wakwe kwene yano umwana wiyo alakwata, nanti ivizikulula vyakwe kwene, ukufika mu mukulo uwalenga ikumi.

³ “Kusi umwina Amoni nanti umwina Moabu umwi, nanti amu mupanda wao kwene, ukufika mu mukulo uwalenga ikumi wino munguminkanya mu antu yakwe Yawe.

⁴ Yene yamwimile amanzi ni vyakulya lino mwafumile ku Eguputo, nupya yamwamile Balamu umwana wakwe Beoli, ukufuma ku musumba wa Petoli ku Mesopotamya ukwiza mutipwila.

⁵ Lelo Yawe Leza winu wakanyile ukuvwa intipu zyakwe. Mucifulo cakwe cico wene wasenwile intipu kuti zingaya upolelelo, pamulandu wakuti Yawe Leza winu watemwa mwemwe.

⁶ Ukufika sile na pano mulayelelela wa mutundu, mutakezye ukucita akantu kali konsi aka kwazwilizya imitundu iyo nanti ukuilenga ukuya nu longo.

⁷ “Mutakezye ukusuula aina Edomu, pano yene antu inu. Nupya mutakezye ukusuula aina Eguputo, pano mwatenzi mu mpanga yao.

⁸ Ana yao, alavyalwa ukufuma na pa mukulo wakwe citatu yene mungayapendela mu antu yakwe Yawe.

Umulandu wakusunga kamba ka asilika usaka

⁹ “Lino muli pa kamba ka asilika mu nsita ya nkondo, muce mwaisunga ningo ku vyamakowezya vyonsi.

¹⁰ Ndi cakuti umuntu umwi waikowezya pamulandu wa kuomba ukwisika lino akulota usiku, wene alinzile kufumila ukunzi ya kamba akuno aye aikale.

¹¹ Lino ilanzi lyaya pipi nu kuwa wene alinzile aowe ku mwili, nga lino ilanzi lyawa lyene angaswilila mu kamba.

¹² “Muce mwakwata incende iya cimbusu ukunzi ya kamba ka asilika kuno mungaya ku kuyazwilizya mweisikulu.

¹³ Muce mwasenda cimwi cakuomvya pa kwimbila iciwina ica kuyazwilizyapo, alino nu kuzikila pano mwali mwikala pacisila ca kuyazwilizya.

¹⁴ Fwandi muce mwasunga ningo kamba kinu ka asilika mu usaka, pamulandu wakuti Yawe Leza winu amayanga namwe mu kamba ka asilika, kuti amucingilile na kuti amupeele ucimvyo pa anisi inu. Mutakezye ukucita icintu nanti cimwi cawinyi cino cingalenga Yawe amufutatile.

Amasunde apusanepusane

¹⁵ “Umuzya ndi wapuuka ku mwene wakwe, nga aiza azina kunuli, utaca uleke aswilile kweneko.

¹⁶ Wene angikala mu musumba uli onsi uno wasolola, nupya mutalinzile kumusokonda uluku uluku.

¹⁷ “Pano muli kutakaye umonsi nanti umwi uwakuya kacita wa uzelele uwaku Ng'anda ikulu yakwe Leza.

¹⁸ Nanti ulupiya kwene luno yangakwilila umu nzila iyo lusi lwakwezya kutwala mu Ng'anda ikulu yakwe Yawe Leza winu, pa kuya fikilizya ulayo uno walavile kunoli. Yawe wapata yakacita ya uzelele aku Ng'anda ikulu yakwe Leza.

¹⁹ “Lino mwakongwesya umwina Izlaeli muzo ulupiya nanti ivyakulya nanti icili consi, mutakezye ukumulifya kalowa.

²⁰ Umwinamasi wene mungamulifya kalowa, lelo umwina Izlaeli muzo wene foo. Muce mwayela isunde lii, nga lyene Yawe Leza winu alamupolelela muli vyonsi vino mulacita mu mpanga ino mwasya mupoke nu kwikala mwenemo.

²¹ “Lino walaya kuli Yawe Leza wako, utakezye ukufutokela pa kucita cino walavile, pamulandu wakuti Yawe Leza wako alakupeelelapo umulandu pa ulayo wako nga nawe ulaya nu mulandu wa kwifya.

²² Ukukana laya cimwi kuli Yawe lisi iifyo awe,

²³ lelo ndi waitemelwa sile wenga ukulaya ukucita cimwi, lyene fwandi ulinzile wacicita.

²⁴ “Lino mwapita mu calo ca matingi ica muzo, mungalya viseekwa vyamu calo cakwe pano mutemilwe. Lelo cisi cakwezya ukufundila vimwi vyakuti musende.

²⁵ Lino mwapita mu calo ca ngano ica muzo, mungakompola mwenemo utumitwe tumwi tumwi nu kupukusa impece mulye nu kulya. Nga lelo mutakezye kutoola umupeni nanti icikwakwa alino mutandike nu kusinza.”