Malango 22 - Amazwi Yakwe Leza 2013

¹ “Ndi walola masaye nanti imfwele ya muzo yatiponga, utapupuzya. Lelo ulinzile kumusenda nu kumuswilizya kunoli.

² Lelo umwine wa nyama iyo ndi akaikala ukutali nanti ndi cakuti utamumanyile, lyene ulinzile kusenda inyama iyo ukwako nu kuisunga kufika lino umwine aliza kwiza ilonda. Alino lyene uce umupeele.

³ Ulinzile ukucita icili cimwi ndi wazana punda, nanti insalu, nanti icili consi cino munyonko wataponzya. Utezya kupupuzya.

⁴ “Ndi cakuti walola punda wa muzo nanti masaye wakwe watapona pansi mu museo, utezya upupuzye. Lelo mwazwe ukukatusya inyama iyo nupya.

⁵ “Anaci yatalinzile kuzwala vyakuzwala vya onsi, nga aonsi nayo yatalinzile kuzwala ivyakuzwala vya anaci. Yawe Leza winu wapata yao akacita vintu ivyamusango uu.

⁶ “Ndi cakuti wazana icinsanzo ca cunyi ku muti nanti pansi nga ni cunyi ala cundatile mayayi nanti cifukatile ana, lyene utalinzile kusenda nyina kumwi na ana.

⁷ Ungatola ana, lelo usininkizye ukuti nyina wa tunyi wapita, pakuti uce uye nu longo nu kwikala amanda avule.

⁸ “Lino wakuula ing'anda, sininkizya ukuti wandila ningo ukulizizya ipaala. Lyene umwi ndi wapona api paala lilyo nga nu kufwa wafwa, ale wemo utalapeelwa umulandu.

⁹ “Utakezye ku komela imbezu zili zyonsi mu calo umuli amatingi. Ndi wacita cico, ale lyene utalazumiliziwa kuomvya amatingi yayo nanti imbezu zizyo.

¹⁰ “Utakezye kunyepelela masaye na punda ukwi yoko lili lyonga lino ukulima.

¹¹ “Utakezye kuzwala cakuzwala icapikulwa nu usavu wakwe pamba nga ni nsalu itelepelele.

¹² “Mulinzile mwasumilila amansenkewele ku masempele ya vyakuzwala vinu.

Amasunde akumile ku kufuntuka ku vyauzelele

¹³ “Ndi cali umonsi umwi watwala umukazyana nga pacisila cakumumanya welenganya ukuti atakumulonda.

¹⁴ Caleka amutumpwila, nu kupeela umboni waufi uwakumupeela umulandu wakuntaya a nacisungu pa nsita ino wamutwite.

¹⁵ “Ndi cii cacitika, ale lyene isi na nyina wa mukazyana wiyo yalinzile kusenda insalu ya pa winga ino ikweti imbuza yakusininkizya ukuti umukazyana wiyo atatala wamanya umonsi. Alino lyene yaitwale ku cilye ca milandu ca makombe amu musumba.

¹⁶ Alino isi wa mukazyana avwange ku makombe yayo ati, ‘Napomile umwana wane kaci ku monsi wii, nga lelo atamukasi.

¹⁷ Wene watamutumpwila, nu kuvwanga ukuti umukazyana wii walanga wamanya umonsi lino wamutwite. Lelo icisinka aeci cakuti umwana wane kaci wali a nacisungu. Lolini imbuza ya cisungu aeyi pa cakuzwala ca winga!’

¹⁸ Lyene inkombe zizyo zyamu musumba yalinzile kulema iya wa mukazyana nu kumuma.

¹⁹ Nupya yalinzile kumulifya impiya zyakwe siluva ukulingana umwanda onga nga yazipeele kuli isi wa mukazyana wiyo atatala wamanya umonsi, pamulandu wakuti umonsi wiyo waleta muzewanya ku mwanaci umwina Izlaeli. Nu kulunda pali cico, wene amatwalilila ukuya umuci wakwe, nupya atangamuta lino acili nu umi.

²⁰ “Lelo ndi cakuti umulandu uwa cumi nga pasi ni cakusininkizya ukuti wene wali u mukazyana atamanya umonsi,

²¹ lyene yalinzile kumuleta ku mulyango wa ng'anda yakwe isi, kuno aonsi amu musumba uwo yalinzile kumutama na mawe mpaka afwe. Wene watacita icansonyi mu Izlaeli apakucita uzelele lino acili mu ng'anda yakwe isi, ala atacili atwalwe. Mu musango uu amuno mulasisya inkota pakasi kinu.

²² “Ndi cakuti umonsi yamulemula akulongozya nu muci wa muntu muze, yoili kwene yalinzile ukukomwa. Mu musango uu amuno mulasisya inkota pakasi kinu.

²³ “Ndi cali umonsi yamuzana akucita uzelele nu mukazyana atatala wamanya umonsi nupya wino yataisya ku monsi muze,

²⁴ mulinzile kufumya yoili kwene kunzi ya musumba nu kuyatama na mawe mpaka yafwe. Mukazyana wiyo alinzile ukufwa pamulandu wakuti atapunzile kuti atuulwe, nanti angala wali mu musumba mukasi muno yange yamuvwe. Umonsi nawe alinzile kufwa pamulandu wakuti wene wacisile uzelele na wino yataisya. Mu musango uu amuno mulasisya inkota pakasi kinu.

²⁵ “Ndi cali umonsi lino ali mu mpanga walema umukazyana ku maka wino yataisya nu kucita icansonyi kunoli, ale lyene umonsi wiyo sile aliwe alinzile ukukomwa.

²⁶ Mutalinzile ukucita icili consi ku mwanaci wiyo, pamulandu wakuti wene atacisile iifyo ilingamulenga ukukomwa. Umulandu uu ukoline nu mulandu wa muntu uwatazanza umuntu muze nu kumukoma.

²⁷ Umonsi wiyo walemile umukazyana wiyo ku maka mu mpanga, nga lelo nanti angala wene wapunzile kuti yamutuule, kutali umwi uwakumwazwa.

²⁸ “Ndi cali umonsi yamuzana watalema ku maka umukazyana atatala wamanya umonsi nupya wino yatataisya, ala akucita icansonyi kunoli,

²⁹ wene alinzile alipile impango kuli isi wa mukazyana, kulingana ni mpiya zyakwe siluva amakumi yasano. Alino lyene amutole aye umuci wakwe, pamulandu wakuti wene wamupatikizye ukucita icansonyi nawe. Wene atangamuta lino acili nu umi.

³⁰ “Kusi umuntu umwi uwa kwezya kumanya umusanzi wakwe isi, pano ale wacita isiku kuli isi.”