Malango 21 - Amazwi Yakwe Leza 2013

Ivikumile milandu ya mutatakuya iya utazi wa katwe

¹ “Nga ndi cali yazana umuntu umwi iyamukoma mu calo mu mpanga ino Yawe akupeela kunomuli, nga nu watamukoma mutamumanyile.

² Intunguluzi zinu pamwi na yakapingula ya milandu yalinzile yaya kweneko nu kupima intampulo ukufuma pa ncende iyo pano icala cazanyilwe kufika na kuli cila musumba uli pipi.

³ Lyene intunguluzi zyamu musumba uwaya pipi na kuno yazanyile icala zilinzile zyasolola indama ino yatatala yaiomvya mu mulimo.

⁴ Alino lyene yaitwale ku cifoloma muno yatatala yalima nanti kukomela, nupya icitatala cakama. Nga kuku akuno yaivune insingo.

⁵ Yasimapepo aina Levi, nayo kwene yalinzile ukuya kweneko, pamulandu wakuti yalinzile kupingula mulandu onsi ukumile kukalala. Yawe Leza winu wayasolola kuti yamutumikila nu kulanda upolelelo pa antu umwi zina lyakwe.

⁶ Alino lyene intunguluzi zyonsi zyamu musumba uli pipi na pa ncende pano yazanyile icala yalinzile yafulalila iminwe yao papela ya ndama iyo

⁷ nu kulanda paswe yati, ‘Swemo tutakomile umuntu wii, nupya tutamanyile uwatacita cii.

⁸ We Yawe, elela antu yako aina Izlaeli, yano wakulwile ukufuma mu Eguputo. Utwelele nupya utatupela mulandu uwa kukoma umuntu wii wino asi nu mulandu.’

⁹ Acino, pa kucita cino Yawe akulonda, mutalapeelwa umulandu wa kukoma.

Ivikumile anaci yano yalema wa anyepwe mu uzya

¹⁰ “Lino Yawe wamupeela ucimvyo umu nkondo nga namwe imusenda yamwi mu uzya,

¹¹ limwi munoyali ungalola umwanaci umwi muyembe wino ungatemwa kuti umutwale.

¹² Senda umwanaci wiyo ukwako, kuno ali nu kupela inyele ku mutwe wakwe, nga aputule ni ngala zyakwe zyaku minwe,

¹³ alino azwale ni vyakuzwala vyuze. Wene alinzile ukwikala umwako nu kulosya akwasi yakwe umwezi upuma. Pacisila cakwe cico, alino lyene ungamutwala.

¹⁴ Lino palapita amanda ndi cakuti utazangile munoli, ale lyene ulinzile kumuta apite konsi kuno akasi. Utalinzile kumucita wa muzya nanti ukumukazya, pamulandu wakuti wamupatikizye ukumanyana na aliwe.

Ica upyanyi icikumile umwana umonsi iyeli

¹⁵ “Nga ndi cali umonsi umwi akweti aci yaili nga yoili kwene yamuvyalila ana, lelo umwana iyeli asi umwana wa mwanaci wino watemwisya.

¹⁶ Lino umuntu wii alelenganya kwankanya icuma cakwe ku ana yakwe, atalinzile ukuya na kasoozi ku mwana wa mwanaci wino watemwisya pa kumupeela icipande ica mwana ali iyeli lyakwe lyamu mwanaci wino atatemwisya.

¹⁷ Wene alinzile kwankanya lili ku mwana wakwe wilya iyeli, nanti angala wene asi umwana wa muci wino watemwisya. Umuntu alinzile kuzumila umwana umonsi iyeli lyakwe nu kumupeela icipande cino wene alinzile kupelwa.

Ivikumile umwana umonsi cipoote

¹⁸ “Nga ndi cali umuntu umwi akweti umwana umonsi wino wakoma umwenzo nupya acisanguka, umwana wino atanga ayele akwasi yakwe, nanti angala yakamusunda.

¹⁹ Akwasi yakwe yalinzile kumutwala ku ntunguluzi zyamu musumba muno akaikala nu kuleka apingulwe.

²⁰ Akwasi yalinzile ukunena intunguluzi zizyo yati, ‘Mwana witu wakoma umwenzo nupya acisanguka nga akakana kutuyela. Wene akaonona impiya mu ukolesi.’

²¹ Lyene aonsi yonsi amu musumba yalinzile kumutama na mawe mpaka afwe, nga vivyo avino mulasisya inkota pakasi kinu. Cila muntu mu Izlaeli aluvwa icacitika nga aye ni ntete.

Amasunde apusanepusane

²² “Ndi cakuti umuntu umwi yamukoma pa nkota zyakwe nga nu mwili wakwe yautana pa cimuti,

²³ ale lyene mutalinzile kusya umwili uwo pa cimuti. Mulinzile kuzika umwili, pamulandu wakuti umwili uno iyatana pa cimuti ukaleta citipu cakwe Leza pa mpanga. Muziike umwili uwo, pakuti mutakowezya impanga ino Leza akupeela kunomuli.”