Malango 20 - Amazwi Yakwe Leza 2013

Isunde lya pamulandu ni nkondo

¹ “Ndi mwaya ku kulwa inkondo, mwalola ukuti anisi inu pamwi ni vilwilo vyao ivya nkondo ivili wa maceleta, ni mfwalasi, vyaluta iviinu ku wingi, mutakuvwe intete. Pano Yawe Leza winu, uwamufumizye mu Eguputo alaya namwe.

² Lino mutacili mutandike ukulwa muleke simapepo aize avwange ku nkolelo ya asilika ati,

³ ‘Mwe ina Izlaeli, muvwikisye! Ilelo mwatimwaya ku nkondo. Mutezya ukoopa anisi inu nanti ukutovoka, nanti ukuleka ukuti amano inu yapelengane.

⁴ Yawe Leza winu amapita namwe, amamupeela na maka akucimvya.’

⁵ “Alino yamusika ya vita yali nu kulunda ukunena asilika yati, ‘Uzye pano panotuli pali umonsi umwi cantete uwakuula ing'anda, lelo atacili aipaatwile Yawe? Ndi cakuti apanoli, cazipa aswilile ukwakwe. Pano limwi ndi yaya yamukoma ku nkondo, ale lyene umuntu muze angapaatwila Yawe ing'anda iyo.

⁶ Uzye pano panotuli pali umonsi umwi uwalema amatingi likwene mu calo, lelo atacili azombole? Ndi cakuti apanoli, cazipa aswilile ukwakwe. Pano limwi ndi waya wafwila ku nkondo, ale lyene umuntu muze angailyokezya waini uwa matingi yayo.

⁷ Uzye pano panotuli pali umonsi umwi wino wataisya? Ndi cakuti apanoli, cazipa aswilile ukwakwe. Pano limwi ndi waya wafwila ku nkondo, ale lyene umuntu muze angatwala umwanaci wino wataisya.’

⁸ Yamusika akalamba ya vita nayo kwene yalalanda ku antu yati,

⁹ Lino yamusika ya vita yamala kulanda kwi uvi, yalinzile kusolola intunguluzi yakwe cila mpuka.

¹⁰ “Lino mukuya ku kuzanza umusumba umwi mulinzile mwatala mwanena aikazi yamwenemo ukuti yacimbe.

¹¹ Ndi cakuti yacimba yaiyulila ni milyango yao, lyene yao yalinzile yaya azya inu nu kumutumikila.

¹² Lelo ndi cakuti yakana ukuicimbila, yasyala yakulonda kuti mulwe nayo, lyene asilika inu yalinzile yazinguluka umusumba uwo.

¹³ Lino Yawe Leza winu wamupeela amaka, mwacimvya nu musumba uwo, mulinzile mwakoma aonsi yonsi pyu mu musumba uwo.

¹⁴ Lyene mungasenda anaci, ana, iviteekwa, nga ni vyasyala vyonsi ivyaya mu musumba uwo. Mwatimukwata insambu iya kuomvya iviya vyonsi vino mwasampa. Yawe watavipeela kunomuli.

¹⁵ Ali vino muce mwacita ku misumba ino yaya ukutali na kuno mukaikala.

¹⁶ “Lelo lino mwaca mwapoka imisumba ya mpanga ino Yawe Leza winu akumupeela iye iyakwinu, muce mukome antu yonsi.

¹⁷ Muce monone yonsi pyu, aina Hiti, aina Amoli, aina Kenani, aina Pelizi, aina Hivi na ina Yebusi, wakwe vino Yawe wapeezile ilamulo kunomuli kuti mucite.

¹⁸ Mulinzile mwayakoma, pakuti yatakaleke kuti mwifye Yawe pakusambilizya mwemwe ukucita vintu vyonsi ivyawinyi vino yakacita mu kupepa tuleza twao.

¹⁹ “Lino mukulwisya ukupoka umusumba umwi mutaca mwezye ukukomola imiti ya viseekwa, nanti angala amanda yangavula uli yano mukwezya ukwingila mwenemo. Mungalya sile iviseekwa, lelo ukukomola imiti kwene foo. Pano imiti asi ali anisi inu.

²⁰ Lelo imiti yuze iyasyala, ino isyaseeka viseekwa, yene mungaikomola nu kuiomvya ku mulimo wa kukuula insakwe navyuze pa nsita ino mucili mukulwisya ukupoka umusumba uwo.”