Malango 19 - Amazwi Yakwe Leza 2013

Misumba iyakuzina mwenemo ndi wacita umulandu

¹ “Pacisila lino Yawe Leza winu wamala ukonona antu aineco ya mpanga ino wene akupeela kunomuli, nga na pacisila lino mwemo mwayacocovya ukunzi nu kwikala mu misumba yao na mang'anda yao,

² lyene muce muipaatwile imisumba itatu ino ili pakasi na nkasi ka mpanga ino Yawe Leza winu akupeela kunomuli.

³ Muce mupange imiseo mwenemo nu kwankanya impanga iyo ino Yawe akupeela kunomuli mu viputulwa vitatu, pakuti wensi uwakoma umuze ali kuno ace autukile ku kuzina.

⁴ Umwi ndi wakoma umuntu muze wino yatapatana mpiti, nu kumukoma atamukomile ku mufulo, umuntu wiyo angapuukila ku musumba onga pali iyo, nu kupusuka ale wapusuka.

⁵ Umukukolanya katuvwange tuti, antu yaili ndi cakuti yaya mu mpanga ku kutema lyene lino wenga akukoma umuti, alino impasa yasokoka yakoma umuze wafwa nu kufwa. Umuntu wiyo uwakoma umuze angapuukila ku muzi onga pali iyo, akuno akazine. Nu kupusuka ale wapusuka.

⁶ Umusumba nao ndi cakuti waya onga sile, impanga ingatalimpisya, cakuti yao angamulondelela ku kulandula yangamuzana nu kumukoma cipyu cipyu lino wene asi nu mulandu, pasi pano citali icipange kuti wene angacita ci ku muze.

⁷ Ali mulandu kwene uno namupeelela ni sunde lya kukwata imisumba iyakuzina mwenemo itatu.

⁸ “Lino Yawe Leza winu alavungulula impanga inu ndi muno walavile ivikolwe vinu, nu kumupeela impanga yonsi wakwe muno walaya,

⁹ lyene muce musolole imisumba nayuze itatu iyakuzina mwenemo. (Wene alamupeela impanga ii ndi cakuti mulacita vyonsi vino nkumupeela ilamulo ilelo kuti mucite, nu kutemwa Yawe Leza winu nga nu kucita iviine na masambilizyo yakwe.)

¹⁰ Ali vino muce mwacita, pakuti antu asi nu mulandu yatakomwa, na pakuti lyene mutakwata umulandu uwa kukoma antu yao asi nu mulandu.

¹¹ “Lelo umuntu ndi wapata umuze nga amuteyamila, amucisa nu kumukoma, alino lyene apuukila ku musumba onga pali iyo iyakuzina mwenemo,

¹² ale lyene intunguluzi zyamu musumba wakwe zilinzile zyatuma inkombe zikamutole nu kumuwezya ku musumba, nga zimupeele mu makasa ya muntu wino akulonda ukucita icilanduzi pakuti nawe amukome.

¹³ Cisi cakwezya ukumuvwila uluse. Mulinzile mwaswefya Izlaeli ku kuya amulandu wa utazi wa katwe, pakuti ivintu vyonsi vikamuzipile.

Isunde lya pali yanande ya vyalo

¹⁴ “Mutaca mwaezya ukufumya ivimanyililo vyakwe yanande ya auzo, yayo yano yapimilwe mpiti mu mpanga ino Yawe Leza winu akupeela kunomuli.

Amasunde yakwe yakambone

¹⁵ “Kambone ndi waya wenga atange asinile umuntu ukuti ali nu mulandu, suka yaye yaili nanti yatatu lyene ayano yangamusinila ukuti ali nu mulandu.

¹⁶ Ndi cakuti umuntu umwi akulonda ukufyengelekezya umuze pakumutumpwila umulandu,

¹⁷ antu yayo yoili kwene yali nu kuya imilila mumu kwene pa manso yakwe Yawe, na yasimapepo na yakapingula ya milandu yano yalazanwamo pa manda yayo kwene.

¹⁸ Yakapingula ya milandu nayo yace yalondelezye ningo umulandu. Ndi cakuti yaca yazana ukuti umuntu wiyo akutumpwila umuze umwina Izlaeli,

¹⁹ ale lyene umuntu wiyo ali nu kuvunukwa wakwe vino wene wakasi umuze avunukwe. Mu musango kwene uu, ali vino mulaiswefya pa kufumya ulukota luu pakasi kinu.

²⁰ Lyene antu yonsi lino yaca yuvwa vivyo, yalaya ni ntete, cakuti kutalaya nanti umwi uwakuti aswilizye icamusango ndi uwo.

²¹ Mutakezye ukukwata uluse, awe. Muce mwalinganya sile. Uwakoma nawe akomwe, nu watonkola umuze ilinso nawe yamutonkole ilinso, nu wakuula umuze ilino nawe yamukuule ilino, nu waputula umuze icizanza nawe yamuputule icizanza, nu waputula umuze ulwazo nawe yamuputule ulwazo.”