Malango 18 - Amazwi Yakwe Leza 2013

Icipande cakwe yasimapepo

¹ “Yasimapepo aina Levi, yene yatalinzile kupelwa icipande icili consi ca mpanga mu Izlaeli. Mu cifulo cakwe cico, yene yali nu kupelwa amawila akocela Yawe, pano ali vyaupyanyi vyao.

² Yene yatalinzile yakwate impanga, ndi vino imitundu yuze yakwata. Yawe ali cipande cao, wakwe vino wene wayalavile.

³ “Lyonsi lino antu yapeela impolelwa, usi mulandu ingaya a cipambasi nanti imfwele, yasimapepo yalinzile kupelwa icilumbi, ni camvu ca pansi, nga ni cituka.

⁴ Yene yalinzile kupelwa iviseekwa vyankolelo ivyapa mbezu, na waini, na mafuta ya miolivi, nga na pamba.

⁵ Pano Yawe Leza winu uwasolola umutundu wa ina Levi kuti wamutumikila wakwe yasimapepo amanda pe.

⁶ “Umwina Levi ali wensi wino akasi angiza ku ncende yonga iyakupepela penepo ukufuma ku musumba uli onsi mu Izlaeli.

⁷ Nga wene angatumikila kuku wakwe simapepo wakwe Yawe, vivi kwene wa ina Levi yauze akatumikila kuku pa manso yakwe Yawe.

⁸ Wene alinzile kupelwa cipimo icili cimwi ca vyakulya ndi cico cikapelwa kuli yasimapepo yauze, nupya wene angasunga icili consi cino ang'anda yakwe yamutumila.

Amazwi akusoka pamulandu wa vicitwa vya antu asyenzi

⁹ “Lino mulingila mu mpanga ino Yawe Leza winu akupeela kunomuli, mutaca mulondele vicitwa vyawinyi vino antu amu nko zizi yakacita.

¹⁰ Mutakezye kuleka umwi uwa munomuli azanwe akupeela umwana wakwe umonsi nanti umwanaci impolelwa pa moto pa kavuwa, nanti kusapola nanti ukucita vya uncimya nanti vya ulozi

¹¹ nanti vya malele, nupya mutaleka yauzya ku mipasi nanti ku antu afwe.

¹² Yawe wapata umuntu ali wensi wino akacita vintu vii vyawinyi, nupya uli mulandu uno wene akuzinga inko zizi mu mpanga ilya lino mwemo mukuya pa nkolelo.

¹³ 13 Mulinzile ukuya aula mulandu pa manso yakwe Yawe.

¹⁴ Antu amu nko zino mulapoka impanga yakauvwa kuli yao akasapola nu kuuzya ku mipasi. Lelo mwemo Yawe Leza winu atamuzumilizya ukucita vivyo.

¹⁵ “Yawe Leza winu alamutumila kasema akoline nani ukufuma mu antu inu kwene, nga namwe mulinzile mwamuyela.

¹⁶ “Pa wanda uno mwakongine pa Mwamba wa Holebu, mwemo mwapapasile ukuti mutuvwa kuno Yawe akulanda nanti kulola cimbilimbili cakwe ca moto cakoofya, pamulandu wakuti mwali ni ntete zyakuti mungafwa.

¹⁷ Acino Yawe wavwanzile ati, ‘Cino yalenga icamano.

¹⁸ Ndayatumila kasema akoline nawe ukufuma mu antu yao kololo. Ndamunena ivya kuvwanga, nga nawe alayanena vintu vyonsi vino ndamupeela ilamulo kuti alande.

¹⁹ Ndi umwi ataluvwa nu kuyela amazwi yano kasema wiyo alavwanga umwi zina lyane, nene kwene nemwisikulu ndavunuka umuntu wiyo.

²⁰ Lelo ndi kasema ali wensi camukumba ukwezya kulanda mwi zina lyane lino nemo ntamupeela ilamulo kuti acite cico, wene alinzile akomwe, nga vivyo kwene avino mukacite na kuli kasema akalanda mwi zina lyakwe tuleza tuze.

²¹ “Manye mungayuzya mweisikulu muti, ‘Uzye lyene tungamanya uli ndi cakuti ilandwe lilyo litalandwa na Yawe?’

²² Ndi cakuti vino kasema wiyo wavwanga apaswe mwi zina lyakwe Yawe vitafikiliziwa, ale lyene lisi ilandwe lino Yawe wavwanga. Kasema wiyo waivwangila sile ivyakwe, nga mutakezye kumoopa.”