Malango 17 - Amazwi Yakwe Leza 2013

¹ “Mutakezye ukupeela Yawe Leza winu impolelwa ya ng'ombe nanti imfwele ilemale. Yawe wapata cico.

² “Limwi munguvwa ukuti mu musumba onga pa misumba inu umonsi nanti umwanaci umwi wataifya kuli Yawe Leza winu pakonona upangano,

³ pakupepa nu kutumikila tuleza tuze nanti ilanzi nanti umwezi nanti intanda, vivyo ivitaine na malamulo yakwe Yawe.

⁴ Ndi cakuti icamusango uwo cuvwika ku matwi inu, lyene mulinzile ukulondelezya umulandu ningo. Ndi cakuti icacumi ukuti icamusango uwo caticicitika mu Izlaeli,

⁵ muce musende umuntu wiyo ukunzi ya musumba nu kumutama na mawe mpaka afwe.

⁶ Lelo kwene pakuti mumutame na mawe afwe, palinzile paya ya kambone yaili nanti ukuluta penepo, akumusinila. Mutalinzile ukumutama na mawe mpaka afwe ndi cakuti kambone waya wenga sile.

⁷ Nupya yakambone kwene alinzile ukutandikilapo ukumutama na mawe, alino antu nayo yakonkezye. Umu kucita cii ali muno mungaifumizya ulukota luu.

⁸ “Limwi mungazana ukuti imilandu imwi iyacikaya yatala wakwe cimwi ukupingulwa kuli yakapingula akaya. Imilandu iyo ili wa nsambu zya cuma ca muntu, ukucisa umuntu, nga nu kukoma umuntu ukumufulo nanti ukwaula umufulo. Lino icamusango ndi uwo cacitika, cakuti cacuzya yakapingula, muce mwaya ku ncende iya kwene iya kupepela penepo.

⁹ Muce mwatuula umulandu kuli yasimapepo aina Levi na yakapingula alaya pa luti pa nsita ilya kwene iya mulandu, nga nayo yalapingula umulandu.

¹⁰ Yene yalapingula umulandu, nga namwe mule mukulondela vyonsi vino yakumunena, pa ncende iya kwene iya kupepela penepo

¹¹ Muce mwazumila vino yakupingula nu kulondela vino yamutungulula ukucita.

¹² Umwi ndi wacita imisuli kuli kapingula nanti kuli simapepo wino ali pa luti, wene alinzile ukukomwa. Umu kucita cii ali muno mungafumya ulukota luu mu ina Izlaeli.

¹³ Lyene antu yonsi yaluvwa icacitika, yaye ni ntete, nga kusi umwi alacita icamusango uwo nupya.”

Amasunde yano umwene alinzile kulondela

¹⁴ “Pacisila lino mwapoka impanga ino Yawe Leza winu akumupeela, nu kwikala mwikala mwenemo, lyene mulalonda ku kwata umwene wakwe vino inko zyonsi izyamuzinguluka zyakwata.

¹⁵ Mukasininkizye ukuti umuntu wino mwasolola awiyo wino na Yawe Leza winu angamusolwela. Wene alinzile waya aumwi uwamu antu inu. Mutakezye ukuteeka umwinamasi pa cilimba kuti aye umwene winu.

¹⁶ Umwene atalinzile ukukwata imfwalasi zivule wakwe cimwi, nanti ukuleka antu yaswilile ku Eguputo ukuya kala imfwalasi nazyuze, pamulandu wakuti Yawe walanda ukuti antu yakwe yataca yezye ukuswilila ku Eguputo nupya.

¹⁷ Umwene atalinzile kukwata aci avule, pamulandu wakuti cii cingalenga ukuti amfutatile. Nupya atalinzile ukuitulikila icuma icivule wakwe cimwi, icili wakwe siluva na zaabu.

¹⁸ Lino umuntu waya u mwene, alinzile wakwata ulupapulo lwa masunde na masambilizyo yakwe Leza yano yambulwilwe ukufuma mu lupapulo lwankolelo ulwasungwa na yasimapepo aina Levi.

¹⁹ Ace asunga ulupapulo lulo umupipi, nupya ace awelenga mwenemo amanda yonsi yano alikala pano nsi. Ali pakuti akasambilile ukoopa nu kucindika Yawe Leza wakwe nu kuyela ivintu vyonsi ukulingana na malamulo aya mwenemo.

²⁰ Cii, cilalesya umwene wiyo ukuitutumula pa ina Izlaeli yauze. Nupya cilamulesya ukukana yela amasunde yakwe Yawe umu nzila ili yonsi. Lyene umwene wiyo pamwi nayauze amu mupanda wakwe alamulondelela icisila yalaya yamwene mu Izlaeli pa manda avule cuze.”