Malango 16 - Amazwi Yakwe Leza 2013

Cimulo ca Ucilo

¹ “Muce mwacindika Yawe Leza winu mu kuwaka kuzevya Cimulo ca Ucilo mu mwezi wa Abibu, pamulandu wakuti ali mwezi kwene uno wamufumizye mu mpanga ya Eguputo, usiku.

² Muce mwaya pa ncende ili yonga kwene iyakupepela penepo. Ali pano muce mwafyulila imfwele yonga pa mfwele zinu nanti ing'ombe, wa mpolelwa ya Cimulo ca Ucilo kuli Yawe Leza winu.

³ Apa kulya icakulya cico mutakezye ukulya imikate umuli icitutumusi. Pa manda cinimbali musi nu kulya umukate umuli icitutumusi, wakwe vino mwacisile lino mwafumile mu mpanga ya Eguputo mu lwilo. Mukalye imikate iyo wa mikate ya ucuzi, pamulandu wakuti ilamwiusya vino mwacuzile cakuti amanda yonsi yano mulikala pano nsi mulaiusya uwanda ulya uno mwafumile mu mpanga ya Eguputo.

⁴ Pa manda cinimbali patace pakaye umuntu nanti wenga uwakusunga icitutumusi mu ng'anda yakwe pali pamwi ni nyama ino mwafyuzile lino ilanzi lyawile pa wanda wa kutandika amanda yayo.

⁵ “Mutakezye ukufyulila inyama ya mpolelwa ya Cimulo ca Ucilo pasi pa ncende yonga kwene ino Yawe Leza winu alamupeela.

⁶ Muce mwazifyulila sile pa ncende ino wene alasolola iyakupepela penepo. Nupya insita ya kufyulila penepo alilya lino ilanzi lyatilyawa, pa kulinganya insita ilya kwene ino mwafumile mu Eguputo.

⁷ Muce mwaeleka nu kuilila pa ncende ilya kwene yonga mpo iyakupepela penepo. Alino lyene akatondo imuswilila kumwinu.

⁸ Pa manda mutanda muce mwalya imikate isi na citutumusi. Lelo pa wanda uwalenga cinimbali, muce mwakongana pamwi nu kucindika ca pamwi Yawe Leza winu, nupya kusi ukuomba umulimo pa wanda uwo.

Cimulo ca Uzombozi

⁹ “Muce mwapenda imilungu cinimbali ukufuma pa wanda uno mwatandika ukuzombola ingano zinu,

¹⁰ alino lyene imuzevya Cimulo ca Uzombozi, ukucindika Yawe Leza winu, pa kumuletela uwila wa kuitemelwa ukulingana na vino wene wamupolelela.

¹¹ Muce mwasansamuka pa manso yakwe Yawe Leza winu, mwemwe pali pamwi na ana inu, na aomvi inu, na ina Levi, na inamasi, na ana asyale, alino na yamukamfwilwa yano mukaikala nayo. Muce mucite cii pa ncende yonga iyakupepela penepo.

¹² Mwaiusya ukuti mwali azya mu mpanga ya Eguputo, ali cino fwandi mulinzile ukulondela amalamulo yaa ningo.

Cimulo ca Nsakwe

¹³ “Lino mulamala ukupuula ingano pa lwano nu kufena amatingi inu yonsi, ali lino muce mwazevya Cimulo ca Nsakwe pa manda cinimbali.

¹⁴ Muce mwasansamuka pamwi na ana inu, na aomvi inu, na ina Levi, na inamasi, na ana asyale, alino na yamukamfwilwa yano yakaikala mu misumba inu.

¹⁵ Muce mwacindika Yawe Leza winu pa kuzevya icimulo cii pa manda cinimbali pa ncende yonga ino Yawe alasolola. Mulinzile mwaya ansansa pano Yawe watamupolelela ni vyauzombozi alino ni milimo inu.

¹⁶ “Fwandi aonsi yonsi amu luko lwinu yalinzile yiiza ku kulongana nu kupepa Yawe amaila yatatu pa mwaka pa ncende yonga iya kupepela penepo, pa nsita ya Cimulo ca Mukate usi na Citutumusi, ni Cimulo ca Uzombozi, nga ni Cimulo ca Nsakwe. Cila muntu alinzile ukuleta uwila

¹⁷ ukulingana na vino Yawe wamupolelela.

Yakapingula ya milandu

¹⁸ “Mu misumba inu yonsi ino Yawe Leza winu alamupeela muce musonte mwenemo yakapingula ya milandu pali pamwi na makombe ukufuma mu nko zinu zyonsi. Antu yao, ali yano yalapingula auze ukwaula kasoozi.

¹⁹ Yene yasi nu kuya nu lufyengo nanti akasoozi pa kupingula. Nupya yatalinzile ukutoola amafukakanwa, pano amafukakanwa yakapafuzya antu ya mano na acumi kwene, nu kuleka kuti yatapingula ningo.

²⁰ Fwandi cisi cakwezya ukuya nu lufyengo nanti akasoozi, pakuti mukapoke nu kwikala mu mpanga ino Yawe Leza winu akumupeela na pakuti muce mwikalilile mwenemo.

²¹ “Lino mwaca mumakuulila Yawe Leza winu kavuwa, mutakezye ukusimpa mu mbali ya kavuwa kako ulucesi lwa cimuti ulwa cimanyililo cakwe kanamwene ka Asyela.

²² Nupya mutakezye ukusimpa ulucesi lwa mawe apakwika akaluwi akakuti mwapepa, pano Yawe Leza winu wapata ivintu vii.”