Malango 14 - Amazwi Yakwe Leza 2013

Imilosezye iipe Yalesiwa

¹ “Mwemwe antu yakwe Yawe Leza winu. Ali cino fwandi lino mukulosya, cisi cakwezya ukuicembola inkalo nanti ukupela ulukuzu.

² Mwemwe antu yakwe Yawe Leza winu, yano waisolwela umwisikulu pa mitundu yonsi iya pano nsi kuti muye antu yakwe kololo.

Inyama zikowele ni zisi zikowele

³ “Mutakezye ukulya icintu icili consi cino Yawe walanda ukuti icikowele.

⁴ Inyama zino mungalya aizi: ing'ombe, imfwele, imbuzi,

⁵ inyama izyakola impelembe, mpombo, inswela, muula, intandala, icuzwe, taala, inkonsi,

⁶ alino ni nyama ili yonsi ino yapanduka ulukamba nupya ino ikasyetulula nanti ukulukizya.

⁷ Lelo mutalinzile ukulya inyama izikalukizya sile ivyakulya zino zitakwata ulukamba ulupanduke, nanti inyama iyapanduka ulukamba lelo isilukizya. Inyama zya musango uwo, ingamila, tukalulu na tupiimbi. Inyama zizyo izikowele, pamulandu wakuti zyakwata imfumbi nanti angala zikalukizya.

⁸ Mutakezye ukulya yakapoli. Nanti angala yene yapanduka ulukamba, lelo yasilukizya. Mutakezye ukulya inyama zizyo nanti ukukumya ku vitumbi vyakwezyo.

⁹ “Mungalya inswi izya musango uli onsi zino zikweti utunkupili na mamba.

¹⁰ Lelo icili consi icikaikala mu manzi cino citakwata utunkupili na mamba mutakezye ukulya. Kunomuli icikowele.

¹¹ “Mungalya icunyi icili consi cino cisi cikowele.

¹² Lelo mutakezye ukulya ivyunyi vii: lyang'anda, sinsimwe, amakozi,

¹³ utukozi, ivipululu,

¹⁴ yamwankole amusango uli onsi,

¹⁵ yambaza na yacipungu,

¹⁶ utupululu tunono, ivipululu vikulu, ni vitiswe,

¹⁷ ivipululu ivyamu lwanga, iming'omba,

¹⁸ utunga, imilima, imbuni, na vyonsi ivikalya ivikwe, ivyunyi ni nyama zyuze.

¹⁹ “Ivizizi vyonsi ivikapapuka ivikowele kunomuli. Mutakezye ukuvilya.

²⁰ Mungalya ivizizi vyonsi ivisi vikowele.

²¹ “Mutakezye ukulya icintu icili consi icaifwila. Umwinamasi uwiza wino mukaikala nawe mungamupeela alye. Ndi mukasi mungakazya ku inamasi yauze. Lelo mwemwe yakwe Yawe Leza winu. Mwemwe antu yakwe. “Mutakezye ukwelekenkanya akana ka mbuzi nanti aka mfwele mwi ziya lyakwe nyina.

Isunde lya kupaatula icikumi

²² “Mulinzile mwapaatula icikumi ica pali vyonsi vino mukazombola mu vyalo vinu cila mwaka.

²³ Alino muce mwaya pa ncende yonga sile ino Yawe wasolola ukuti ingaya incende ya cifulo ci zina lyakwe. Kuko kwene pa manso yakwe Yawe Leza winu ali kuno mungaliila icipande conga pa vintu ikumi ivya uzombozi winu, ivili wa vilimwa, waini, amafuta ya miolivi alino na mayeli ya ng'ombe zinu ni mfwele. Muce mwacita vivyo pakuti musambilile ukulanga icoopo kuli Yawe Leza winu mu nsita zyonsi.

²⁴ Ndi cakuti incende iya kupepela penepo ili ukutali na kuno mukaikala, cakuti mungaposiwa ukutwala icikumi cinu kweneko ica pali vino Yawe watamupolelela, lyene mucite vii.

²⁵ Kazini icikumi cico, nga mutole impiya zizyo muzitwale ku ncende yonga iyakupepela penepo.

²⁶ Muomvye ulupiya lulo pa kukala icintu icili consi cino mukulonda, ivili wa ng'ombe, imfwele, waini, uwengwa, nanti icili consi cino mukasi kukala. Alino lyene mwemwe pamwi na amu ng'anda zinu muce mwaipakizya nu kusansamuka pa manso yakwe Yawe Leza winu.

²⁷ “Mutakezye ukutazyela aina Levi yano yakaikala mu misumba inu. Yene yatakwata impanga pali vino vyankanyiziwe.

²⁸ Lyonsi ndi papita imyaka itatu, mu mwaka wakwe citatu kwene pa mpela, muce mwatola icikumi consi ica mu vilimwa vinu nu kucikoozya mu misumba inu.

²⁹ Ivyakulya vivyo vilaya ivya ina Levi, yao atakwata impanga wakwe mwemuno mwasyala, na inamasi, na ana asyale, na yamukamfwilwa, yano yakaikala mu misumba inu. Yene yalinzile kwiza tola vyonsi vino yuulilwa. Muce mwacita vivyo pakuti Yawe Leza winu ace amupolelele mu milimo inu yonsi.”