Malango 13 - Amazwi Yakwe Leza 2013

¹ “Panomuli pangaloleka kasema nanti kalondolola umwi uwa viloto, atandike nu kumunena cimanyililo cimwi ca cinjelengwe nanti cizungusyo,

² pakuti amukoope ku kupepa nu kutumikila tuleza tuze tuno mutatazile mupepe. Nanti angala cino walaya ciza cafikiliziwa,

³ mutakezye ukusumbako amano kunoli. Yawe Leza winu akuomvya kasema wiyo kuti aezye mwemwe, pakuti alole ndi cakuti mwamutemwa ni myenzo inu yonsi nga nu umi winu onsi.

⁴ Fwandi muce mwalondela Yawe Leza winu nu kumupeela umucinzi. Sungini amasunde yakwe nu kumuyela. Mwamuombela nu kuya akutailwa kunoli.

⁵ Lelo Kasema wiyo na kalota wa viloto alinzile akomwe, pamulandu wakuti wene akunena antu ukusangukila Yawe Leza winu, wino wamufumizye mu Eguputo, mumo muno mwali azya. Antu amusango uu ankota nupya yakwezyo ukumufumya ku kwikala umi uno Yawe wapeezile ilamulo ukuti avino mwaikala. Yene yalinzile yakomwa, pakuti musisye inkota ii pakasi kinu.

⁶ “Umunyonko umwi nanti umwana wako umonsi nanti umwanaci, nanti umuci wako wino watemwa nanti acuza wako uwapa mwenzo angezya ku kutunkola mu umfisolo kuti wapepa tuleza tuze, tuto tuno ivikolwe vinu vitatazile vipepe.

⁷ Apa antu yayo umwi angiza akutunke kuti wapepa tuleza twa mitundu ino yamuzinguluka ni mitundu ino yaya ukutali.

⁸ Lelo mutakezye ukumuvwa. Cisi cakwezya ukumuvwila uluse. Nupya asi wakucingilila.

⁹ Cumi kwene mulinzile kumukoma. Wewe kwene ulinzile ukutandikilapo ukumutama iwe alino yauze yalondelelepo.

¹⁰ Uwakutama na mawe mpaka afwe! Wene wezizye ku mufumya kuli Yawe Leza winu, wino wamutuuzile ukufuma mu Eguputo, muno mwali azya.

¹¹ Lyene aina Izlaeli yaluvwa icacitika, yaye ni ntete, nga kusi umwi alacita ulukota lwa musango uwo nupya.

¹² “Lino mukwikala mu misumba ino Yawe Leza winu akumupeela, limwi munguvwa

¹³ ukuti antu yamwi awelewele yatiyazunya akaya amu misumba iyo pakuti yatumikila tuleza tuze tuno mutatala mwapepa.

¹⁴ Ndi muvwa impwelo iya musango uu, mulinzile kulondelezya ningo. Ndi cakuti icacumi umuntu wiyo wacita icamusango uu,

¹⁵ lyene mukome antu yonsi kwene amu musumba uwo kumwi ni viteekwa vyao vyonsi. Monone nu musumba uwo muumalilile.

¹⁶ Alino lyene muce mukolonganike iviya vyonsi ivyamu musumba uwo apakasi ka musolo. Ali pano muce mukavyoce wa wila wakoca onsi kuli Yawe Leza winu. Umusumba uwo ulinzile wasyala itongwa, nupya cisi cakwezya uku ukuululula cipya cipya.

¹⁷ Apa vintu vino vyativiundwa cisi cakwezya ukusunga nanti cimwi, pali pakuti namwe kwene Yawe atakaye nu ukali panomuli nupya ace amwelele. Wene alaya na mizu kunomuli nu kuleka kuti musanduluke, wakwe vino walavile ivikolwe vinu,

¹⁸ cikulu sile namwe mwayela Yawe Leza winu, nu kusunga amalamulo yonsi yano nkumupeela pilelo nu kucita ivilungame pa manso yakwe.”