Malango 11 - Amazwi Yakwe Leza 2013

Ukulu wakwe Yawe

¹ “Mwatemwa Yawe Leza winu nu kuyela amasunde yakwe na malamulo yakwe yonsi mu nsita zyonsi.

² Mwiusye ukuti mwemuno mwasundwa amwemwe, asi ana inu foo. Asi aliyo yaweni nu kukumako ku kusunda kwakwe Yawe Leza winu. Amwemwe sile mwailolile ukulu wakwe Yawe, na maka yakwe, ulamba wakwe,

³ ni vinjelengwe vyakwe. Mwailolile ni vintu vino wacisile kuli Falao umwene waku Eguputo nu ku mpanga yakwe yonsi.

⁴ Mwailolile vino Yawe walovizye ivita vya ina Eguputo, kumwi ni mfwalasi na maceleta yao, pa kulenga kuti yamwele muli Yemba Muyenzu lilya lino yacocovyanga mwemwe.

⁵ Alino na pali vino wamucitile mu lwanga mpaka mwiza mufika pa ncende ii.

⁶ Mwiusye vino wene wacisile kuli Datani na Abilamu, ana aonsi yakwe Eliabu uwamu mutundu wakwe Lubeni, lino umusili walepwike nu kuyatuwizya kumwi na amu ng'anda zyao, na mataalu yao, na aomvi yao kumwi ni viteekwa vyao, pa manso ya ina Izlaeli yonsi.

⁷ Mwailolile mweisikulu umulimo ukulu uno Yawe wacisile.

Upolelelo uwamu mpanga ino yalavilwe ku ina Izlaeli

⁸ “Caleka mwayela amalamulo yonsi yano nkumupeela ilelo, pakuti muce mukwate amaka aku lamba Luzi lwa Yodani nu kupoka impanga ino ilaya iyakwinu.

⁹ Na pakuti muce mwikale amanda avule mu mpanga ino Yawe walavile ukupeela ivikolwe vinu na amu mupanda wao, impanga iya uzombozi ukulu cuze nupya iivunde.

¹⁰ Impanga ino mwatimwaingila mwenemo isi wa mpanga ya Eguputo kuno mwafumile, kuno mwakomile imbezu zinu nu kuzikontelela ndi vino mukakontelela imiyanda ya misalu.

¹¹ Lelo impanga ino mwatimwaingila mwenemo impanga ya myamba ni vifoloma, ino ikatapililwa ni mvula.

¹² Yene ili mpanga ino Yawe Leza winu akasunga nu kuiwaka pee ukufuma pa kutandika kwa mwaka ukufika na pa mpela ya mwaka.

¹³ “Acino lyene mwayela amalamulo yano nkumupeela ilelo, nupya mwatemwa nu kutumikila Yawe Leza ni myenzo inu yonsi nga nu umi winu onsi.

¹⁴ Ndi mwacita cii, ale lyene ndaleka imvula itonye pa mpanga inu pa nsita ino ikaizila penepo, iya pa kuwela kwa mvula ni ya pa mwela, pakuti muce mukwate uzombozi wa mbezu, mukwate na waini na mafuta ya miolivi.

¹⁵ Iviteekwa vinu navyo ndavimezezya umulemvwe mu mpanga inu, namwe kwene mulalya nu kwikuta.

¹⁶ “Muce mutekele pano limwi mungaca musombwe pakuti mumfutatile nga mukaapepa nu kutumikila tuleza tuze.

¹⁷ Ndi mwacita cico, ale lyene Yawe alamusokela. Wene alalesyanya imvula kuti itatonya pakuti umusili ukaye umalale na kuti ivyakulya vitakamele. Lyene namwe mulafwa zuwa mu mpanga isuma iyo ino Yawe akumupeela.

¹⁸ “Ali cino fwandi mwaiusya amazwi yane yaa nu kuyasunga mu myenzo inu na muli yakampingu inu. Mwayanyepelela ku makasa inu nu kuyazwala pa mausyu inu wa mipango pakuti yangaya wa ciusizyo.

¹⁹ Mwayasambilizya ku yana yinu. Mwayataka lino muli pa ng'anda, lino muli pa lwendo, lino mukupuza, na lino mukuomba.

²⁰ Muyalembe pa meema zya mang'anda inu na pa mpongolo zya misumba inu.

²¹ Lyene mwemo na ana inu mulikala amanda avule mu mpanga ino Yawe walavile ukupeela ku vikolwe vinu. Mwemo mulikala mwenemo amanda pe.

²² “Ndi cakuti mwayela amalamulo yonsi yaa yano nkumupeela kuti mwayalondela, ukutemwa Yawe Leza winu, nu kuyela amasunde yakwe yonsi nu kuya acumi kunoli,

²³ lyene alino Yawe alazinga anisi inu lino mwemo mukuya pa nkolelo, nga namwe mulapoka impanga iya antu amu nko zyuze izikulu nupya izya maka ukuluta mwemwe.

²⁴ Ponsi pano mulalyata palaya pa ncende inu. Impanga inu ilatandikila ku lwanga ku kaeya ukufika nu ku Myamba ya Lebanoni ku katutu, nu kufuma ku Luzi lwa Yufulate ukufika kuli yemba waku uwondaka.

²⁵ Kutalaya umuntu nanti wenga alamucimvya. Yawe Leza winu aliwe alalimvya intete ku mpanga yonsi pakuti monsi muno mwapita antu yace yamoopa, wakwe vino wamulavile, nga kusi nanti wenga alalesyanya kuti mutacita cico.

²⁶ “Lolini, ilelo inamupeela cakuti muisolwele mweisikulu pakasi ka upolelelo nu lutipu,

²⁷ upolelelo umaya uwakwinu ndi mumayela amalamulo yakwe Yawe Leza winu yano nkumupeela ilelo.

²⁸ Ulutipu nalo lulaya panomuli ndi mwakana ukuyela amalamulo yakwe Yawe nu kumufutatila kuti mwapepa tuleza tuze tuno mutamanyile mpiti.

²⁹ Lino Yawe Leza winu wamuleta mu mpanga ino mwasya mwingile mwenemo, muce mwalaizya upolelelo pa Mwamba wa Gelizimu ni ntipu nazyo pa Mwamba wa Ebali.

³⁰ (Mwamanya ukuti imyamba iyo yoili yaya lwaku mbalama ya Luzi lwa Yodani, mu mpanga ya ina Kenani, yayo akaikala mu Cifoloma ca Yodani. Yene yali lwaku uwondaka, pipi pipi ni miti yamanyika yaku Mole apipi nu musumba wa Giligali.)

³¹ Mwasya mulambe Luzi lwa Yodani nu kupoka impanga ino Yawe Leza winu akumupeela. Lino mwaca mwapoka nu kwikala mwenemo,

³² muce mwasumbako amano ukuyela amalamulo na masunde yonsi yano nkumupeela ilelo.”