Malango 10 - Amazwi Yakwe Leza 2013

Mose wapelwa amasunde cipya cipya

¹ “Lyene Yawe anena ati, ‘Kapate vipampa vya mawe yaili akoline na yaya kwene ankolelo nga upange ni Mbokosi ya mbao iya kwikamo vipampa vya mawe kwene yayo. Alino lyene wize ukwele kunondi pa mwamba,

² nga nani ndalemba pa vipampa vya mawe yayo amazwi ali yamwi kwene na yano yali pa vipampa vya mawe ankolelo yano watamozile. Ulinzile ukwika vipampa vya mawe yayo mu Mbokosi.’

³ “Acino nani napanzile Mbokosi ku lukula lwa muti wakwe akasya, nu kwikamo vipampa vya mawe yaili wakwe yaya kwene ankolelo. Nakwezile nu ku mwamba nda nsenzile vipampa vya mawe yaya yaili.

⁴ Lyene Yawe walemvile pa vipampa vya mawe yaya amazwi ali yamwi kwene na yano walemvile amasunde ikumi pa vipampa vya mawe ankolelo, yano wamupeezile lino wene wavwanzile pa wanda uno mwemo mwakongine apisika lya mwamba, ala ni zwi lyakwe likufuma mu moto. Yawe wampeezile ivipampa vivya ivya mawe,

⁵ nga nani natentemwike umwamba. Lyene ndi muno Yawe wampeezile ilamulo, navisile mu Mbokosi ino napanzile, nga ndakai ali muno vikaikala.”

⁶ Alino lyene aina Izlaeli iyafuma ku vifula vya ina Yakani, iyalungama ku Mosela. Kuku ali kuno Aaloni aya afwa nu kuzikwa. Eleaza umwana wakwe uwamupyanyile pa malo yakwe a usimapepo.

⁷ Lino yafuma kuku iyalungama ku Gudugoda mpaka iyafika ku Yotibata, impanga umwaya utunguzi utwingi twa manzi.

⁸ Pa nsita kwene iya Yawe wapaatwile amu mutundu wakwe Levi kuti yangaya yakasenda ya Mbokosi ya Upangano yakwe Yawe. Nu kuti yaimilila inkolelo yakwe Yawe nu kumutumikila, yala yakutaka upolelelo umwi zina lyakwe, wakwe vino yakacita na pilelo kwene.

⁹ Ali cino aina Levi yatakwatila icipande ca mpanga. Yawe umwisikulu ali cuma cao ndi muno wene wavwanzile kunoyali.

¹⁰ “Fwandi nemo natenzi pa mwamba akasanya konsi nu usiku onsi, pa manda amakumi yani wakwe vino nacisile ilyankolelo. Yawe nawe uvwile kunondi nu kuzumila ukuti atalonona mwemwe.

¹¹ Ali lino lyene wanenyile ukuya ku kutungulula mwemwe, pakuti mukapoke impanga ilya iye iyakwinu, ilya kwene ino walavile ukupeela ku vikolwe vinu.

Mulinzile ukoopa Yawe

¹² “Mwe ina Izlaeli, uvwini vino Yawe Leza winu akalonda kuti mwacita. Oopini Yawe Leza winu, mwalondela nu mu ntampulo zyakwe zyonsi. Mwamutemwa nu kumutumikila ni myenzo inu yonsi nu umi winu onsi,

¹³ nga nu kuyela amasunde yakwe yonsi yano nkumupeela ilelo kuti cikamuzipile.

¹⁴ “Silola, Yawe ali mweneco wi yulu, kumwi ni lya papelapela kwene ni vyaya mwenemo, nga ni nsi kumwi na vyonsi kwene ivyaya mwenemo.

¹⁵ Nga lelo Yawe wisile umwenzo pali yaso nu kuyatemwa wakwe cimwi. Nupya pa nko zyonsi wasolwile sile mwemwe, mwe amu mupanda wao, wakwe vino cili ilelo.

¹⁶ Ali cino fwandi ukufuma ndakai cingazipa mwayela Yawe nupya mute kumutalamila.

¹⁷ Acino lyene mumanye ndi vino Leza winu ali Leza uwaluta yaleza yonsi. Wene umukulu nupya uwamaka nu wakoofya, wino ataya na kasoozi nupya asizumila kutoola amafukakanwa.

¹⁸ Wene akasakamala ukuti ana asyale na yamukamfwilwa yatafyengwa. Wene watemwa ainamasi akaikala na antu itu, nupya akayapeela ivyakulya ni vyakuzwala.

¹⁹ Ali cino fwandi namwe kwene mwatemwa ainamasi yaya, pamulandu wakuti namwe kwene mwali ainamasi mu mpanga ya Eguputo.

²⁰ Mwaoopa Yawe Leza winu nu kumutumikila. Muye akutailwa kunoli nu kucita amalayo inu mwi zina lyakwe aliwe wenga sile.

²¹ Mwamulumbanya. Wene ali Leza winu, wino wamucitila ivintu ivikulu ivyakuzunguka nupya ivyakoofya vino mweisikulu mwailolile na manso inu.

²² Ivikolwe vinu vino vyatentemukile ku Eguputo vyali sile antu amakumi cinimbali. Lelo ndakai Yawe Leza winu uwalenga kuti musande wa ntanda zya mwiyulu.