Malaki 1 - Amazwi Yakwe Leza 2013

¹ Ii imbila ya mazwi yakwe Yawe yano wavwanzile kuli Malaki kuti anene aina Izlaeli.

Kutemwa kwakwe Yawe kuli Izlaeli

² Yawe akuti, “Nemo natemwa mwemwe.” Lelo mwemo mukati, “Uzye mwatutemwa uli?” Yawe wavwanga wati, “Uzye Esau atali umwina wakwe Yakobo? Nemo nasola Yakobo.

³ Lelo nakana Esau kumwi na amu mupanda wakwe, nga naleka kuti impanga yao ya myamba iye itongwa. Nupya kusi umwi akaikala mwenemo, suka sile yankusa.”

⁴ Limwi amu mupanda wakwe Edomu yangaiwanzya yati, “Silolini vino imisumba itu yononwa! Lelo tulaikuululula nupya.” Lyene Yawe Wamaka yonsi wavwanga wati, “Yatini yakuululule imisumba yao, lelo ndayonona nupya kwene. Antu yayo yalaamwa ukuti impanga yankota, iya antu yano insita zyonsi yaponelwa nu ukali wakwe Yawe.”

⁵ Mwemwe, mwe ina Izlaeli mulailolela na manso inu ntontonto. Alino mulavwanga muti, “Endi, ukulu wakwe Yawe wafika ukupuzya nu mu mipaka ya mpanga ya Izlaeli kwene!”

Yawe wanenola yasimapepo

⁶ Yawe Wamaka yonsi wavwanga wati, “Umwana umonsi akacindika isi, nga umuomvi akaoopa umusambazi wakwe. Ndi cakuti nene so, lyene pacani cino musincindikila? Ndi nene musambazi winu, lyene pacani cino musyangopa? Mwe yasimapepo mwemwe mukansuula. Lelo mukauzya muti, ‘Uzye tukakusuula umu nzila cii?’

⁷ Mukansuula pakupeela impolelwa zikowele pa kavuwa kane. Lelo mukauzya muti, ‘Uzye twaposiwa uli uku kucindika?’ Mukansuula apa kwelenganya ukuti kavuwa kakwe Yawe akasaluke.

⁸ Yawe Wamaka yonsi wavwanga wati, ‘Lino mukaleta inyama impafu nu kuzipela wa mpolelwa, uzye mukacita icisuma? Lino mukaleta inyama zilemale ni zilwale imuzipela impolelwa, uzye mukacita icisuma? Mwezye ukupeela inyama zizyo ku mulasi! Uzye mungamuzanzya pa kucita cico? Uzye wene angamucitila cimwi icisuma?’ ”

⁹ Lyene mwe yasimapepo ezyini kupapata kuli Leza kuti aye nu luse kunotuli. Lino mukupeela amawila yamusango uo, uzye anguvwa uli amapepo inu? Acino Yawe Wamaka yonsi wavwanga wati,

¹⁰ “Si cangecizipe wenga uwamuno muli ayale ivisasa vya mu Ng'anda ikulu yakwe Leza, kuti muposiwe ukupemba umoto wasilesile apa kavuwa kane! Nemo ntakuzangila muno muli, nupya ntalapokelela uwila uli onsi ukufuma kuno muli.

¹¹ Antu aikala amasi yonsi yalancindika. Konsi kwene antu yalaoca ubani nu kupeela amawila aswefiwe mwi zina lyane. Pasi pano antu amu nko zizyo yalancindika.

¹² “Lelo mwemo mutancindika apakulanda ukuti kavuwa kane akasauke na pakupeela penepo impolelwa zino mwasuula.

¹³ Yawe Wamaka yonsi wavwanga wati, Mwemo mukati, ‘Mwe, ala icintu cii icifuule!’ Nga imwaifyola. “Mwemo mukaleta amawila ya nyama zino mwiya nanti izilemale nanti zilwale. Uzye mukwelenganya ukuti ndazumila amawila yayo ukufuma kuno muli?

¹⁴ Citipu ciye pa muntu umusomvi wino akapeela inyama yaciwelewele wa mpolelwa kunondi, mu cifulo ca nyama isuma ino walaya ukupeela kunondi! Pasi pano nene Mwene mukulu, nga antu amu nko zyonsi yakangoopa.”