Mako 9 - Amazwi Yakwe Leza 2013

¹ Alino atwalilila kuvwanga ati, “Cumi namunena nati, apano yali yamwi pano atalafwa kufika lino yalalola Wene wakwe Leza ukwiza na maka.”

Yesu wakaoka pa mwamba

² Pacisila ca manda mutanda Yesu asenda Petulo, Yakobo, na Yoane, ayatungulula yaya pa mwamba utali, kuno yene yali onga. Lyene yalola Yesu wakaoka,

³ ni vizwalo vyakwe viyengesa cuze kuluta vino kapanga wa nsalu muno nsi angaviswefya.

⁴ Lilyo kwene alondezi yatatu yalola Eliya na Mose ala yakuvwanzyanya na Yesu.

⁵ Petulo anena Yesu ati, “Kasambilizya, catuzipila kuti twali tutenzi kuno kwene. Tumakuula insakwe zitatu, yonga iyakwako, yuze iyakwe Mose, nayuze iyakwe Eliya.”

⁶ Wene pali pamwi na auze yuvwile intete cuze. Caleka atamanyile na cino akuvwanga.

⁷ Lyene ikumbi liiza liyavimba, ni zwi lyuvwika kufuma mwi kumbi liti, “Wii, Mwanane mukundwe, mwamuvwa!”

⁸ Lilyo kwene yacelecensya konsikonsi lelo yataweni nanti umwi, suka sile Yesu uwali nao.

⁹ Lyene lino yacili tentemuka mwamba, Yesu ayapeela ilamulo ati, “Mutanena nanti umwi pali vino mwali mwalola, kufika lino Mwana wa Muntu alazyukuka kufuma ku afwe.”

¹⁰ Lyene yayela ilamulo lyakwe, lelo yavwanzyanya aisikulu yati, “Uzye kuzyukuka kufuma ku mfwa cikusenula cani?”

¹¹ Alino yuzya Yesu yati, “Uzye pacani yakasambilizya ya Masunde yakati Eliya aliiza inkolelo?”

¹² Yesu nawe aasuka ati, “Cumi, Eliya akwiza inkolelo kuti alungike vintu vyonsi. Uzye pacani amalembelo yakati Mwana wa Muntu ali nu kucula cuze nga nu kuzewana?

¹³ Lelo namunena vino Eliya wataiza, na antu yamucitila vintu vyonsi vino yakasi, wakwe vino calembwa mu malembelo pali aliwe.”

Yesu wapozya mwana mulumendo uwali nu mupasi wankota

¹⁴ Lyene lino iiza yuminkana na alondezi yauze, yalola iumba likulu cuze lyati liyazinguluka ala na yakasambilizya ya Masunde yamwi yakupazyanya nao.

¹⁵ Lino antu yalola Yesu, yazunguka cuze, lyene yasimwilila kunoli yamulamuka.

¹⁶ Yesu auzya alondezi yakwe ati, “Uzye mukupazyanya cani nao?”

¹⁷ Umuntu umwi mwi umba aasuka ati, “Kasambilizya, nali naleta mwanane umonsi kunuli, pano akweti mupasi wankota munoli nupya asyavwanga.

¹⁸ Insita yonsi lino mupasi wankota wamulema, ukamuponya pansi, alino afumya itomvu ku mulomo, alumanya incecete nga nu mwili onsi ukoma. Nali nuzya alondezi yako kuti yaufumye, lelo yali yaposiwa.”

¹⁹ Yesu ayanena ati, “Ala! Mwe antu amu mukulo usi na utailo! Uzye namaya namwe kufika lilaci? Uzye namamutekelela kufika lilaci? Muletini kunondi!”

²⁰ Lyene yamuleta kunoli. Lilyo kwene lino mupasi wankota walola Yesu, uutensya mwana na maka, umuponya pansi umufulukusya ala akufuma itomvu ku mulomo.

²¹ Yesu auzya isi wa mwana ati, “Papita manda yanga pano camulemela?” Nawe amunena ati, “Kufuma ku wance wakwe.”

²² Insita izingi mupasi wankota ukalonda kumukoma pa kumusumbila mu moto limwi mu manzi. Uye ni nkunkunsi pali sweswe nu kutwazwa, ndi cingacitika.

²³ Yesu nawe aasuka ati, “Pacani wati ndi cingacitika? Icintu consi icangupale ku muntu wino ali nu utailo.”

²⁴ Isi wa mwana asanzika izwi ati, “Nataila, lelo ungazwe kuti nkwatisye utailo.”

²⁵ Yesu alola iumba likupalamila kunoyali. Alino akalipila mupasi wankota ati, “We mupasi wankota wakwe ucipuuli na uciulu, nakunena kuti ufume mu mulumendo nupya utakaswilile munoli.”

²⁶ Mupasi wankota upunda, uutensya mwana na maka umufulukusya, alino ufuma munoli. Mulumendo aloleka wa mufwe, nu muntu wensi avwanga ati, “Wafwa!”

²⁷ Lelo Yesu alema mulumendo pi kasa amwazwilizya kuti akatuke, nawe akatuka.

²⁸ Pacisila lino Yesu wingila mu ng'anda, alondezi yakwe yamuzya mu nkama yati, “Uzye pacani cino swemo twali twaposiwa kufumya mupasi wankota?”

²⁹ Yesu nawe aasuka ati, “Kusi cuze cingafumya mupasi wankota ndi uu suka mwapepa.”

Yesu wasowela nupya pa mfwa yakwe

³⁰ Yesu na alondezi yakwe yafuma pa cifulo cici yapita yapuzya mu Galile. Yesu atalondanga kuti umuntu nanti umwi amanye kunoyali,

³¹ pano wasambilizyanga alondezi yakwe ati, “Mwana wa Muntu alakoopelwa ku antu alamukoma. Nanti cilaya vii, pacisila ca manda yatatu alazyukuka nu kuya nu umi.”

³² Lelo yene yatamanyile vino usambilizyo u wasenulanga, nga yuvwile intete kuti yamuzye.

Uzye mukulu aweni?

³³ Alino iiza ku Kapenaumu. Lino ingila mu ng'anda Yesu auzya alondezi yakwe ati, “Uzye mwali mukupazyanya cani mu nzila?”

³⁴ Lelo yataswike, pano umu nzila yapazyanyanga aisikulu pa kumanya wino uwali mukulu panoyali.

³⁵ Yesu aikala pansi, aama alondezi ikumi na yaili, ayanena ati, “Wino wensi akulonda aye wankolelo alinzile aye wacisila, nu kuya muomvi wakwe onsi.”

³⁶ Alino atoola mwana munono amwimika pa nkolelo yao. Lyene amufukatila na makasa yakwe, nga ayanena ati,

³⁷ “Wino wensi akazengela wenga uwamu ana anono wakwe wii pamulandu wane, ala wanzengela. Na wino wensi uwanzengela, asikuzengela nene lelo wazengela wino uwantuma.”

Wino wensi asikutulwisya ala ali naswe

³⁸ Yoane nawe amunena ati, “Kasambilizya, twaweni umuntu umwi ala akufumya mipasi yankota mwi zina lyako, nga twamulesizye, pano asi uwa mwi umba litu.”

³⁹ Lelo Yesu ayanena ati, “Mutamulesya, pano pasi umuntu angacita cinjelengwe mwi zina lyane na pacisila alande viipe panondi.

⁴⁰ Pano wino wensi asikutulwisya ala ali naswe.

⁴¹ Cumi namunena vino wino wensi akumupeela ulwako lwa manzi pano mwemwe yakwe Klistu, Leza atalaposiwa kumulambula.”

Intulo ya maifyo

⁴² “Muntu umwi ndi alalenga wenga uwamu ana anono uwantaila ukwifya, cazipila umuntu wiyo kumunyepelela iwe lyakusiila likulu mu nsingo nu kumusumbila muli yemba.

⁴³ Caleka ndi ikasa lyako lyakulenga kwifya, liputule! Cakuzipila ukwingila mu umi na makunkutu kuluta ukuya na makasa yaili nu kusumbwa mu Gehena, [

⁴⁴ muno ingonyo zyao zisifwa nu moto usyazimiwa.]

⁴⁵ Ndi kulu lyako lyakulenga ukwifya, liputule! Cakuzipila ukwingila mu umi wapee ni kulu lyonga kuluta kusumbwa mu Gehena, [

⁴⁶ muno ingonyo zyao zisifwa nu moto usyazimiwa.]

⁴⁷ Nanti linso lyako lyakulenga ukwifya litonkole! Cakuzipila kwingila mu wene wakwe Leza ni linso lyonga kuluta kuya na manso yaili nu kusumbwa mu Gehena.”

⁴⁸ Kuku “Ingonyo izikayalya zisifwa, nu moto usyazimiwa.”

⁴⁹ “Pano umuntu wensi alaswefiwa nu moto wa macuzi ndi vino impolelwa ikaswefiwa nu musilya.

⁵⁰ “Umusilya uusuma, lelo ndi wazunduka uzye nupya ungaukalifya uli? Uwikazi winu uye kwati ucemekwe nu musilya nga muye nu mutende pakasi kinu.”