Mako 8 - Amazwi Yakwe Leza 2013

¹ Mu manda yalya iumba nalyuze likulu cuze liiza kunoli, nupya litakweti cakulya. Yesu aama alondezi yakwe kunoli ayanena ati,

² “Naya na mizu pa antu yaa, pano yali nani manda yatatu, lelo yatakweti cakuti yalye.

³ Ndi naleka yapita kumwao kwaula kulya cimwi yamaongoka mu nzila, pano yamwi yafumile kutali.”

⁴ Alondezi yakwe nao yamuzya yati, “Uzye aukwi mu lwanga kwene muu kuno umuntu angazana vyakulya vyakuti angimula antu avule ndi yaa?”

⁵ Yesu ayauzya ati, “Uzye mukweti mikate inga?” Nao yaasuka yati, “Tukweti mikate cinimbali.”

⁶ Alino Yesu apeela ilamulo kwi umba kuti ikale pansi. Atoola mikate cinimbali, nga pacisila ca kutaizya kuli Leza, aimokoola, apeela alondezi yakwe kuti yankanye kwi umba. Na alondezi yankanya antu.

⁷ Nupya yakweti nu tuswi tunono. Yesu ataizya, alino anena alondezi yakwe kuti yankanye kwi umba.

⁸ Antu yonsi yalya iikuta. Lyene pacisila alondezi yasola mvungwa izyasile yazuzya imise cinimbali.

⁹ Antu ali penepo yali manye mazimbi yani.

¹⁰ Yesu yapakasyanya na antu yapita. Lyene apatama mu wato na alondezi yakwe, nga yaya ku mpanga ya Dalamanuta.

Afaliseo yalonda cilangililo ca cinjelengwe

¹¹ Afaliseo yamwi iiza kuli Yesu yatandika kupazyanya nawe. Yalondanga kumwezya mu mazwi, caleka yamuzya kuti acite cilangililo ca cinjelengwe cakusininkizya vino wene watumwa na Leza.

¹² Lelo Yesu aisya umwenzo avwanga ati, “Uzye pacani cino antu amu mukulo uu yakalonda cilangililo ca cinjelengwe? Cumi namunena, kusi cilangililo ca cinjelengwe cimwi cino cingacitwa ku antu yaa.”

¹³ Lyene ayasya, nupya apatama mu wato, alambila ku mbalama yuze yakwe yemba.

Citutumusi ca Afaliseo na Helodi

¹⁴ Alondezi ilile kusenda mikate. Lelo yali sile nu mukate onga mu wato.

¹⁵ Yesu ayasoka ati, “Cenjelini nupya muye apempukile ku citutumusi ca Afaliseo na Helodi.”

¹⁶ Nao yalanzyanya aisikulu yati, “Akuvwanga cii pano tusi ni mikate”

¹⁷ Yesu wamanyile cino yalanzyanyanga, caleka ayauzya ati, “Uzye pacani mukulanzyanya pamulandu wakuti musi na mukate? Uzye mutamanyile nanti ukwiluka? Uzye na ndakai kwene mutali mumanye?

¹⁸ Mwakwata amanso, uzye musyalola? Mwakwata amatwi, uzye musyauvwa? Uzye musyakwiusya

¹⁹ lino namokoozile mikate isano nu kwimula antu mazimbi yasano? Uzye mwasozile muzuzya mise inga ya mvungwa?” Nao yaasuka yati, “Ikumi na iili.”

²⁰ Nupya Yesu ayauzya ati, “Lino namokoozile mikate cinimbali nu kwimula antu mazimbi yani mwasozile muzuzya mise inga ya mvungwa?” Nao yaasuka yati, “Cinimbali.”

²¹ Nawe ayauzya ati, “Uzye nali kwene mutali mumanye?”

Yesu wapozya impafu ku Betisaida

²² Lyene lino iiza ku Betisaida, antu yamwi yaleta umuntu impafu kuli Yesu yamulenga kuti amulemelele.

²³ Yesu alema umuntu pi kasa amufumizya kunzi ya muzi. Amuswila mati pa manso, aika na makasa yakwe panoli alino amuuzya ati, “Uzye ukulola cimwi?”

²⁴ Nawe ainuka alola alino ati, “Ee, nalola antu, lelo yakuloleka wa miti ikupita.”

²⁵ Nupya Yesu amulemelela pa manso. Insita iyo kwene umuntu alolekesya, na manso yakwe yapola, lyene alola vyonsi ningo.

²⁶ Yesu nawe amunena ati, “Pitanga ukwako, utaswilila mwa muzi uu.”

Petulo waumbula ukuti Yesu ali Katuula Uwalavilwe

²⁷ Alino Yesu na alondezi yakwe yapita yaya ku mizi yapalime ku Kesaliya Filipi. Mu nzila ayauzya ati, “Nenini, uzye antu yakati nene weni?”

²⁸ Nao yaasuka yati, “Yamwi yakati wewe Yoane Kawatizya. Yamwi yakati wewe Eliya. Alino yamwi nao yakati wewe umwi wamuli yakasema.”

²⁹ Yesu nawe ayauzya ati, “Uzye mwemo mukati nene weni?” Petulo nawe aasuka ati, “Wewe Katuula uwalavilwe.”

³⁰ Alino Yesu ayapeela ilamulo ati, “Mutanena nanti umwi pali nene.”

Yesu wasowela ucuzi, imfwa nu kuzyukuka kwakwe

³¹ Alino Yesu atandika kusambilizya alondezi yakwe ati, “Mwana wa Muntu ali nu kucula cuze, nupya aikolo na yasimapepo akalamba, na yakasambilizya ya Masunde yalamukana nu kumukoma, lelo pa wanda uwalenga yatatu alazyukuka nu kuya nu umi.”

³² Avwanga paswe kunoyali. Caleka Petulo amusenda pa mbali atandika kumukalipila.

³³ Lelo Yesu aseleuka, alola pa alondezi yakwe, asinkola Petulo ati, “Fuma pano, Ciwa! Pano amelenganyo yako yatafumile kuli Leza, lelo auntunze.”

³⁴ Lyene Yesu aama iumba na alondezi yakwe kunoli. Alino ayanena ati, “Muntu umwi ndi akasi kundondela, aikanye, aisendele ulupanda nga andondele.

³⁵ Pano wino wensi akalonda kutuula umi wakwe, wene alauponzya. Lelo wino wensi amaponzya umi wakwe pamulandu wi Landwe Lisuma wene alautuula.

³⁶ Uzye umuntu angakwata muzano cii ndi walonka ivya mu nsi vyonsi, lelo waponzya umi wakwe? Awe kusi cimwi!

³⁷ Uzye kuli cimwi cino umuntu angalipa kuti umi wakwe umuwelele?

³⁸ Muntu ndi waya ni nsonyi pali nene na pa mazwi yane mu mukulo uu uwa uzelele nu wankota, Mwana wa Muntu alaya ni nsonyi panoli lino aliza pali pamwi na angeli yamuzilo, mu lulumbi lwakwe Isi.”