Mako 7 - Amazwi Yakwe Leza 2013

¹ Afaliseo na yakasambilizya ya Masunde yamwi afumile ku Yelusalemu iiza yakongana kuli Yesu.

² Yalola kuti alondezi yakwe yamwi yalyanga ni minwe ya mifitalila.

³ (Ayuda yonsi pamwi na Afaliseo yatangalya suka yafulala ku minwe kulingana nu lutambi lwa vikolwe vyao.

⁴ Lino yafuma kwi sokoni yatangalya suka yafulala. Yalondelanga intambi na zyuze izingi zino yapokelile kufuma ku vikolwe, wakwe vino yangafula ingako, inyungu zya mukuwa nga ni misazi.)

⁵ Alino Afaliseo na yakasambilizya ya Masunde yuzya Yesu yati, “Uzye pacani cino alondezi yako yasyayela intambi zino vikolwe vitu vyatusilile, yakalya ni minwe ya mifitalila?”

⁶ Yesu nawe ayaasuka ati, “Ezaya wali ningo lino wasemile pali mwemwe! Mwe yasomvi, wakwe vino walemvile ati, ‘Leza ati, antu yaa, yakancindika sile mu mazwi yao. Lelo melenganyo yao yali kutali kufuma kunondi.

⁷ Nanti yakumpepa icasilesile, pano yakasambilizya masunde ya untunze kwati ali masunde yane!’”

⁸ “Mwasya masunde yakwe Leza nu kusunga intambi zya untunze.”

⁹ Nupya Yesu atwalilila kuyanena ati, “Mwacenjela mwakukanila masunde yakwe Leza nu kusakamala kusunga intambi zinu.

¹⁰ Pano Mose wakonkomizye ati, ‘Cindika so na nyoko. Wino wensi uwatuka isi nanti nyina, alinzile ukufwa.’

¹¹ Lelo mwemo mukasambilizya ukuti umuntu ndi akweti cimwi cino angapeela kwazwa isi nanti nyina, lelo ndi wati, ‘Cii a Kobani’ (icikusenula ukuti, cino capeelwa kuli Leza),

¹² wene atangapeelwa mulandu pa kuntazwa isi nanti nyina.

¹³ Mu nzila ii mukalenga antu kusula mazwi yakwe Leza, pa kulondela intambi zinu. Akuno vili vintu navyuze ivili wakwe vii vino mukacita.”

Ivintu ivikakowezya umuntu

¹⁴ Lyene Yesu aama iumba kunoli alinena ati, “Uvwini kunondi, mwensi, nu kumanya.

¹⁵ Kutaya cikaingila mu muntu kufuma kunzi cingamukowezya. [

¹⁶ Suka cikafuma mu muntu icingakowezya muntu.]”

¹⁷ Lino wasya iumba wingila mu ng'anda, alondezi yakwe yamuzya kuti alondolole vino mulumbe uu ukusenula.

¹⁸ Yesu ayauzya ati, “Uzye namwe kwene mutilwike! Uzye mutamanyile vino kusi cintu icikafuma kunzi cino mu cumi cingamukowezya?

¹⁹ Pano cisiingila mu mwenzo wakwe lelo munda yakwe alino pacisila cikafumila kunzi.” (Mukuvwanga cii Yesu walanzile ukuti vilyo vyonsi vilinzile kuliwa.)

²⁰ Atwalilila nu kuvwanga ati, “Icintu cino cikafuma mu mwenzo wa muntu icingamukowezya.

²¹ Pano kufuma mukasi, mu mwenzo wa muntu, mukafuma amelenganyo yankota akamutungulula ku kucita ivya winyi, uwivi, kukoma,

²² kulongozya, lunkumbwa, vintu vyonsi viipe, intumpu, ukowezi, uzuwa, kutumpwila, vilumba, nu utumpe.

²³ Amelenganyo ya yonsi a nkota yakafuma mu mwenzo wa muntu nu kumukowezya.”

Utailo wa mwanaci umwina Kenani

²⁴ Lyene Yesu afuma ku cifulo cici aya ku mpanga iyaya pipi nu musumba wa Tuli. Aingila mu ng'anda, nupya atalondanga kuti umwi amanye vino wene ali kuku, lelo antu yene yacimanyile.

²⁵ Umwanaci wino uwali nu mwana kaci, uwali nu mupasi wankota munoli, uvwile ilandwe lya pali Yesu, nga aiiza, afukama pa ngazo zyakwe.

²⁶ Umwanaci wali u Mugiliki, uwavyalilwe mu mpanga ya Fonisya mu Silya. Apapatila Yesu kuti afumye mupasi wankota mu mwana wakwe kaci.

²⁷ Lelo Yesu nawe amunena ati, “Leka ana yatale ikute. Cisi cisuma kutoola vyakulya vya ana nu kusumbila yasimbwa.”

²⁸ Umwanaci avwanga ati, “Endi Mwene, Na yasimbwa kwene ali mwisika lya cipango yakalya vilakasi vya vyakulya vya ana!”

²⁹ Alino Yesu nawe amunena ati, “Apa kwaasuka kwako, swilila ku ng'anda, umazana mupasi wankota wati ufuma mu mwana wako!”

³⁰ Lyene apita ku ng'anda aya azana mwana aizi pa musanzi, nu mu cumi mupasi wankota ala wati ufumamo.

Yesu wapozya cipuuli

³¹ Yesu afuma ku mpanga yapalamana na Tuli nu kuya pita mu Sidoni ala akuya kuli yemba wa Galile, kulepula mpanga pakasi ka misumba ikumi.

³² Lyene yaleta kunoli umuntu uwali a cipuuli nupya katitisya, yalenga Yesu kuti amwikepo makasa yakwe.

³³ Yesu amusenda amupaatula kufuma kwi umba, aika minwe yakwe mu matwi yakwe cipuuli, aswa mati, nu kukumya ululimi lwa muntu.

³⁴ Lyene Yesu alingamila kwiyulu, aisya umwenzo, amuvwanzya ati, “Efata,” kuli kuti, “Yulika!”

³⁵ Lilyo kwene umuntu atandika kuvwa, nu lulimi lwakwe lusapulwa.

³⁶ Lyene Yesu apeela ilamulo ku antu kuti yatanena umuntu nanti umwi. Lelo lino wayapeela ilamulo lii kuti yatanena umwi, yene yatwalilila kunena antu.

³⁷ Na yonsi acuvwile yazunguka cuze yati, “Akucita vintu vyonsi ningo! Akulenga yacipuuli yauvwa na yaciulu yavwanga!”