Mako 6 - Amazwi Yakwe Leza 2013

Yesu yamukana ku Nazaleti

¹ Yesu afuma kweneko aya ku musumba uwa kumwao, pamwi na alondezi yakwe.

² Pa Sabata atandika kusambilizya mu ng'anda ya mapepo. Antu aingi, amuvwile yazunguka cuze. Alino yauzyanya yati, “Uzye aukwi kuno umuntu wii wafumya vintu vii vyonsi? Amano ya musango ci apelwa kunoli, pakuti acita ivinjelengwe?

³ Uzye wii, asi akawaza wa mbao, mwana wakwe Maliya? Uzye wii, asi mwina wakwe Yakobo, Yosefu, Yuda, na Simoni? Uzye yakaci yakwe yasiikala kuno mwitu?” Alino yamukana.

⁴ Yesu ayanena ati, “Kasema asyacindikwa ku mpanga ya kumwao, ku akazi kakwe, nu ku amu ng'anda yakwe, suka kusi kumwao.”

⁵ Wene atacisile icinjelengwe cimwi kuku, lelo wisilepo sile makasa yakwe pa alwale yanono ayapozya.

⁶ Wene azunguka cuze, pano antu yatakweti utailo munoli. Alino aya mu mizi yazingulwike ala akusambilizya antu.

Yesu watuma alondezi yakwe ikumi na yaili

⁷ Lyene aama alondezi ikumi na yaili kunoli ayatuma yaili yaili, ayapeela maka akufumya mipasi yankota.

⁸ Nupya ayakonkomezya ati, “Mutasenda cintu cimwi pa lwendo lwinu, suka sile intuwa. Mutasenda mukate, nanti mufuko wa kulengelamo vimwi, nanti impiya mu vikwama vinu.

⁹ Muzwale ndyatu, lelo mutasenda cakuzwala na cuze.”

¹⁰ Nupya ayanena ati, “Mu ng'anda yonsi muno mwingila ndi yamupokelela, mwikale mu ng'anda kwene iyo kufika na lino mulafumamo mu musumba uo.

¹¹ Konsi kuno antu yatalamuzengela nu kuvwa mazwi inu, muce mufume kweneko nu kukunta ulukungu lwaku ngazo zinu, kuya umboni kunoyali pa kuluvyanya kwao!”

¹² Caleka yapita nu kukosola kuti antu yazenzuke.

¹³ Yafumizye mipasi yankota iingi, yapaka alwale amafuta nu kuyapozya.

Imfwa yakwe Yoane Kawatizya

¹⁴ Lyene mwene Helodi auvwa vintu vii vyonsi, pano impwelo ya pali Yesu yalanga yati salangana konsi. Antu yamwi yavwanzile yati, “Yoane Kawatizya watazyukuka kufuma ku afwe. Acino akwatile na maka akucita ivinjelengwe.”

¹⁵ Yamwi yavwanga yati, “A Eliya.” Yamwi nao yavwanga yati, “A wenga wamuli yakasema yampiti.”

¹⁶ Lino Helodi uvwile cii, wavwanzile ati, “A Yoane Kawatizya, wino naputwile umutwe, watazyukuka!”

¹⁷ Helodi uwapile ilamulo kuti yaleme Yoane, yamunyepe nu kumuyalila mu ng'anda yaminyololo. Helodi wacisile cii pamulandu wakwe Helodia, muci wakwe Filipo, umwina wakwe.

¹⁸ Yoane Kawatizya wanenanga Helodi ati, “Citaine ni sunde kutwala Helodia muci wa munyonko.”

¹⁹ Acino Helodia asokela Yoane nu kulonda kumukoma. Lelo aposiwa, pamulandu wakuti Helodi

²⁰ oopanga Yoane pano wamanyile vino Yoane wacitanga ivyawololoke nupya wali uwamuzilo. Caleka amucingilila. Watemwanga kuvwa kunoli, nanti angala vino walandanga vyamuzungulanga.

²¹ Lyene Helodia wakweti kasita kasuma. Cali pa wanda wakuzangila kuvyalwa kwa mwene Helodi. Mwene wacitile ntunguluzi zyonsi izya mu uteko, na yamusika ya nkondo, na akalamba amu Galile icimulo.

²² Alino mwana Helodia kaci wizile acina, nu kuzanzya Helodi na yano ali mu cimulo. Lyene mwene auzya mukazyana ati, “Uzye ukulonda cani cakuti nkupele? Namakupeela consi cino umalonda.”

²³ Mwene amulaya ati, “Nalapa ukuti consi cino ukulonda namakupeela nanti a citika wa wene wane!”

²⁴ Mukazyana afuma aya auzya nyina ati, “Uzye namalenga cani?” Nyina amunena ati, “Kalenge umutwe wakwe Yoane Kawatizya.”

²⁵ Mukazyana aswilila zuwa ku mwene, amulenga ati, “Nkulonda umpeele ndakai kwene umutwe wakwe Yoane Kawatizya pa mbale!”

²⁶ Cii, calenzile mwene kuya nu ulanda cuze. Lelo pamulandu wa milapo yakwe ino wacisile pa manso yakwe yao amilwe ku cimulo, atakanyile kumupeela cino walenzile.

²⁷ Lilyo kwene apeela musilika ilamulo kuti alete umutwe wakwe Yoane. Musilika apita, aya ku ng'anda yaminyololo, nu kuputula umutwe wakwe Yoane.

²⁸ Alino auleta pa mbale nu kuupela ku mukazyana, nawe aupela kuli nyina.

²⁹ Lino alondezi yakwe Yoane yuvwa, iiza yasenda icala cakwe yaya yazika.

Yesu wimula antu kuluta pa mazimbi yasano

³⁰ Atumwa yawela kuli Yesu, yamulandila vyonsi vino yaomvile nu kusambilizya.

³¹ Lyene antu aingi cuze izanga nu kupita, caleka Yesu na alondezi yatakweti ni nsita yakulya. Alino anena alondezi ati, “Paatukini tuye swensi ku cifulo ukuli cele kuti mukapuze panono.”

³² Lyene yapaatuka yapita mu wato yaya ku cifulo cili cele.

³³ Lelo antu aingi yayalola kuno yakupita, nu kuyamanya yayamanya. Alino yasimula kufuma mu misumba yonsi yayakolelela.

³⁴ Lino Yesu wapatuka mu wato, alola iumba likulu cuze, nga aya ni nkunkunsi, pano yakoline wa mfwele izitakweti kacema. Lyene atandika kuyasambilizya vintu ivingi.

³⁵ Lyene lino ilanzi lyatemba, alondezi yapalama kunoli yamunena yati, “Ilanzi lyatemba, nupya kuno uku matololo.

³⁶ Nena antu yapite, kuti yaye mu mitanda nu mu mizi izingulwike mu pipi yakaikalile vyakulya vyakuti yalye.”

³⁷ Yesu nawe ayanena ati, “Mwemwe kwene yapelini vyakuti yalye.” Alino yamuzya yati, “Uzye ukwelenganya vino impiya madenali imyanda iili ziingasumbwa pa mukate wakulingana kuyalisya?”

³⁸ Alino Yesu ayauzya ati, “Uzye mukweti mikate inga? Pitini mukalole.” Lino yaya yalola, yamwasuka yati, “Tukweti mikate isano ni nswi ziili.”

³⁹ Yesu apeela ilamulo ku alondezi yakwe kuti yateke antu pansi mu maumba maumba.

⁴⁰ Lyene antu ikala mu maumba maumba yamwi mwanda onga na yamwi makumi yasano.

⁴¹ Alino Yesu atoola mikate isano ni nswi ziili, alingamila kwiyulu, ataizya kuli Leza. Lyene amokoola mikate, nga apeela alondezi yakwe kuti yankanye antu. Apeela ni nswi ziili ku alondezi yakwe kuti yankanye antu.

⁴² Onsi yalile iikuta.

⁴³ Lyene alondezi yasola imvungwa izyasile yazuzya mise ikumi na iili.

⁴⁴ Na pali yao alile pali aonsi mazimbi yasano.

Yesu wapita pa manzi

⁴⁵ Lilyo kwene Yesu anena alondezi yakwe kuti yapatame mu wato yamukolelele kuya ku muzi wa Betisaida, uwali ku mbalama yuze yakwe yemba. Lelo wene asyala akunena antu kuti yapite kumwao.

⁴⁶ Pacisila ca kupakasyanya na antu, apita aya akwela umwamba ku kupepa.

⁴⁷ Lino kakuku katola, alondezi yali mu wato pali yemba pakasi, Yesu wene wali wenga pa nkumba yakwe yemba.

⁴⁸ Waweni ukuti alondezi yakwe yali atonte pa kufiya, pano cipunga cafumanga kuno yayanga. Lyene pa macaca, Yesu aiiza kunoyali, ala akupita pa manzi. Wali pipi nu kuyapuzya,

⁴⁹ lelo lino yamulola akupita pa manzi, yelenganya ukuti wene umuyeye, nga yapunda,

⁵⁰ pano lino yamulola yuvwa intete cuze. Lyene lilyo kwene Yesu nawe avwanga kunoyali ati, “Posyini! Anene! Mutoopa!”

⁵¹ Alino apatama mu wato munoyali, nga ni cipunga cilala. Alondezi yazunguka cuze,

⁵² pano yatilwike vino cikusenula icakulisya antu mazimbi yasano ni mikate isano, pano imyenzo yao yali inyepwe.

Yesu wapozya alwale ku Genesaleti

⁵³ Lyene lino yalamba mbalama yuze, yakooka pa Genesaleti, nga yasya uwato pi lambwa.

⁵⁴ Lilyo kwene lino yapatuka mu wato, antu yamanya Yesu.

⁵⁵ Alino yasimula kufuma konsikonsi mu mpanga ilya, na konsi kuno yuvwile ukuti akuno ali, yamuletela alwale pa vintamba vyao.

⁵⁶ Lyene na konsi kuno Yesu wayanga, mu mizi, nu mu misumba, nu mu mpanga, antu yasendanga alwale nu kuyaleta mu musolo wa pi sokoni. Alino yamulenga kuti aleke alwale yaleme nanti kwi sempele lya cizwalo cakwe. Na yano yonsi alemileko yapoziwe.